08 Сентябр 2023
Санаи 07.09.2023 тибқи нақшаи тасдиқгардидаи мақомоти иҷроияи ҳокимияти давлатии шаҳр дар Ҷамоати шаҳраки Консой 32-юмин солгарди Истиқлоли давлатии Ҷумҳурии Тоҷикистон бо шукӯҳ таҷлил карда шуд.
Дар чорабинии мазкур муовини Раиси шаҳр Шарифҷони Саидраҳмон номаи табрикотии Раиси шаҳр Раъно Ҳошимзодаро ба самъи иштирокдорон расонид.
Зикр карда шуд, ки Ватани маҳбуби мо – Тоҷикистони соҳибистиқлол 32 сол инҷониб, ба ҳайси узви комилҳуқуқи ҷомеаи ҷаҳонӣ арзи ҳастӣ дорад. Дар ин солҳо мамлакати мо ва халқи баору номуси он таҳти сиёсати хирадмандонаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз нури зиндагибахши хуршеди Истиқлол баҳравар гардидаистодаанд. Дар ин росто, бо дастоварди бузург дар роҳи рушду инкишофи сиёсиву иҷтимоӣ ва иқтисодиву фарҳангӣ бо қадамҳои устувор пеш мераванд.
Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон таъкид менамоянд, ки: “Таҷлили санаи ба истиқлолият расидани Тоҷикистон барои мо як ҷашни ҳамасолаи муқаррарӣ ё варақгардонии оддии тақвим нест, балки рӯзи шукронаи мо аз тақдир ва бори дигар пеши назар овардани бурду бохтҳои гузашта, таҳлилу қиёси ҳаёти имрӯза ва тарҳрезӣ намудани дурнамои рӯзгори ояндаамон мебошад”.
Дар воқеъ Истиқлол ба мо имконияти таърихие фароҳам овард, ки Ватани худро соҳибӣ кунем, давлатдории миллии худро барпо намоем, суннату арзишҳои миллиамонро эҳё созем, ормонҳои деринаи халқамонро амалӣ гардонем ва зиндагии озодонаи мардумамонро ба роҳ монем.
Муҳимтарин дастоварди мо дар ин давра таъмини сулҳу субот, аз хатари нобудӣ наҷот додани давлатдории миллиамон ва аз парокандагӣ раҳо бахшидани миллатамон мебошад. Зеро бе доштани давлати озод орзу ва омоли таърихии миллат ва ҳадафу барномаҳои насли имрӯзу фардои он маънои худро аз даст медод.
Сипас, раиси ҷамоати шаҳрак Амир Муҳаббатов сокинонро бо ҷашни Истиқлол табрик гуфт.
Ҳамчунин, муовини ҶМТКММ “Апрелевка” Лоҳур Назришозода табрикоти директори ҶМТКММ “Апрелевка”-ро ба самъи сокинони шаҳрак расонид.
Дар вазъи тантанавӣ ба собиқадорон ва шахсони фаъол ифтихорнома ва туҳфаҳои хотиравӣ тақдим карда шуд.
Дар қисми фарҳангии чорабинӣ санъаткорони бахши фарҳанги шаҳр барномаи рангини консертиро манзури иштирокдорони чорабинӣ намуданд.
