22 Май 2024
Санаи, 16.05.2024 дар толори Кохи фарҳангии "Истиқлол"-и маркази шаҳр даври шаҳрии озмуни ҷумҳуриявии «Фурӯғи субҳи доноӣ китоб аст» оғоз гардид.
Дар маросими кушодашавии озмун муовини Раиси шаҳри Гулистон Шарифҷони Саидраҳмон иштирок ва суханронӣ намуд.
Зикр карда шуд, ки бо мақсади таъмини иҷрои Амри Президенти Ҷумҳурии Тоҷикистон, қарори Раиси вилояти Суғд ва дар заминаи он қарори Раиси шаҳри Гулистон аз 19-уми феврали соли 2024, №53 ба тасвиб расидааст.
Озмуни мазкур бо мақсади баланд бардоштани завқи китобхонӣ, тақвияти неруи зеҳнӣ, дарёфти чеҳраҳои нави суханвару сухандон, арҷ гузоштан ба арзишҳои миллию фарҳангӣ, инкишофи қобилияти эҷодӣ, таҳкими эҳсоси худогоҳию худшиносӣ, такмили захираи луғавӣ, тақвияти ҷаҳони маънавӣ миёни аҳолии кишвар, аз ҷумла хонандагони муассисаҳои таҳсилоти миёнаи умумӣ, хонандагон ва донишҷӯёни муассисаҳои таҳсилоти ибтидоӣ, миёна ва олии касбӣ, баъд аз муассисаҳои таҳсилоти касбӣ (магистрҳо, аспирантҳо, докторантҳо), омӯзгорони ҳамаи зинаҳои таҳсилот, ходимони илмию адабии муассисаҳои илмиву эҷодӣ, фарҳангу санъат, калонсолон, намояндагони касбу кори гуногун ва дигар табақаҳои аҳолии кишвар доир мегардад.
Мақомоти иҷроияи ҳокимияти давлатии шаҳри Гулистон барои баргузории озмуни мазкур таваҷҷуҳи хоса зоҳир менамояд.
Ҳамчунин теъдоди иштирокчиён сол аз сол зиёд гардида истодааст, ки ин аз рӯй овардани сокинон ба китобу китобхонӣ гувоҳӣ медиҳад. Соли қаблӣ дар даври шаҳрӣ беш аз 200 нафар иштирок намуда, 66 нафари онҳо дар даври вилоятӣ иштирок намуда соҳиби 4 ҷойи ифтихорӣ гардиданд ва аз онҳо 1 нафар дар даври ҷумҳуриявӣ соҳиби ҷойи сеюм гардид.
Изҳори итминон карда шуд, ки иштирокчиёни имсола бо омодагии ҷиддӣ ба озмун омадаанд ва ғолибони даври шаҳрӣ дар даврҳои вилоятиву ҷумҳуриявии озмуни мазкур шаҳри Гулистонро ба таври шоиста муаррифӣ намуда, дар даври ҷумҳуриявӣ соҳиби дастовардҳои арзанда мегарданд.
Сипас, озмун аз рӯйи ҳамаи бахшҳо ба кор оғоз намуд. Дар давоми ду рӯз беш аз 300 нафар довталабон аз рӯйи ҳамаи номинатсияҳои озмун иштирок намуда ҳунару истеъдоду маҳорати худро дар назди ҳайати ҳакамон нишон доданд. Тибқи натиҷагирии ҳайати ҳакамон ғолибон муайян гардида, ба даври сеюми озмун роҳ ёфтанд.
