21 Сентябр 2015
Фарорасии Рӯзи муборак ва фархундаро, ки ба номи қофиласолори адабиёти тоҷику форс-устод Абуабдуллоҳи Рӯдакӣ дар тақвими навини миллати мо аз баракоти соҳибистиқлолии Тоҷикистони азиз сабт шудааст, ба тамоми мардуми шарифи шаҳр самимона таҳният гуфта, бароятон саодати рӯзгор, тавфиқу сарбаландӣ ва дастовардҳои нек таманно менамоям.
Тавре, ки Президенти Ҷумҳурии Тоҷикистон, Ҷаноби Олӣ, муҳтарам Эмомалӣ Раҳмон таъкид намудаанд: «Рӯзи Рӯдакӣ на танҳо иди бургдошти сардафтари адабиёти оламгири тоҷику форс, балки иди мероси адабию илмӣ, фаннӣ ва ахлоқии беш аз ҳазорсолаи тамаддуни миллати мост».
Донишмандон бар он боваранд, ки устод Рӯдакӣ на танҳо асосгузори адабиёти классикии тоҷику форс, балки мояи ҳувияти миллӣ ва боиси ифтихори тоҷикон аст, зеро ашъори шоир дар ҳама давру замон появу рушди адабиёти тоҷик буда, омили инкишофи забону фарҳанги тоҷикон гардидааст.
Миёни донишмандон Абуабдуллоҳи Рӯдакӣ бо унвонҳои Одамушшуаро, Султони мулки сухан, Соҳибқирони шоирон, Маликушшуаро, Сардафтари шеъри ноби тоҷику форс ёд мешавад. Осори адабии падари шеъри тоҷикӣ дар баланд бардоштани эҳсоси ватандӯстӣ ва ваҳдату ҳамбастагӣ нақши бузург мебозад. Ин аст, ки ҳоло дар Тоҷикистон бо арҷгузорӣ аз ин шахсият ба ноҳия, марказҳои паҷуҳишӣ, донишгоҳ, муассисаҳои илмӣ ва фарҳангӣ, мактабҳо ва кӯчаҳо номи устод Рӯдакӣ гузошта шудааст. Инчунин як ҷоизаи давлатӣ низ ба номи ӯ вуҷуд дорад.
Шеъру андешаҳои пурҳикмати устод Рӯдакӣ имрӯзу фардо тарбиятгари ҷомеаи башарӣ ба сӯи арзишҳои олии инсонӣ ва ҳидоятгари ҷаҳони муосир ба самти созандагиву офарандагӣ хоҳад монд.
Бо чунин ниятҳои нек бори дигар фарорасии Рӯзи Рӯдакиро ба тамоми мардуми шарифи шаҳрамон сидқан таҳният гуфта, орзуманди он ҳастам, ки то ҷовидонаҳо каломи ин абармарди нотакрор дар таърихи миллати тоҷик навозишгари рӯҳу ҷонҳо бимонад.
Рӯзи Рӯдакӣ муборак, ҳамдиёрони азиз!
