Мулоқоти Нуруллоҳ Оқилзода дар шаҳри Гулистон

Субҳи имрӯз дар  «Кохи  Истиқлол» -и шаҳри Гулистон мулоқоти вакили Маҷлиси намояндагони Маҷлиси Олии Ҷумҳурии Тоҷикистон аз ҳавзаи интихоботии № 18 Нуруллоҳ Оқилзода бо сокинони шаҳри соҳили баҳри тоҷик ,доир ба зарурати ворид намудани тағйиру иловаҳо ба Конститутсияи Ҷумҳурии Тоҷикистон , баргузор гардид.

Мулоқотро раиси шаҳри Гулистон Матлубахон Амонзода ҳусни оғоз бахшида, гуфт,ки  ворид гардидани тағйиру иловаҳо ба Конститутсияи Ҷумҳурии Тоҷикистон барои рушди бемайлони  соҳаҳои сиёсӣ, иқтисодӣ, иҷтимоӣ ва фарҳангии ҷомеа мусоидат намуда, имкон медиҳад, ки мунтазам сатҳу сифати зиндагии мардум баланд бардошта шавад.

Нуруллоҳ Оқилзода Вакили Маҷлиси намояндагони Маҷлиси Олии Ҷумҳурии Тоҷикистон зимни суханронӣ дар ин ҷамъомад гуфт,ки Тоҷикистон ҳамчун кишвари мутамаддин ва ҳуқуқбунёд бояд дар масири ҷомеаи ҷаҳонӣ қадамҳои устувор гузорад ва дар сатҳи байналмиллалӣ мавқеашро устувор созад.Аз ин ру зарурати ворид намудани тағйиру иловаҳо ба Конститутсияи Ҷумҳурии Тоҷикистон пеш омад ,ки татбиқи он боиси пешрафти кишвар ва беҳтаршавии сатҳи зиндагии мардум мегардад.

Иҷлосияи шашуми Маҷлиси вакилони халқи шаҳри Гулистон (даъвати панҷум)

27-уми апрели соли 2016 дар толори маҷлисгоҳи Мақомоти иҷроияи ҳокимияти давлатии шаҳри Гулистон иҷлосияи шашуми Маҷлиси вакилони халқи шаҳр (даъвати панҷум) доир гардид. Раиси Маҷлиси вакилони халқи шаҳри Гулистон Матлубахон Амонзода  кори иҷлосияро ифтитоҳ бахшид.

Баъди садо додани Суруди миллӣ вакилон котиботи иҷлосияро интихоб ва рўзномаи иҷлосияро иборат аз панҷ банд тасдиқ намуданд.

Аз рўи масъалаи аввал дар бораи иҷрои амри Президенти Ҷумҳурии Тоҷикистон аз 24-уми феврали соли 2016, №АП-681 дар бораи гузаронидани Мусобиқаи ҷумҳуриявӣ бахшида ба 25-солагии Истиқлолияти давлатии Ҷумҳурии Тоҷикистон дар байни шаҳрак, деҳа, маҳалла, хона ва оилаи намунавӣ ва «Оид ба рафти иҷрои қарори Раиси вилояти Суғд аз 11-уми апрели соли 2015, № 178 “Дар бораи эълон намудани 500 рўзи меҳнати зарбдор бахшида ба истиқболи 25-солагии Истиқлолияти Ҷумҳурии Тоҷикистон” дар шаҳри Гулистон Матлубахон Амонзода гузориши муфассал дод.

Омодагӣ ба маъракаи муҳим

Барои дар сатҳи баланд гузаронидани раъйпурсии умумихалқӣ оид ба “Тағйиру иловаҳо ба Конститутсияи (Сарқонуни)  Ҷумҳурии Тоҷикистон” дар шаҳри Гулистон корҳои омодагӣ рӯз то рӯз вусъат меёбад. Ҳавзаи раъйпурсии Гулистон №29 дар бинои шуъбаи Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон дар шаҳр, кӯчаи Истиқлол 61 “а” ҷой гирифтааст.

Ҳуҷҷатҳои зарурӣ таҳия, участкаҳои раъйпурсӣ муайян, барӯйхатгирии шаҳрвандоне, ки дар раъйпурсӣ иштирок мекунанд тартиб дода шуда, аъзоёни комиссияи участкавии раъйпурсӣ ташкил ва ҷараёни корҳои тарғиботӣ муташаккилона тибқи Қонуни Конститутсиони Ҷумҳурии Тоҷикистон “Дар бораи раъйпурсии Ҷумҳурии Тоҷикистон” ба роҳ монда шудааст. Теъдоди умумии иштирокчиён дар раъйпурсӣ 19 ҳазору 277 нафарро ташкил медиҳад. Онҳое, ки бори аввал дар ин маъракаи муҳими сиёсӣ иштирок менамоянд 329 нафар буда, шаҳрвандоне, ки дар муҳоҷирати меҳнатианд 2173 нафар мебошанд.

Боздиди Раиси шаҳр аз минтақаҳои саноатӣ

Дар даврони соҳибистиқлолии кишвар бевосита бо ибтикори Пешвои миллат, Президенти Тоҷикистон Эмомалӣ Раҳмон, ҷиҳати таъмини амнияти озуқаворӣ, ки дорои аҳамияти муҳими стратегист иқдомҳои зиёде роҳандозӣ шуда самар мебахшанд. Ва ин ҳадаф дар Паёми имсолаи Президенти Ҷумҳурии Тоҷикистон ба Маҷлиси Олии кишвар низ ҳамчун вазифаҳои аввалиндараҷаи яке аз се ҳадафҳои миллии эълонгардида таъмин намудани амнияти озуқавориву дастрасии аҳолӣ ба ғизои хушсифат ба таври равшан баён шудааст.

Ба хотири дар кадом сатҳ амалишавии дастуру супоришҳои Сарвари давлат 20-уми апрел Раиси шаҳри Гулистон Матлубахон Амонзода бо  фаъолияти се корхонаи истеҳсоли орди дар минтақаи саноатӣ ҷой гирифта аз наздик шинос шуд. Раиси шаҳрро дар ин сафари корӣ муовини Раиси шаҳр Ғайратҷон Оқилов, роҳбари дастгоҳи Раиси шаҳр Абдуаҳад Каримов, мудирони шуъбаю бахш ва дигар роҳбарони ташкилоту корхонаҳои масъул ҳамроҳӣ карданд.