25 Январ 2016
22 январ дар шаҳри Қайроққум Рӯзи ягонаи ахбор доир шуд. Тарғибгарони Мақомоти иҷроияи ҳокимияти давлатии вилояту шаҳр ба ташкилоту корхона, Ҷамоати шаҳракҳо рафта оид ба мӯҳтавои асосии нуктаҳои Паёми Президенти Ҷумҳурии Тоҷикистон Эмомалӣ Раҳмон ба Маҷлиси Олии Ҷумҳурии Тоҷикистон дар назди ҷомеаҳои меҳнатӣ баромад намуданд.
Нахуст онҳо оид ба дастовардҳои хоҷагии халқи мамлакат дар ҳамаи самтҳо, талошу тараддудҳои роҳбарияти кишвар ҷиҳати боз ҳам баланд бардоштани иқтисодиёти ҷумҳурӣ, беҳбуди бахшидани рӯзгори мардум сухан гуфта, роҳҳои ҳаллу фасли мушкилиҳои феълӣ назари хешро баён намуда, аз нақшаҳои нави ободониву созандагӣ таваққуф карданд. Яке аз мушкилиҳои имрӯзи ҳаёти Тоҷикистон, ин норасоии қувваи барқ аст, ки дар ин самт соли 2016 дар ҳаҷми 300 мегаватт иқтидорҳои иловагии энергетикӣ ба истифода супорида мешавад, баробари ин дар давоми сол ба кор андохтани иқтидорҳои нави саноатиро дар ҳаҷми 350 мегаватт ба нақша гирифта шудааст.
Дигар аз масъалаҳои муҳим бо ҷои кор таъмин намудани аҳолӣ мебошад. Тибқи барномаҳои давлативу соҳавӣ беш аз 205 ҳазор ҷойи нави корӣ таъсис дода шудааст. Қайд гардид, ки солҳои 2016-2017 беш аз 300 ҳазор ҷойҳои нави корӣ таъсис ва барқарор карда шаванд.
Дар Паёмашон Президенти мамлакат як проблемаи доғи рӯз-масъалаи ятимонро ёдрас шуданд. Ба хубӣ огоҳ ҳастем, ки Ҷаноби Олӣ дар тамоми давраи фаъолияташон дар ҳаққи бенавоён, бепарасторон, тифлакони масъум ва ятимон ғамхорӣ зоҳир менамоянд, таъкид мекунанд, ки онҳо бенигоҳубин намонанд, аз ҳолашон пайваста бохабар бошем. Дасти навозишу меҳрубонӣ ба сари ятимону бепарасторон мебаранд. Борҳо ба мушоҳида расидааст, ки барояшон дастархон густурда, бо онҳо ҳамроҳ нишастаанд ва ба ҳарфашон гӯш додаанд.
Дар Паём, инчунин, баҳри осудаҳолӣ ва боз ҳам беҳтар гардидани сатҳи зиндагӣ тадбирҳо пешбинӣ шудаанд.
Ҳамаи ин мазмуну мундариҷаи Паёми навбатии Сарвари давлат аз тарафи тарғиботчиён ба аҳолӣ шарҳу эзоҳ дода шуд.
Гурӯҳи тарғиботии Мақомоти иҷроияи ҳокимияти давлатии вилоят таҳти сарварии Болтубой Юлдошев, директори ширкати давлатии суғурта дар вилояти Суғд ва Хайрулло Сабуров, декани факултаи педагогикаи ДД Хуҷанд, ба номи академик Б.Ғафуров, Алиҷон Одинаев, дотсенти кафедраи сиёсатшиносии Донишгоҳи давлатии ҳуқуқ, бизнес ва сиёсати Тоҷикистон дар назди кормандони тибби Маркази саломатӣ ва омӯзгорони МТМУ-и №1 оид ба ҳамаи паҳлӯҳои Паёми Президент баромадҳои пурмӯҳтаво доштанд.
Дар зиёда аз 40 муассисаю ташкилотҳои шаҳр Рӯзи ягонаи ахбори сиёсӣ дар сатҳи баланди ташкилӣ гузаронида шуд.