Таҷлили ид дар дидбонгоҳ

НАВГАРЗАН. Дар толори МТМУ-и Ҷамоати шаҳрак ба муносибати 24-солагии Рўзи таъсисёбии Қувваҳои Мусаллаҳи Ҷумҳурии Тоҷикистон чорабинии идона барпо карда шуд. Дар чорабинӣ дар баробари хонандагони мактаб, ки саҳнаҳо аз рўзгори сарбозонро барои ҳозирин намоиш дода, ашъори ватанпарварона қироат намуданд, сарбозони дидбонгоҳи сарҳадии №5 низ ширкат варзида, машқҳои ҳарбӣ нишон доданд.

Ҳамчунин дар ин рўз ҷавонони синни даъватӣ ва модарон ба қисми ҳарбии воқеъ дар ин минтақа буда рафта, ба зисту зиндагонии сарбозон ошноӣ пайдо карданд. Хонандагони мактаб ба муҳит ва шароити сарбозон аз наздик шинос гардиданд, ки ин ҳама дар рўҳияи ватандўстиву садоқат ба сарзамини аҷдодии онҳо таъсири мусбати худро мегузорад. Дар ин қисми ҳарбӣ бо ташаббуси соҳибкор Фахруддин Аъзамов ва модарони навгарзанӣ дасторхони идона густурда шуда, аз ҷониби клуби ҷавонон барномаи рангини фарҳангӣ баргузор гардид.

Дафтари матбуоти
Раиси шаҳр

Табрикоти Раиси шаҳри Гулистон Сатториён Матлубахон Амонзода ба муносибати Рўзи Қувваҳои Мусаллаҳи Ҷумҳурии Тоҷикистон

Гулистониёни азиз!

Рўзи 23-юми феврал ба ташкилёбии Қувваҳои Мусаллаҳи Тоҷикистон, ки дастоварди беназири даврони истиқлолияти давлатӣ маҳсуб меёбад, бисту чор сол пур мешавад. Ин рўйдод дар таърихи халки тоҷик воқеаи муҳим ва пурарзиш ба шумор меравад.

Қувваҳои Мусаллаҳи мо дар як давраи ҳассос арзи вуҷуд намуда, дар муддати на чандон тўлонӣ аз санҷишҳои ҷиддӣ гузашта, такомул ва обутоб ёфт. Ҳоло Артиши Миллӣ ҳамчун нерўи тавоно, муҷаҳҳаз ва муташаккил амнияти далват ва осоиши кишварро таъмин менамояд.

Қабули Раиси шаҳр дар Чоруқдаррон

Раиси шаҳр Матлубахон Амонзода санаи 17-уми феврал ба Ҷамоати шаҳраки Чоруқдаррон сафари корӣ анҷом дода, шаҳрвандонро қабул намуд, ки дар ин вохўрӣ мудирони шуъбаҳо, бахшҳо ва дигар масъулини мақомоти иҷроияи ҳокимияти давлатӣ ширкат варзиданд. Раиси шаҳр дар оғози вохўрӣ таъкид намуд, ки бояд масъулони мақомоти иҷроияи ҳокимияти давлатӣ муроҷиати шаҳрвандонро саривақт мавриди баррасӣ қарор дода, мушкилоти онҳоро ҳал намоянд.

Дар ҷараёни қабули Раиси шаҳр бист нафар шаҳрванд муроҷиат намуда, проблема ва мушкилоти хешро арз доштанд, ки аз ҷониби мудирони бахшҳо, корхонаҳои марбута ва шахсони масъул мавриди арзёбӣ қарор гирифтанд. Муроҷиати шаҳрвандон маълум намуд, ки мушкилоти онҳо асосан марбут ба ёрии моддӣ, оид ба норасоии мутахассисони соҳаи тиб ва мошини ёрии таъҷилӣ, хусусигардонии хонаи истиқоматӣ, гирифтани ордери хона, хизматрасонии коммуналӣ ва рифоҳӣ, таъмин намудан ба қитъаи замин барои бунёди манзили истиқоматӣ, оид ба гузоридани намози ҷумъа дар масҷиди шаҳрак мебошанд.

Сипоси ҷавонон ба Пешвои миллат

Ба ифтихори Соли ҷавонон дар маркази шаҳр бо ҷалби беш аз 1200 нафар ҷавонони муассисаҳои таълимӣ, корхонаву ташкилотҳо, варзишгарону донишҷўён роҳпаймоӣ баргузор гардид.

Роҳпаймоӣ бо мақсад вокуниш ва изҳори сипоси ҷавонони шаҳри Гулистон ба Пешвои миллат ҷиҳати эълон гардидани соли 2017 Соли ҷавонон баргузор гардид. Дар қисми фарҳангии чорабинӣ намояндагони бахши ҷавонон, варзиш ва сайёҳӣ ва намояндаи шуъбаи маориф ҳозиринро бо Соли ҷавонон табрик намуда, иброз доштанд, ки ҷавонон бояд аз ҳама қишрҳои ҷомеа фаъол бошанд, рамзҳои давлатӣ, муқаддасоти миллӣ ва дастовардҳои истиқлолиятро ҳифз намуда, дар ҳаёти сиёсиву иҷтимоии Тоҷикистони азиз бо дасту дили гарм ва нерўи бунёдкорона ширкат варзанд, амнияти давлат ва шарафу номуси ватандориро ҳимоя намуда, худро аз ҳама хатарҳои номатлуби ҷаҳони муосир эмин нигоҳ дошта, парчамбардори кишвари муқаддасамон гарданд.