Ҷанги Бузурги Ватанӣ. Акси садои он рӯзҳои пурталотум, он набарди ҳаёту мамот ҳар қадар ба саҳифаҳои таърих дохил гардад, шаҳомату бузургии он ҳамон қадар барҷастатар аён мегардад. Ёди он айём дар мағзмағзи қалби онҳое, ки дар майдони ҳарб сина сипар кардаанд ё дар ақибгоҳ шабро шабу рӯзро рӯз нагуфта Ғалабаи бузургро наздик кардаанд, абадӣ ҷой гардидааст.
Ҳамшаҳриёни азиз! Ҳамаи шумо ва собиқадорони ҷангу меҳнатро ба муносибати Иди Ғалаба табрик гуфта, бароятон фазои ҳамешагии сулҳу оромӣ ва саломативу сарбаландиро хоҳонам. Тавре Президенти мамлакат Ҷаноби Олӣ, муҳтарам Эмомалӣ Раҳмон таъкид кардаанд:
"Мо ҷоннисориҳои ҷанговаронро дар ҷабҳаҳои набарди мардона ва заҳмати шабонарӯзии калонсолону модарону хоҳаронро дар ақибгоҳ ҳеҷ гоҳ фаромӯш намекунем".
9 май бо иштироки Раиси шаҳри Қайроққум дар боғи фарҳангу фароғатии ба номи Темурмалик ба муносибати солгарди 70-уми Ғалаба дар Ҷанги Бузурги Ватании солҳои 1941-1945 митинги ёдбуд баргузор шуд. Нахуст Матлубахон Амонзода, Раиси шаҳр баромад карда кулли сокинони шаҳрро ба Иди Ғалаба табрик намуд. ӯ изҳор дошт, ки Ҷанги Бузурги Ватанӣ, акси садои он рӯзҳои пурталотум, он набарди ҳаёту мамот ҳар қадар ба саҳифаҳои таърих дохил гардад, шаҳомату бузургии он ҳамон қадар барҷастатар аён мегардад. Ёди он айём дар мағз-мағзи қалби онҳое, ки дар майдони ҳарб сина сипар кардаанд ё дар ақибгоҳ шабро шабу рӯзро рӯз нагуфта Ғалабаи бузургро наздик кардаанд, абадӣ ҷой гардидааст.
Аёдати ашхоси ниёзманд, пирони барҷомонда, яккаву танҳо, собиқадорони ҷангу меҳнат дар арафаи иду ҷашнҳо ба ҳукми анъана даромадааст. Ба муносибати 70-солагии Рӯзи Ғалаба дар Ҷанги Бузурги Ватании солҳои 1941-1945 бо иқдоми Раиси шаҳри Қайроққум Матлубахон Амонзода дар маркази шаҳр 15 нафар ва дар Ҷамоати шаҳракҳо зиёда аз 60 нафар табақаҳои эҳтиёҷманди аҳолӣ аёдат карда шуданд.
Тибқи Амри Президенти Ҷумҳурии Тоҷикистон таҳти №АП-495, аз 29 апрели соли 2015 ба иштирокчии Ҷанги Бузурги Ватанӣ дар шаҳри Қайроққум Воҳид Самадов бахшида ба 70-солагии Рӯзи Ғалаба дар Ҷанги Бузурги Ватанӣ 1500 сомонӣ кӯмакпулии яквақта таъин карда шуд.
Ба пешвози 70-солагии Иди Ғалаба байни дастаи синфҳои МТМУ-и №14 мусобиқаи футбол доир гардид. Дастаи «Ғалаба» бо бартарии зиёд нисбати ҳарифон мақоми аввалро ишғол намуд. Дастаҳои «Умед» ва «Истиқлол» соҳиби ҷойҳои дуюму сеюм шуданд. Озар Саодатдинов, Хайём Бойназаров, Шоҳназар Азизов, Шерзод Азимов, Баҳодур Боймирзоев, Идрис Азизов, Мубин Аҳмадқулов, Ҳасан ва Ҳусейн Латифовҳо чун беҳтарин бозингарон муаррифӣ гардиданд.
