Семинар - машварат

Адрасмон. 24-уми августи соли ҷорӣ дар ин ҷо семинар-машварат бо иштироки зиёда аз 100 нафар андозсупорандагон гузаронида шуд.

Муовини сардори нозироти андози шаҳр Йигиталӣ Майнусов роҷеъ ба тартиби андозбандӣ, фаъолияти соҳибкорӣ тибқи патент, дар асоси шаҳодатнома ва ҳамчун шахси ҳуқуқӣ ҳарф зад. Инчунин дар бораи назорат ва санҷишҳои нозироти андоз мутобиқи боби 5, моддаҳои 28-42-и Кодекси андоз муфассал маълумот дод.

Соҳибкорон Абдуқодир Рўзиев, Асад Баротов, Сўҳроб Каримов, Орифҷон Муллоҷонов ва Барот Каримов ба саволҳои худ аз ҷониби намояндагони нозироти андоз посух гирифтанд.

«Нури маърифат»

Аз 1 то 31 август бо ҳадафи тадбиқи дастури Раиси ҲХДТ, Пешвои миллат Эмомалӣ Раҳмон сабқати «Нури маърифат» барои дастгирии хонандагони нодор гузаронида шуд. Дар сабқат вакилон, соҳибкорон, фаъолони ҲХДТ, сарварони ташкилоту корхонаҳо фаъолона ширкат варзиданд.

Ба 275 нафар эҳтиёҷмандон сарулибоси мактабӣ ва лавозимоти хониш супорида шуд. Вакилони Маҷлиси вакилони халқи вилоят Матлубахон Амонзода ва Бахтиёр Маҷидов аз беҳтарин саховатмандони сабқат буданд.

Дастовардҳо зиёданд, боз саъй мебояд

24-уми август дар Кохи Истиқлол машварати августии кормандони соҳаи маорифи шаҳри Гулистон бо иштироки Раиси шаҳр Матлубахон Амонзода ва намояндаи Раёсати маорифи вилоят Баҳоваддин Хоҷаев доир гардид.

Дар машварат андешаву гузоришҳо ва таҳлилу пешниҳодот оид ба мавзўи “Рушди маорифи шаҳр дар партави Паёми Асосгузори сулҳу ваҳдати миллӣ, Пешвои миллат, Президенти Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон аз 20-уми январи соли 2016” мавриди таҳлилу баррасӣ қарор гирифт.

Дастоварди “Геолог” дар Хоруғ

Рўзҳои 15-20-уми август дар шаҳри Хоруғи ВМКБ дар доираи чорабиниҳои ҷашнӣ ба истиқболи 25-солагии Истиқлолияти давлатӣ слёти VII геологҳои ҷавони кишвар баргузор гардид. Тибқи нақша дар равиши чорабинӣ озмун марбут ба илми геология таҳти унвони “Геология ва мо” гузаронида шуд.

Толибилмони МТМУ №8-и шаҳраки Сирдарё Очаой Содиқова, Мавҷуда Орзуқулова, Иқбол Фарҳодзода, Бузургмеҳр Фарҳодзода, Умед Кенҷаев, Шохрух Юлдошев, Хуршед Нарзуллоев, Азизҷон Деҳқонов таҳти роҳбарии омўзгор Маъбуд Раупов ва намояндаи экспедитсияи комплекси геологӣ Норалӣ Усмонов аз рўи 12 навъи шартҳои озмунӣ баромад карда, маърифати соҳаи геологиро назди иштирокдорон ва ҳайати ҳакамон хуб нишон доданд. Натиҷаи омодагии хуби дастаи “Геолог”-и шаҳри Гулистон буд, ки ҷойи дуюм насибашон гардид. Дастаҳои “Кристалл”-и шаҳри Душанбе мақоми аввал ва шаҳри Хоруғ ҷойи сеюмро ишғол намуданд.