16 Ноябр 2021
16 ноябри соли 2021 дар толори Кохи фарҳангии “Истиқлол”-и шаҳри Гулистон чорабинии тантанавӣ бахшида ба Рӯзи Президенти Ҷумҳурии Тоҷикистон баргузор гардид. Чорабинии тантанавӣ бо садо додани Суруди миллӣ шурӯъ гардид. Раиси шаҳр Бахтиёр Саидаҳмадзода ҳамагонро бо Рӯзи Президенти Ҷумҳурии Тоҷикистон муборакбод намуд. Раиси шаҳр иброз дошт, ки бо як ҷаҳон ихлосу самимият ва эҳтироми бепоён аз сиёсати хирадмандона ва дурбинонаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон тамоми мардуми саодатманди шаҳрро бо Рӯзи Президенти Ҷумҳурии Тоҷикистон сидқан муборакбод менамоям.
Таҷлили Рӯзи Президенти Ҷумҳурии Тоҷикистон нишони садоқат ва муҳаббати бепоёни мардуми сарбаланди Тоҷикистон ба Пешвои маҳбуби миллат мебошад, зеро ба шарофати сиёсати оқилонаву ҳадафмандона ва ояндасози Пешвои муаззами миллат Тоҷикистони соҳибистиқлол дар роҳи бунёди давлати демократӣ, ҳуқуқбунёд, дунявӣ ва ягона қадамҳои устувор гузошта, рушди босуботи мамлакат таъмин гардидааст.
Зикр гардид, ки боиси ифтихору сарбаландист, ки имрӯз ҷаҳониён Тоҷикистони азизи моро чун кишвари соҳибтамаддуну соҳибфарҳанг ва дорои таърихи куҳан, тавассути ташаббусҳо ва хизматҳои беназири Пешвои миллат чун миллати эҷодкору созанда мешиносанд ва ба мақому нуфузи Тоҷикистон дар раванди созандагӣ ва пешрафти ҷаҳони муосир арҷ мегузоранд.
Дар раванди ишора ба дастовардҳои бузурги даврони истиқлолият қайд карда шуд, ки натиҷаҳои заҳмати шабонарӯзии Президенти Ҷумҳурии Тоҷикистон натанҳо манфиати ин марзи муқаддас аст, балки барои минтақа ва ҷаҳон низ баҳои беназир доранд. Натиҷаи ҳамин ташаббусҳо ва талошҳои Пешвои муаззами миллат буд, ки борҳо бо унвонҳои ифтихори сарфароз гардидаанд. Аз ҷумла санаи 6-уми августи соли 2021 дар вохӯрии машваратии сарони давлатҳои Осиёи Марказӣ ва бо Қарори муштараки роҳбарони ин давлатҳо барои хизматҳои шоиста дар рушди муносибатҳои дӯстӣ, ҳамсоягии нек, ҳамдигарфаҳмӣ ва ҳамкории давлатҳои Осиёи Марказӣ, таҳкими сулҳу амният дар минтақа, пешбурди манфиатҳо ва ташаббусҳои муштараки кишварҳои минтақа дар арсаи байналмилалӣ нахустин мукофоти олӣ – “Нишони фахрии сарони давлатҳои Осиёи Марказӣ” дар вазъияти тантанавӣ ба Президенти Ҷумҳурии Тоҷикистон, Ҷаноби Олӣ муҳтарам Эмомалӣ Раҳмон супорида шуд.
Дар қисмати бадеии чорабинӣ санъаткорони шаҳри Гулистон ва овозхонони машҳури вилоят бо суруду оҳангҳои зебо табъи ҳозиринро шод гардониданд.
