13 Май 2024
Дар толори қасри фарҳанги шаҳраки Адрасмони шаҳр чорабинии тантанавӣ бахшида ба Рӯзи оила баргузор гардид.
Дар чорабинии мазкур мудири бахши кор бо занон ва оилаи МИҲД-и шаҳр Матлуба Сатторова, мудири бахши кор бо ҷавонон ва варзиши шаҳр Аҳлиддин Абдураҳмонов, мутахассиси татбиқи забон дар МИҲД-и шаҳр Фаридуншоҳ Абдуллоев, мутахассиси бахши кор бо ҷавонон ва варзиши шаҳр Замира Исматзода ва раиси Ҷамоати шаҳраки Адрасмон Сарҳад Баротзода иштирок намуданд.
Мудири бахши кор бо занон ва оилаи мақомоти иҷроияи ҳокимияти давлатии шаҳр Матлуба Сатторова номаи табрикотии Раиси шаҳри Гулистон Раъно Ҳошимзодаро ба самъи иштирокдорон расонид. Зикр карда шуд, ки оила дар фарҳанги куҳанбунёди тоҷик ҳамчун ниҳоди муқаддас эътироф гардидааст, зеро беҳтарин арзишҳои инсонӣ, аз қабили муҳаббату садоқат, самимияту вафодорӣ ва ҳамдигарфаҳмиву таҳаммулгароӣ маҳз дар оила ташаккул меёбад. Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон таъкид намудаанд, ки: "Масъалаҳои маърифати оиладорӣ, баланд бардоштани масъулияти падару модарон дар таълиму тарбияи фарзанд, омода кардани фарзандон ба ҳаёти мустақилона ва пойдории оила аз ҷумлаи проблемаҳое мебошанд, ки диққати доимии тамоми мақомоти давлатӣ, муассисаҳои таҳсилотӣ ва кулли аъзои ҷомеаро тақозо мекунад".
Раиси Ҷамоати шаҳрак Сарҳад Баротзода низ иштирокчиён ва сокинони шаҳракро ба муносибати Рӯзи оила муборак бод гуфт.
Дар чорабинии мазкур оилаҳои намунавии шаҳраки Адрасмон иштирок намуданд.
Оилаҳои намунавӣ доир ба паҳлуҳои гуногуни оиладорӣ сухан намуда таъкид намуданд, ки дар зиндагӣ сабру таҳаммул ва ҳамдигарфаҳмӣ оиларо ба хушбахтӣ мерасонад.
Санъаткорони шаҳрак ва хонандагони муассисаҳои таълимӣ барномаи рангини фарҳангиро манзури иштирокдорон намуданд.
Ба оилаҳои намунавии шаҳрак туҳфаҳои хотиравӣ тақдим карда шуд.
