ИНЪИКОСИ КОРҲОИ СОЗАНДАГИИ ҚАЙРОҚҚУМ ДАР ВАО

«РӮЗНОМАИ БИНОКОРОН»

Дар шумораи навбатии «Рӯзномаи бинокорон», № 10, аз 28.09. соли 2015, ки нашрияи сартосарии ҷумҳурӣ маҳсуб ёфта, аз навгониҳои соҳаи бинокории кишвар гузоришу мусоҳиба, очерку лавҳаҳо ба чоп мерасонад таҳти унвонии «Қайроққум : оғози кори чанд иншооти нав дар як рӯз» матолиби хабарнигор Ҷовиди Аштӣ ба чоп расидааст. Муаллиф бо истифода аз аксҳои иншоотҳои нав, ширкати бевоситаи Раиси вилояти Суғд Абдураҳмон Қодирӣ ва Раиси шаҳр Матлубахон Амонзода корҳои бомароми созандагиву бунёдкории дар шаҳри Қайроққум анҷомёфтаро воқеъбинона ва таъсирбахш ба қалам додааст.

Аксия дар беморхона

Дар ташкилоти ибтидоии Беморхонаи марказии шаҳр дар мавзӯи «Амалҳои коррупсиониро маҳкум мекунем» вохӯрӣ бо кормандон гузаронида шуд. Муовини раиси ташкилоти ибтидоии Беморхонаи марказии шаҳр Болтуев Зоҳир дар баромади худ қайд намуд, ки дар Ҷумҳурии Тоҷикистон Қонуни ҶТ «Дар бораи мубориза ба зидди коррупсия» амал мекунад. Барои амали намудани Қонуни мазкури тамоми шаҳрвандони Ҷумҳурии Тоҷикистон вазифадоранд.

Амалҳои коррупсионӣ ниҳоят хатарнок буда, барои роҳ надодан ба чунин кирдорҳо мо бояд, чораҳои амалӣ андешем. Чунин вохӯрӣ дар ташкилоти ибтидоии ҶМТКММ «Апрелевка» низ гузаронида шуд. Муовини раиси ташкилоти ибтидоӣ Исломов Зафар дар минтақаи «Апрелевка»и деҳаи Қароҷингил оиди масъалаи мазкур ва дар бораи пешгирии шомилшавии ҷавонон ба гурӯҳҳои экстримистӣ, ҳодисаҳои нангинӣ аз тарафи Абдуҳалим Назарзода ва ҳаммасслакони ӯ моҳи сентябр ба вуқӯъ пайваста баромад намуд. Инчунин вакили Маҷлиси вакилони халқи шаҳр Сафаров Рустам дар минтақаи «Бургунда»-и ҳамин корхона оиди масъалаҳои мазкур баромад намуд.

Тозагӣ – мароми мост

Ҷиҳати таъмини тозагӣ дар доираи ҳамовозию амалисозии қарори Раиси шаҳри Қайроққум Матлубахон Амонзода аз 5 январи соли 2015, №2 «Дар бораи эълон намудани рӯзи санитарӣ» ҷомеаҳои меҳнатии ташкилоту корхонаҳо, Ҷамоати шаҳракҳо, муассисаҳои таълимӣ ва кулли шаҳрвандон рӯзи шанбе-10 октябр ба ҳашар баромада Маркази шаҳр, минтақаи фароғатӣ ва шаҳракҳоро аз партовҳо тозаю озода намуданд.

Мубориза бар зидди коррупсия – кори умум

Дар Муассисаи ғайридавлатии коллеҷи тиббии шаҳри Қайроққум бо иштироки  раиси Кумитаи иҷроияи шаҳрии ҲХДТ Каромат Қосимова, мудири шӯъбаи кор бо бонувони КИ ҲХДТ Саёҳат Бадалова ва мудири шӯъбаи кор бо занон ва оилаи МИҲД-и  шаҳр Муслимахон Исоқова вохӯрӣ бо омӯзгорону донишҷӯён доир гардид.

Дар мавзӯи «Мубориза бар зидди коррупсия қарзи шаҳрвандии мост» Каромат Қосимова баромад намуда зикр дошт, ки дар кишвари мо Қонуни ҶТ «Дар бораи мубориза ба зидди коррупсия» қабул гардидааст ва Фармони Президенти мамлакат  аз 30 августи соли 2013, таҳти №1504   «Дар бораи Стратегияи муқовимат бо коррупсия дар ҶТ барои солҳои 2013 -2020» ба тасвиб расида буд, ки барои амалӣ гардонидани он тамоми аҳли ҷомеа вазифадоранд.