01 Сентябр 2023
30 августи соли 2023 дар толори Кумитаи иҷроияи Ҳизби Халқии Демократии Тоҷикистон дар шаҳри Гулистон бахшида ба таҷлили 32-юмин солгарди Рӯзи Истиқлолияти давлатии Ҷумҳурии Тоҷикистон ва 30-юмин солгарди Рӯзи таъсисёбии Ҳизби Халқии Демократии Тоҷикистон ҳамоиш таҳти унвони “Истиқлолият-сарвати бебаҳои миллат”бо иштироки раиси Кумитаи иҷроияи Ҳизби Халқии Демократии Тоҷикистон дар вилояти Суғд Каримзода Мирзоқосим, раиси шаҳри Гулистон Раъно Ҳошимзода ва фаъолони Ҳизби Халқии Демократии Тоҷикистон баргузор гардид.
Ҳамоиш бо садо додани Суруди миллӣ оғоз гардид.
Нахуст, раиси Кумитаи иҷроияи Ҳизби Халқии Демократии Тоҷикистон дар шаҳри Гулистон Ҷамолиён Муслимахон меҳмононро хайрамақдам намуда, ҳадафи баргузории ҳамоишро ироа намуд.
Истиқлолият дастоварди муҳимтарин, бузургу бебаҳо ва таърихии миллати мо. Ормони чандинасраи фарзандони асилу огоҳ ва маҳсули талошҳои садҳо ҳазор муборизони роҳи бақои давлати тоҷикон мебошад.
Сипас, раиси Кумитаи иҷроияи Ҳизби Халқии Демократии Тоҷикистон дар вилояти Суғд Мирзоқосим Каримзода кулли фаъолони ҳизбро бо таҷлили 32-юмин солгарди Рӯзи Истиқлолияти давлатии Ҷумҳурии Тоҷикистон шодбош намуда, иброз дошт, ки мардуми Тоҷикистон ҳамасола Рӯзи Истиқлолияти давлатии кишварро ба хотири қадршиносиву арҷгузорӣ дар фазои бошукӯҳи идона таҷлил намуда, аз он ифтихор мекунанд, ки давлати соҳибистиқлолу соҳибихтиёр доранд.
Соҳибистиқлоливу соҳибватанӣ, мустақилият ва ихтиёри давлатдориро ба дасти худ гирифтан барои ҳар як миллат рӯйдоди воқеан сарнавиштсоз мебошад. Зеро ҳар кишвару миллате, ки тақдири имрўзу фардои давлат ва сарзамини худро дар ихтиёр дошта, барои сарнавишти шаҳрвандони худ ва беҳбудии рўзгори онҳо талош меварзад, насибадори саодати бузург мебошад.
Дар иддома, раиси шаҳри Гулистон Раъно Ҳошимзода суханронӣ намуда, зикр дошт, ки даврони Истиқлолият имкони воқеӣ фароҳам овард, ки роҳи имрӯзу ояндаи миллат ва пешрафти минбаъдаи кишвари азизамонро ба сӯи ҷомеаи демократӣ, ҳуқуқбунёд ва дунявӣ интихоб намоем. Истиқлолият барои мо рамзи олии Ватану ватандорӣ, бузургтарин неъмати давлатсозию давлатдории мустақил, кору пайкорҳои пайгиронаи созандагӣ, азму талошҳои фидокоронаи расидан ба истиқлолияти сиёсӣ, иқтисодӣ ва фарҳангиро омӯзонда, меъёрҳои ҷомеаи шаҳрвандиро таҳким бахшид ва дар як вақт ҳаёти озодонаи ҳар фард ва олитарин дараҷаи бахту саодати воқеии миллатро таъмин намуд. Истиқлолият барои мо нишони барҷастаи пойдории давлат, бақои симои миллат, рамзи асолату ҳувият, мазҳари идеалу ормонҳои таърихӣ, шиносномаи байналмилалӣ ва шарафу эътибори ба ҷаҳони мутамаддин пайвастани кишвари соҳибистиқлоли Тоҷикистон мебошад.
Ҳамзамон, зимни баргузории чорабинӣ иштирокчиёни озмуни “Фуруғи субҳи доноӣ китоб аст” Лоиқ Кенҷаев ва Маҳваш Бойматова бо маърӯза ва ” шеърҳо дар васфи Пешвои миллат, Истиқлоли давлатӣ, Тоҷикистон ва Ватан баромад намуданд.
Дар фарҷом, аъзоёни фаъоли ҳизб бо медали ҷашнӣ ва Сипосномаҳо қадршиносӣ гардида, ба аъзоёни тозаинтихоб шаҳодатномаҳои ҳизбӣ дар вазъияти тантанавӣ супорида шуд.
Ҳамоиш бо садо додани Суруди миллӣ ба итмом расид.
