10 Октябр 2023
Имрӯз, 10.10.2023 тибқи нақшаи тасдиқгардидаи Мақомоти иҷрояи ҳокимияти давлатии вилояти Суғд ва Ҳаракати ҷамъиятии Ваҳдати миллӣ ва эҳёи Тоҷикистон дар вилояти Суғд дар Муассисаи ғайридавлатии “Коллеҷи тиббии шаҳри Гулистон” вохӯрӣ таҳти унвони “Хурофоту бегонапарастиро маҳкум менамоем” ва вусъати даъвати ҷавонон ба хизмати Ватан-Модар бахшида ба Рӯзи Конститутсияи Ҷумҳурии Тоҷикистон бо иштироки донишҷӯён баргузор карда шуд.
Дар вохӯрии мазкур Фаридуншоҳ Абдуллоев мудири шуъбаи рушди иҷтимоӣ ва робита бо ҷомеаи дастгоҳи Раиси шаҳр, Миркамолов Маҳкам намояндаи Ҳаракати ҷамъиятии Ваҳдати миллӣ ва эҳёи Тоҷикистон дар вилояти Суғд ва Раҳимова Хайринисо собиқадори соҳаи фарҳанг иштирок ва суханронӣ намуданд.
Зикр карда шуд, ки хурофотпарастӣ ва ё хурофотзадагӣ ҷузъи рафтории қишрҳоест, ки ба бунбасти тафаккури танг ва худшефтагии таассубвор гирифтор шуда, бо мушкилтарошӣ ва монеаэҷодкунии сунъӣ ва сохта ҳаракати ҷомеаро бозмедоранд. Аз лиҳози мантиқӣ, «хурофот» маънои эътиқоди шахшуда ва одатшудаи дурӯғин мебошад, ки дорандаҳои ин тарзи бархӯрдро ба мавқеъгириҳои гӯё «ҳақбаҷонибона» муттаҳид кардааст. Яксӯбинӣ хислати афроди хурофотпараст аст, ки дорандаҳои ин хусусияти зишти рафториро дар ботлоқи андешаи ботил ва амали нораво андохта, маҷоли пешравиро ба онҳо намедиҳад.
Бояд дар назар дошт, ки хурофоту хурофтпарастӣ аз мавқеи дини мубини Ислом шадидан маҳкум шудааст. Хурофот андешаву ақидаест, ки на асоси динӣ дорад ва на асоси илмӣ. Як бовару хаёли кӯркӯрона асту халос.
Ҳамчунин, доир ба пешгирии бегонапарастӣ ва ҷалби ҷавонон ба хизмати ҳарбӣ суханронӣ карда шуд.
