22 Январ 2016
21 январ дар толори шуъбаи маориф ҷаласаи ҷамъбастии Шӯрои собиқадорони ҷангу меҳнати шаҳри Қайроққум доир гардид. Фаъолияти он дар соли 2015 мавриди баррасӣ қарор дода шуда, вазифаҳои Шӯро барои соли равон муайян гардиданд.
Доир ба фаъолияти Шӯро дар соли 2015 раиси Шӯрои собиқадорони ҷангу меҳнат Муҳаммадҷон Файзуллоев маърӯза кард. Изҳор гардид, ки ҳайати Шӯро баробари саҳм гузоштан дар рушди маънавии ҷомеа, тарбияи насли наврасу ҷавон ҳамзамон дар ташвиқу тарғиби сиёсати хирадмандонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, Ҷаноби Олӣ, муҳтарам Эмомалӣ Раҳмон ва бобати фаҳмонидани се ҳадафи стратегии давлату ҳукумати кишвар – таъмини истиқлолияти энергетикӣ, раҳоӣ аз бунбасти коммуникатсионӣ, амнияти озуқаворва иқдомҳои созандаи Сарвари давлат ҷиҳати таъмини зиндагии шоистаи мардум ҳиссагузор мебошад.
Аз рӯи масъалаи аввал мудири шуъбаи кор бо занони Кумитаи иҷроияи шаҳрии ҲХДТ Саёҳат Бадалова ва сардори шуъбаи манзили КДФ «Хоҷагии манзилӣ - коммуналии шаҳри Қайроққум» Абдурасул Қодиров ба музокира баромаданд.
Доир ба мавзӯи дуюми ҷаласа роҷеъ ба Паёми Президенти Ҷумҳурии Тоҷикистон Эмомалӣ Раҳмон ба Маҷлиси Олии кишвар раиси Шӯро М.Файзуллоев ҳарф зад.
-Махсусан, гуфтаҳои Сарвари давлатамон дар боби эътибори ҷиддӣ додани Ҳукумати Тоҷикистон ба масъалаи рушди ҳамаҷонибаи минтақаҳои мамлакат ва беҳтар намудани вазъи иҷтимоиву иқтисодӣ, бо мақсади амалӣ намудани сиёсати минтақавӣ, зиёд намудани музди маош ва нафақаи пиронсолон аз 1 июл бовариамонро ба ояндаи дурахшони Тоҷикистони азиз боз ҳам қавитар гардонид.
Муовини раиси Шӯрои собиқадорони ҷангу меҳнат Султон Каримбердиев, раиси кумитаи маҳалла Мирзошариф Шарифов аз иқдомҳои ватандӯстона ва ғамхориҳои дилсӯзонаи Президенти мамлакат Эмомалӣ Раҳмон, ки дар Паём зикр ёфтааст андешаронӣ намуданд.
Дар ҷаласаи ҷамъбастӣ раиси Шӯрои собиқадорони ҷангу меҳнати вилоят Муҳсин Раҳимов ва мудири шуъбаи рушди иҷтимоӣ ва робита бо ҷомеаи дастгоҳи Раиси шаҳри Қайроққум Мадализода Илҳоми Раҳим иштирок ва баромад намуданд.
