02 Сентябр 2019
Раиси шаҳри Гулистон Фирдавс Шарифзода ба муассисаи таҳсилоти миёнаи умумии рақами 1-и маркази шаҳри Гулистон ба ифтихори рӯзи Дониш ва дарси сулҳ ташриф овард.
Дар саҳни мактаби номбурда ҷамъомади ботантанаи омӯзгорон, хонандагон ва волидайни онҳо ба вуқӯъ пайваст. Намояндаи Мақомоти иҷроияи ҳокимияти давлатии вилояти Суғд, директори маркази “Тоҷикстандарт дар вилоят Муҳаммадӣ Давлатов номаи шодбошии Раиси вилояти Суғд Раҷаббой Аҳмадзодаро ба муносибати Рӯзи Дониш ва дарси Сулҳ манзури иштирокчиёни ҳамоиш намуд. Раиси шаҳри Гулистон Фирдавс Шарифзода омӯзгорон ва маткабиёнро бо оғози соли нави таҳсил табрик кард.
Зикр гардид, ки давлати соҳибистиқлоли мо дар партави сиёсати маорифпарваронаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон пайваста ба инкишофи илму маърифат, такомули раванди таълиму тарбия ва баланд бардоштани сатҳи маънавиёти ҷавонон ғамхорӣ зоҳир менамояд. Дар сиёсати давлат соҳаи маориф ҳамчун соҳаи афзалиятнок арзёбӣ гардида, баҳри баланд бардоштани маърифатнокии ҷомеа ва беҳтар намудани ҳифзи иҷтимоии кормандони соҳа мунтазам тадбирҳо андешида мешаванд. Пешвои муаззами миллат дар суханрониҳои худ пайваста таъкид менамоянд, ки соҳаи илму маориф дар кишвар ҳамчун яке аз самтҳои калидӣ боқӣ монда, Ҳукумати Тоҷикистон барои рушди он тамоми имконияти худро истифода мебарад ва маблағгузории соҳаро ҳамасола ба таври назаррас афзоиш медиҳад.
Сипас Раиси шаҳр ҳамроҳи меҳмонон аз синфхонаҳои дабистон дидан намуда, бо устодон ва хонандагон суҳбати ошкоро намуданд.
Баъдан Раиси шаҳр бо меҳмонон ҳамроҳи омӯзгорону хонандагон дар маҷлисгоҳи муассиса дарси Сулҳи Асосгузори сулҳу ваҳдати миллӣ, Пешвои муаззами миллат муҳтарам Эмомалӣ Раҳмонро тамошо намуданд.
Дар 14 муассисаҳои таҳсилоти миёна, гимназияи ба номи академик Бобоҷон Ғафуров ва Коллеҷи тиббии шаҳр низ чунин ҷамъомадҳо ва тамошои мустақими дарси Сулҳ муташаккилона баргузор гардид.