16 Сентябр 2019
Дар толори Маркази саломатӣ шаҳри Гулистон семинар-машварат бо иштироки мутахассиси Маркази ҷумҳуриявӣ оид ба ВНМО Моҳҷон Бобиева ва мутахассиси БПНМ-и вилояти Суғд Азиза Ниёзметова баргузор гардид. Дар семинар-машварат мутассадиёни соҳаи тиб аз шаҳракҳо, кормандони маориф, мутахассисони САҲШ, табибони сироятшинос, кормандони маркази назорати санинатарию эпидемиологии шаҳри Гулистон иштирок намуданд.
Семинар-машваратро бо сухани ифтитоҳӣ сартабиби беморхонаи марказии шаҳр Гулсанам Пӯлодиён оғоз намуда, оид ба ташаккули тарзи ҳаёти солим, оид ба пешгирии бемории вируси норасоии масъунияти одам ва бемории гепатити В, С ва роҷеъ ба Барномаи миллӣ оид ба ВНМО дар байни аҳолӣ суханронӣ намуд.
Сипас зимни баромади худ мутахассиси маркази ҷумҳуриявӣ оид ба ВНМО Моҳҷон Бобиева таъкид кард, ки бо мақсади паст намудани шиддати паҳншавии сирояти ВНМО дар ҷумҳурӣ ва расондани хизматрасониҳои тиббию иҷтимоӣ ба ниёзмандон ин барномаи миллӣ қабул гардидааст. Ҳадафи асосии барномаи мазкур дастрасии аҳолӣ ба хизматрасониҳои босифат оид ба пешгирӣ, табобат, нигоҳубин ва дастгирӣ вобаста ба сирояти ВНМО мебошад. Дар семинар-машварат инчунин Кенҷаой Исобоева – сарвари маркази ташаккули тарзи ҳаёти солим, Вафо Бобокалонов – табиби сироятшинос, Гавҳар Исоева-собиқадори соњаи тиб, Ораз Мирзовалиев – шахси мутассади оид ба ташаккули тарзи ҳаёти солимӣ шаҳраки Адрасмон баромад намуданд. Дар охир суҳбати озод оид ба масъалаи матраҳгардида доир шуд.