28 Феврал 2022

Дар толори хурди Мақомоти иҷроияи ҳокимияти давлатии шаҳри гулистон семинари омӯзишӣ дастурдиҳӣ ҷиҳати дуруст ба роҳ мондани коргузорӣ ва риояи “Қоидаҳои имлои забони тоҷикӣ ва Аломатҳои китобати забони тоҷикӣ”, ки бо Қарори Ҳукумати Ҷумҳурии Тоҷикистон аз 30 июни соли 2021, №268 қабул гардидааст бо иштироки роҳбарон ва коргузорони шуъбаву бахшҳо, ҷамоати шаҳракҳо ва дигар соҳаҳои хоҷагии халқи шаҳр баргузор гардид.

Дар семинар роҳбари дастгоҳи Раиси шаҳр Искандар Муродов, мудири бахши умумӣ Гулбаҳор Алимова ва мутахассиси татбиқи забони Мақомоти иҷроияи ҳокимияти давлатии шаҳр Фаридуншоҳ Абдуллоев иштирок ва суханронӣ намуданд.

Роҳбари дастгоҳи Раиси шаҳр Искандар Муродов ҳадафи баргузории семинарро ба самъи иштирокдорон расонида, таъкид намуд, ки раванди ҳуҷҷатгузорӣ дар шуъбаву бахшҳо, ҷамоати шаҳракҳо ва ҳамаи ташкилоту муассисаҳо тақвият бахшида шавад.

Сипас, мудири бахши умумӣ Гулбаҳор Алимова ҷиҳати тақвияти раванди коргузорӣ ва дар ин замина таъмини гардиши доимии ҳуҷҷатҳои корӣ, иҷрои саривақтӣ ва босифати асноди назоратӣ, инчунин пешбурди назорати риояи талаботи марбут ба таҳияи дурусти ҳуҷҷатҳо аз ҷониби масъулин суханронӣ намуд.

Зикр гардид, ки бо мақсади пешбурди дурусти коргузорӣ бо қарори Ҳукумати Ҷумҳурии Тоҷикистон аз 28 июли соли 2017, №358 Дастурамали намунавии коргузорӣ дар мақомоти давлатӣ, муассиса, корхона ва дигар ташкилотҳои Ҷумҳурии Тоҷикистон тасдиқ гардида, ба аҳли ҷомеа дастрас гардидааст.

Ҳамчунин, доир ба тарзи таҳияи ҳуҷҷатҳо, роҳ надодан ба хатоҳо, дар бланки шакли ягонаи тасдиқшудаи идоравӣ таҳия намудани ҳуҷҷат,бо риояи ҳуруф, андоза ва  меъёри  муақарраргардида таҳия намудани ҳуҷҷатҳо, таваҷҷуҳи хоса зоҳир намудан ба мазмуну моҳияти ҳуҷҷатҳо, пешгирии ҳолатҳои ба тавои қалбакӣ гузоштани рақам ва санаҳои қаблии бақайдгирӣ ва сари вақт дастарс гардидани ҳуҷҷатҳо тиби тартиби муқарраргардида ба ҳозирин маълумот дода шуд.

Мутахассиси татбиқи забони Мақомоти иҷроияи ҳокимияти давлатии шаҳр Фаридуншоҳ Абдуллоев доир ба шарҳу тавзеҳи нуктаҳои муҳими “Қоидаҳои имлои забони тоҷикӣ ва Аломатҳои  китобати забони тоҷикӣ” бо воситаи муаррифӣ (презентатсия) ба иштирокдорон маълумоти муфассал дод.

Зикр гардид, ки Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар мулоқот бо зиёиёни кишвар дар таърихи 5-уми октябри соли 2019 доир ба таҳияи лоиҳаи нави “Қоидаҳои имлои забони тоҷикӣ” ба Кумитаи забон ва истилоҳоти назди Ҳукумати Ҷумҳурии Тоҷикистон дастур дода буданд. Бо ин мақсад Кумитаи забон ва истилоҳоти назди Ҳукумати Ҷумҳурии Тоҷикистон ба олимону донишпажӯҳони забоншинос доир ба баёни андешаву назарҳо доир ба таҳрири нави имло расман муроҷиат намуда буд. Дар тайи ду сол Кумитаи забон ва истилоҳот якҷо бо дигар вазорату идораҳо ва донишмандони соҳа лоиҳаи нави “Қоидаҳои имлои забони тоҷикӣ ва Аломатҳои  китобати забони тоҷикӣ”-ро омода намуда, ба Ҳукумати Ҷумҳурии Тоҷикистон пешниҳод намуд. Дар натиҷа лоиҳаи пешниҳодгардида дастгирӣ ёфта, бо қарори Ҳукумати Ҷумҳурии Тоҷикистон аз 30 июни соли 2021, №268 “Қоидаҳои имлои забони тоҷикӣ ва Аломатҳои  китобати забони тоҷикӣ” ба тасвиб расид. Сипас, нуктаҳои муҳими ва дар фаъолияти рӯзмарра зиёд дучоршаванда ба иштирокдорони семинар шарҳу тавзеҳ дода шуд.

Дар фарҷом ба иштирокдорон маводҳои таблиғотӣ тақсим карда шуд.