23 Январ 2018
Дар толори хурди мақомоти иҷроияи ҳокимияти давлатии шаҳр таҳти раёсати Раиси шаҳр Матлубахон Амонзода машварати корӣ баргузор гардид. Раиси шаҳр зимни баромади худ оид ба дастуру супоришҳои фардосози дар Паёми навбатии Пешвои миллат таъкидгардида, фаъолияти гурӯҳи корӣ оид ба тавзеҳи Паёми Сарвари давлат, вазъи андозу молия, фаъолияти корхонаҳои саноатӣ, кушодани коргоҳҳои нав, танзими омор, вазифаҳо дар соҳаи иҷтимоиёт, ташкили ҷойҳои нави корӣ, вазъи бозор, ташкили ярмаркаҳои фурӯши маҳсулоти кишоварзӣ сухан ронд.
Ба мутасаддиёни нуқтаҳои савдо ва бозорҳо ҷиҳати ҳалли камбудиҳои ҷойдошта, таъмини либоси ягона, воридоти маводи хушсифат, риояи қоидаҳои бехатарӣ ва танзими нарх супоришҳо дод. Ҳамзамон пурсиш аз фаъолияти зерсохторҳо ва ҷамоати шаҳракҳо ба вуқӯъ пайваста, зикр гардид, ки фаъолият аз ибтидои сол дар раванди эълони Соли рушди сайёҳӣ ва ҳунарҳои мардумӣ ва омодагӣ ба таҷлили 30-солагии Истиқлолияти давлатӣ густариш ва таҳким бояд дода шавад.
Раиси шаҳр дар мавриди истифодаи сарфакоронаи нерӯи барқ масъулинро оид ба тақвияти бурдани корҳои тарғиботӣ-ташвиқотӣ бо аҳолӣ, таъмини пардохти саривақтии истифодаи барқ аз тарафи корхонаву ташкилот ва аҳолии шаҳру шаҳракҳо муваззаф намуда, доир ба таҷлили ҷашни миллии иди Сада дастуру супоришҳои мушаххас дод.
Зимни машварати корӣ доир ба масъалаи ободонӣ ва хуррамгардонии шаҳр ва шаҳракҳои тобеъ Раиси шаҳр таваҷҷуҳи масъулинро доир ба гулкориву ниҳолшинонӣ, таъмиру тармими роҳҳои пиёдагарди кӯчаву маҳалҳо, тарҳи биноҳои истиқоматӣ, вазъи санитарӣ-эпидемиологии маҳалли зист ҷалб намуда, роҷеъ ба бунёди майдончаҳои варзишӣ ва бозии кӯдакон алоҳида вазифагузорӣ намуд. Аз ҷумла, масъулини корхонаву идораҳо, соҳибкорон муваззаф гардиданд, ки то ҷашни Наврӯзи байналмилал дар ҳудуди шаҳру шаҳракҳо дар назди майдонҳои биноҳои баландошёна сохтмон ва бунёди қариб 26 майдончаҳои варзишӣ ва бозии кӯдаконро дастҷамъона ба анҷом расонанд. Зимни ин вазифагузорӣ лоиҳаи нақшаи бунёди ин иншоот муаррифӣ карда шуд.
Дар машварати корӣ роҳбарони воҳидҳои сохтории мақомоти иҷроияи ҳокимияти давлатии шаҳр, раисони ҷамоати шаҳракҳо, корхонаву ташкилот ва соҳибкорон иштирок доштанд.
