01 Ноябр 2019
Имрӯзҳо сокинони мамлакат барои сазовор таҷлил намудани 25-солагии Конститутсияи Ҷумҳурии Тоҷикистон, ки он ба истилоҳи Пешвои муаззами миллат “қонуни асосии давлат, унсури марказии низоми ҳуқуқии кишвар, заминаи эҷод ва такмили минбаъдаи қонунгузорӣ, ҳуҷҷати созиши иҷтимоӣ, муайянсозандаи дурнамои пешрафти ҷомеа ва давлат” мебошад, омодагӣ мегиранд.
Тибқи нақшаи мақомоти иҷроияи ҳокимияти давлатии шаҳри Гулистон гурӯҳи тарғиботчиён дар тамоми муассисаву ташкилот, ҷамоати шаҳракҳо, корхонаҳо мулоқоту вохӯриҳо доир намуда, доир ба ин санади сарнавиштсози миллату давлати соҳибистиқлол баромадҳо мекунанд.
Чунин мулоқот дар муассисаи ғайридавлатии «Коллеҷи тиббӣ»-и шаҳри Гулистон доир гардид. Мудири бахши ҷавонон ва варзиши мақомоти иҷроияи ҳокимияти давлатии шаҳр Саидахон Аҳмадзода, устодони муассисаи таълимӣ Зебунисо Абдуҷабборова, Рашод Бақоев доир ба моҳият, мақом ва арзиши қонуни асосии Тоҷикистони соҳибистиқлол суханронӣ намуданд.
Зикр гардид, ки омӯзиши меъёрҳои Конститутсияи Ҷумҳурии Тоҷикистон гувоҳӣ аз он медиҳад, ки онҳо аз муқаррароти олии динӣ ва илмӣ сарчашма гирифта, тавъам ба фармудаҳои бузургони илму фалсафа мебошад. Аз ҷумла, мутафаккирон шаҳрвандонро таъкид намудаанд, ки инсон дар ҷамъияти инсонӣ зиста, озодии худро танҳо ҳамон вақт таъмин карда метавонад, ки агар худ итоатгари қонунҳои ҷамъият бошад. Фармудаҳои мутафаккирон ифодаи худро дар принсипҳои асосии давлати ҳуқуқбунёд, чун масъулияти дуҷонибаи давлату шаҳрвандон ва таъмини волоияти қонун, ки дар Конститутсия таҷассум ёфтааст, пайдо намудаанд.
Дар фароварди мулоқот тазаккур дода шуд, ки Конститутсияи мамлакат бо мақсади таъмини зиндагии шоиста ва сазовори ҷомеаи дунявӣ қабул гардида, то кадом дараҷа дар ҳаёти ҳаррӯза амалӣ шудани меъёрҳои он, ба ғайр аз фаъолияти бонизому самараноки мақомоти давлатӣ, инчунин ба рафтор, кирдор ва тарбияи ҳуқуқии ҳар як шаҳрванди баору номуси кишварамон вобастагии қавӣ дорад.
