08 Август 2023

Бегоҳирӯзии 05.08.2023 тибқи нақшаи тасдиқгардидаи Дастгоҳи иҷроияи Презиленти Ҷумҳурии Тоҷикистон дар боги ба номи "Низомиддин Алишер Навоӣ"-и шаҳри Душанбе барномаи фарҳангиву адабии санъаткорони шаҳри Гулистон пешкаши сокинони пойтахт карда шуд.

Дар чорабинии фарҳангӣ муовини Раиси шаҳри Душанбе Сиҷоуддин Саломзода, Раиси шаҳри Гулистон Раъно Ҳошимзода, роҳбари гурӯҳи корӣ ба истиқболи 35-солагии Истиқлоли давлатии Ҷумҳурии Тоҷикистон, директори Агентии таъминоти амволи махсуси назди Ҳукумати Ҷумҳурии Тоҷикистон Савзаалӣ Назирзода ва дигар шахсони масъул иштирок доштанд.

Нахуст муовини Раиси шаҳри Душанбе Сиҷоуддин Саломзода суханронӣ намуда,  аз рушду тараққиёти кишвар таҳти роҳбарии хирадмандонаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ёдовар гардида, ба сокинони шаҳри Гулистон ҷиҳати пешкаш намудани намоиш-фурӯши маҳсулоти кишоварзӣ, ҳунарҳои мардумӣ, таомҳои миллӣ ва барномаи фарҳангиву адабӣ изҳори сипос намуд.

 

Раиси шаҳри Гулистон Раъно Ҳошимзода зимни суханронӣ аз рушду инкишофи кишвар ва бо роҳнамоиву ҳидоятҳои Пешвои муаззами миллат муҳтарам Эмомалӣ Раҳмон рӯз аз рӯз ободу зеботар гардидани шаҳри Гулистон ёдовар гардида, таъкид намуд, ки ҷиҳати амалӣ гардонидани ҳадафҳои стратегии кишвар ва нақшаву барномаҳои амалкунанда дар шаҳр тадбирҳои зарурӣ андешида шуда, корҳо бо вусъат ҷараён доранд.

Сипас, санъаткорони шаҳри Гулистон баномаи рангину марғуби фарҳангиро манзури иштирокчиён намуданд.

Дар фарҷоми чорабинӣ аз ҷониби муовини раиси шаҳри Душанбе ба роҳбарияти Мақомоти иҷроияи ҳокимияти давлатии шаҳри Гулистон барои дар сатҳи баланд баргузор намудани намоиш – фурӯши маҳсулоти кишоварзӣ, ҳунарҳои мардумӣ, таомҳои миллӣ ва барномаҳои фарҳангиву адабӣ Сипосномаи Мақомоти иҷроияи ҳокимияти давлатии ноҳияи Шоҳмансури шаҳри Душанбе тақдим карда шуд.