13 Август 2026
Дар доираи омодагиҳо ба таҷлили 35-солагии Истиқлоли давлатии Ҷумҳурии Тоҷикистон сокинону соҳибкорони ватандӯсти шаҳраки Адрасмон ба корҳои ободонию созандагӣ, аз ҷумла мумфаршкунии роҳҳо таваҷҷуҳи хоса зоҳир намуда истодаанд.
Раиси вилояти Суғд Раҷаб Аҳмадзода зимни сафари корӣ ба шаҳраки Адрасмони шаҳри Гулистон дар маъракаи мумфаршкунии роҳҳои кӯчаҳои марказии шаҳрак иштирок намуда, ба ташаббуси сокинону соҳибкорони маҳаллӣ баҳои баланд дод.
Раиси вилоят таъкид намуд, ки саҳми сокинон дар ободонии маҳал шоистаи таҳсин буда, чунин иқдомҳои созанда бояд минбаъд низ идома дода шаванд. Зеро ободии маҳал ва беҳтар гардидани шароити зиндагӣ аз ҳамдилию ташаббускории худи сокинон низ вобастагии зиёд дорад.
Тавре иттилоъ дода шуд, то имрӯз беш аз 700 метр роҳҳои кӯчаҳои марказии шаҳрак мумфарш гардида, тибқи нақша мумфаршкунии роҳҳо то охири сол идома меёбад.
Шаҳраки Адрасмон бо табиати зебову нотакрор ва имкониятҳои фаровони иқтисодию истеҳсолӣ дар марҳилаи нави рушд қарор дорад. Бо амалӣ гардидани тадбирҳои созанда ва рушди иқтидори саноатӣ дар ояндаи наздик шаҳрак метавонад ба яке аз маҳалҳои ободу пешрафта ва саноатии минтақа табдил ёбад.
Иқдомҳои созандаи сокинону соҳибкорони Адрасмон намунаи равшани ватандӯстӣ, масъулияти шаҳрвандӣ ва саҳмгузорӣ дар ободии Ватан буда, дар партави сиёсати созандаи Ҳукумати Ҷумҳурии Тоҷикистон ва ба истиқболи ҷашни 35-солагии Истиқлоли давлатӣ роҳандозӣ мешаванд.
