07 Июн 2023
Имрӯз, 07.06.2023 дар қисми ҳарбии 45025-и Кумитаи ҳолаҳои фавқулода ва мудофиаи граждании назди Ҳукумати Ҷумҳурии Тоҷикистон дар вилояти Суғд маросими савгандёдкунии навдаъватшавандагон баргузор гардид.
Дар маросими мазкур муовини раиси Кумитаи ҳолаҳои фавқулода ва мудофиаи граждании назди Ҳукумати Ҷумҳурии Тоҷикистон , генерал майор Иброҳимзода Имомалӣ, Раиси шаҳри Гулистон Раъно Ҳошимзода, роҳбарон ва намояндагони мақомоти ҳифзи ҳуқуқ, шахсони масъули қисми низомӣ, волидайни наваскарон, донишҷӯёни коллеҷи тиббии шаҳри Гулистон ва хонандагони муассисаҳои таълимии шаҳр иштирок намуданд.
Маросими савгандёдкунии наваскарон бо пешниҳоди гузориш ва садо додани Суруди миллии Ҷумҳурии Тоҷикистон оғоз гардид.
Дар фазои тантанавӣ наваскарони қисми ҳарбии 45025-и Кумитаи ҳолаҳои фавқулода ва мудофиаи граждании назди Ҳукумати Ҷумҳурии Тоҷикистон дар вилояти Суғд савганди садоқат ба халқу Ватанро қабул намуданд.
Сипас, муовини раиси Кумитаи ҳолаҳои фавқулода ва мудофиаи граждании назди Ҳукумати Ҷумҳурии Тоҷикистон, генерал майор Иброҳимзода Имомалӣ ва Раиси шаҳри Гулистон Раъно Ҳошимзода суханронӣ намуданд.
Таъкид карда шуд, ки Қувваҳои Мусаллаҳи мо дар як давраи ҳассос арзи вуҷуд намуда, дар муддати на чандон тўлонӣ аз санҷишҳои ҷиддӣ гузашта, такомул ва обутоб ёфт. Ҳоло Қувваҳои Мусаллаҳи мо ҳамчун неруи тавоно, муҷаҳҳаз ва муташаккил амнияти давлат ва осоиши кишварро таъмин менамояд.
Таҳти сарварии хирадмандонаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба ташкил ва ба вуҷуд овардани заминаи сиёсиву ҳуқуқии сохтори ҳарбии ҷумҳурӣ муваффақ шудем. Маҳз туфайли ғамхории пайвастаи Пешвои муаззами миллат, Сарфармондеҳи Олии Қувваҳои Мусаллаҳ имрўз Артиши Миллии мо ба қувва ва сипари боэътимоди муҳофизкунанда табдил ёфтааст.
Ҳукумати мамлакат аз рӯзҳои нахустини таъсисёбии Қувваҳои Мусаллаҳ бо вуҷуди имкониятҳои ниҳоят маҳдуди иқтисодиву молиявӣ барои бунёди инфрасохтори низомӣ, таъсиси ҷузъу томҳои махсусгардонидашуда, таъмин кардани онҳо бо техникаву таҷҳизоти замонавӣ ва фароҳам овардани шароити зарурӣ барои хизмат ва зиндагӣ тамоми тадбирҳоро амалӣ намуд ва ин равандро имрӯз низ идома дода истодааст.
Хизмат ба Ватан пеш аз ҳама қарзи шаҳрвандӣ ва виҷдонии ҳар шаҳрванд мебошад.
Ба наваскарон барои хизмати софдилонаву садоқатмандона ба халқу Ватан, вафодор мондан ба савганди ҳарбӣ ва бо сари баланд ба итмом расонидани хизмати ҳарбӣ барори кор таманно карда шуд.
Баъдан модари наваскар ва як нафар навдаъватшаванда дар назди ҳозирин суханронӣ намуданд.
Сипас, муовини раиси Кумитаи ҳолаҳои фавқулода ва мудофиаи граждании назди Ҳукумати Ҷумҳурии Тоҷикистон , генерал майор Иброҳимзода Имомалӣ ва Раиси шаҳри Гулистон Раъно Ҳошимзода бо падару модарони наваскарон ҳамсуҳбат гардида, доир ба шарту шароити хизмати ҳарбӣ дар қисми ҳарбӣ ва аз дастгириҳои пайвастаи Ҳукумати кишвар доир ба ин соҳа ёдовар гардиданд. Волидайн аз вазъи қисми ҳарбӣ дидан намуданд.
Дар фарҷом санъаткорони бахши фарҳанги мақомоти иҷроияи ҳокимияти давлатии шаҳри Гулистон барномаи рангини фарҳангиро манзури сарбозону афсарон намуданд.
Ҳамчунин, дар ин рӯз барои сарбозон дастархони идона ороста шуд.
