01 Октябр 2025
Санаи 30.09.2025 Раиси шаҳри Гулистон Илҳом Пӯлотзода аз ҷараёни корҳои бунёдкорӣ, таъмиру азнавсозии маркази саломатии шаҳр ва сохтмони иншоти саноатӣ, аз қабили бунёди корхонаҳои навбунёди саноатӣ дар минтақаи саноатии шаҳр дидан намуд.
Нахуст аз раванди таъмиру азнавсозии маркази саломатии шаҳр дидан карда шуд.Иттилоъ дода шуд, ки маркази саломатии шаҳр дорои бинои 3 ошёна ва иборат аз 116 ҳуҷра мебошад. Бино соли 1989 сохта ба истифода дода шудааст. Дар маркази саломатии шаҳр 19 нафар табиб, 35 нафар ҳамшираи тиб, 9 нафар корманди хурди тиб ва 15 нафар кормандони дигар фаъолият мебаранд. Бино солҳои тулонӣ таъмири куллӣ нагардидааст.
Бо дастгирии мақомоти иҷроияи ҳокимияти давлатии шаҳр ба истиқболи Ҷашни 35-солагии Истиқлоли давлатии Ҷумҳурии Тоҷикистон бинои маркази саломатӣ пурра таъмиру азнавсозӣ гардида, бо таҷҳизоти замонавии тиббӣ муҷаҳҳаз гардонида мешавад.
Раиси шаҳр Илҳом Пӯлотзода зимни шиносоӣ аз ҷараёни корҳои таъмирӣ ба масъулин ҷиҳати бо сифати баланд ва дар вақти муқарраршуда ба анҷом расонидани корҳои таъмирӣ ва дастрас намудани таҷҳизоти зарурии тиббӣ дастур дод.
Сипас, аз рафти бунёди корхонаҳои саноатӣ аз ҷумла корхонаҳои ҶДММ "Парандаи заррин", коргоҳи сардхона дар заминаи ҶДММ "Товус" ва коргоҳи аз ҷониби соҳибкори инфиродӣ бунёд шудаистода дидан карда шуда, доир ба тақвияти корҳои созандагӣ ва дар муҳлати муайяншуда ба итмом расонидани корҳо супоришҳо дод.
Лозим ба зикр аст, ки тибқи нақшаи бунёду азнавсозии иншооти ҷашнӣ бахшида ба 35-солагии Истиқлоли давлатии Ҷумҳурии Тоҷикистон дар шаҳр 280 иншоот ба нақша гирифта шуда, то имрӯз 214 иншоот мавриди баҳрабардорӣ қарор дода шудааст, ки 76,4%-и нақшаи корҳоро дар ин самт нишон медиҳад.
