23 Феврал 2022
Дар рӯзҳои иду айём хабаргириву ҳолпурсии ашхосе, ки барои ҷомеа хизмат намудаанд, ба аъанаи нек табдил ёфта, гувоҳи равшани он аст, ки мардуми мо суннатҳои некро ҳамеша пос медоранд.
Дар партави сиёсати инсонпарваронаи Пешвои миллат муҳтарам Эмомалӣ Раҳмон ба муносибати таҷлили 29-умин солгарди таъсисёбии Рӯзи Қувваҳои Мусаллаҳи Ҷумҳурии Тоҷикистон иҷрокунандаи вазифаи Раиси шаҳри Гулистон Раъно Ҳошимзода собиқадорони меҳнат Ғайбулло Зайниддинов собиқадори соҳаи саноат ва Султонбердӣ Каримбердиев собиқадори соҳаи ҳифзи ҳуқуқро аёдат намуд.
Дар вақти суҳбат бо собиқадорон иҷрокунандаи вазифаи Раиси шаҳр таъкид намуд, ки меҳнати фидокоронаи пирони рӯзгор ҳамеша қадр шуда, фаъолияти бенуқсони онҳо мактаби бузург барои тарбияи насли ҷавон аст.
Иҷрокунандаи вазифаи Раиси шаҳри Гулистон 29-умин солгарди таъсисёбии Қувваҳои Мусаллаҳи Ҷумҳурии Тоҷикистонро ба собиқадорон ва аҳли оилаи онҳо табрик гуфта, барояшон маводҳои яквақтинаи ниёзи аввал тақдим намуд.
Собиқадорон аз дастгириҳои доимии давлату Ҳукумат изҳори сипос намуда, ба Президенти мамлакат муҳтарам Эмомалӣ Раҳмон миннатдорӣ баён карданд.
Ҳамчунин, аз ҷониби Мақомоти иҷроияи ҳокимияти давлатии шаҳр ва шахсони саховатманд ба шахсони ниёзманд ва собиқадорони соҳа кумаки иҷтимоӣ расонида шуд.
