07 Август 2025
Раиси шаҳри Гулистон Илҳом Пӯлотзода бо мақсади шиносоӣ бо вазъи фаъолияти шуъбаи маорифи шаҳр, бойгонии байниидоравӣ, кумитаи замин ва маркази бехатарии озуқаворӣ дар шаҳр ба макони фаъолияти онҳо ташриф овард.
Нахуст аз бойгонии байниидоравии ҳайати шахсии назди Мақомоти иҷроияи ҳокимияти давлатии шаҳр дидан карда шуд.
Иттилоъ дода шуд, ки дар бойгонии байниидоравии ҳайати шахсии шаҳр 37 хазина бо 42595 парванда нигоҳдорӣ мешаванд.
Бойгонии байниидоравии ҳайати шахсии мақомоти иҷроияи ҳокимияти давлатии шаҳр баҳри иҷрои қарори Ҳукумати Ҷумҳурии Тоҷикистон дар ин самт аз 04.05.2000, №203 тадбирҳои зарурӣ андешида, корҳои заруриро ба сомон расонида истодааст.
Сипас, аз фаъолияти шуъбаи моарифи мақомоти иҷроияи ҳокимияти давлатии шаҳр дидан карда шуд.
Иттилоъ дода шуд, ки дар шуъбаи маорифи шаҳр 22 нафар кору фаъолият доранд. Барои фаъолияти он 14 ҳуҷраи корӣ дар бинои мазкур фароҳам оварда шудааст ва ҳамчунин ду маркази зерсохтори шуъба – Маркази дарёфт ва рушди истеъдодҳои назди шуъба ва Маркази технологияи комуникатсионии назди шуъба низ дар ин ҷо кору фаъолият доранд.
Сипас, Раиси шаҳр Илҳом Пӯлотзода бо фаъолияти маркази бақайдгирии молу мулки ғайриманқул, кумитаи замин ва маркази бехатарии озуқаворӣ дар шаҳр дидан намуд.
Дар охир Раиси шаҳр Илҳом Пӯлотзода ба масъулин ҷиҳати тақвияти корҳо ва таъмири ҳуҷраҳои корӣ ва фароҳам овардани шароити беҳтари корӣ дастур дод.
