20 Март 2020
Дар варзишгоҳи шаҳраки Консой бо иштироки намояндагони ҷамоати шаҳракҳо, корхонаву муассисаҳо ва кулли сокинони шаҳраки Консой таҷлили Иди умумишаҳрии Наврӯз-2020 ба вуқӯъ пайваст.
Дар оғоз дар хаймаҳои наврӯзӣ корхонаву муассиса ва ташкилотҳои шаҳраки нақбканон намоиши ҳунарҳои мардумӣ ва таомулу анъанаҳои ин иди бостониро манзури ҳамагон карданд. Ҳамчунин озмунҳои суманакпазӣ, омодасозии таомҳо, бойчечакхонӣ, бозиҳои миллӣ ва амсоли инро ба меҳмонону сокинон бо завқи баланд пешниҳод намуданд.
Сипас намояндаи Ҳукумати Ҷумҳурии Тоҷикистон, директори Агентии таъминоти амволи махсуси назди Ҳукумати Ҷумҳурии Тоҷикистон Савзаалӣ Назирзода, намояндаи мақомоти иҷроияи ҳокимияти давлатии вилоят, сардори Маркази стандартизатсия, метрология, сертификатсия ва нозироти савдои вилояти Суғд Маҳмадӣ Давлатов, Раиси шаҳри Гулистон Фирдавс Шарифзода ва директори генералии ҷамъияти муштараки “Апрелевка” Бахтиёр Маҷидов меҳмонон ва сокинони шаҳрро бо Соли нави миллӣ муборакбод намуданд. Зикр гардид, ки тавассути Истиқлолияти давлатӣ, сиёсати хирадмандонаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон имрӯз файзу баракати хоссаи иди бузургтарини аҷдодӣ ва миллӣ шукӯҳу шаҳомати тоза пайдо намудааст. Партави ин сиёсати фардосоз ба густариши оинҳои Наврӯзи Аҷам мусоидат карда, барои такомули худшиносиву худогоҳии миллӣ, ватандӯстиву ташаккули маънавият такони нерубахши худро эҳдо кардааст. Ҷавҳари таърихӣ ва фарњангии Наврӯзи байналмилалӣ саодати аҳли башар буда, инсонҳоро ба ҳамдигарфаҳмӣ ва ҳамзистии осоишта, накӯкориву созандагӣ, дӯст доштану эҳтиёт кардани табиат ва неъматҳои он ҳидоят менамояд.
Дар вазъи тантанавӣ ба ғолибони озмунҳои наврӯзӣ диплому туҳфаҳо ва ба собиқадорону пешоҳангони корхонаи ҶМТКММ "Апрелевка" мукофотпулиҳои наврӯзӣ супорида шуданд.
Сипас санъаткорони бахши фарҳанги шаҳр барномаи марғуби консертиро таҳти унвони “Нарӯзи ҷаҳонӣ муборак!” манзури ҳозирин намуданд.
