ПАЙМОНИ ХИЁНАТПЕШАГОН

Шахси нотавонбин дар ҳама давру замон дар ҷомеа табақаи манфуртарин маҳсуб меёбад. Имрӯз бори дигар наҳзатиён ниқоби рӯяшонро нисбати зодбумашон ба ҷаҳониён кушоданд. Онҳо бо истифода аз минбари мамолики ғарб, ки худро ҳомии демократия меҳисобанд (маҳз манфиатҷӯиҳои ғарбиён аст, ки боиси ватангадо шудани миллионҳо одамон аз Африқову Осиё гардидаанд), ба унвони Тоҷикистони соҳибистиқлол носазогӯиҳоро раво мебинанд.

Аслан агар ба фаъолияти он нафароне, ки дар зери эъломияи бо ном Паймони миллии Тоҷикистон имзо гузоштаанд шурӯъ аз Муҳиддин Кабирӣ, Алим Шерзамонов, Шарофиддин Гадоев, Темур Варқӣ, Сайидюнуси Истаравшанӣ ва Илҳом Ёқубов назар афканем, маълум мегардад, ки онҳо ҳамагӣ пасмондаҳои ҳамон “наҳзати қалбакии кори одамон”-и гумроҳанд. Инҳо ҳамон куҳнаандешони гумроҳанд, ки мехоҳанд ниқоби нав, яъне ниқоби бо ном демократия ва озодиро ба бар кунанду чанд тан ҷавононро ба сафҳои нопокашон ва гурӯҳҳои террористиашон шомил намоянд. Магар инҳоро озодандешу, паймонкор ва созмонкор гуфтан мумкин аст? Албатта не! Зеро ин тоифа аз асп фарояд ҳам аз узанги намефарояд. Кадом одами дилсиёҳ ва кинапарвар дигар шудааст? Худ қазоват кунед, ки ин “паймончиҳо” солҳои навад ба сари мо чи бадбахтиҳоро сарбор карда, худашон думашонро хода карда дар мамлакатҳои бо ном “демократиясозу демократияпарвар” бо садақаи хоҷагони дурӯяву ҳангомапарварашон аз дур истода, дар мавриди ба худ муносиб ба боғи сарсабзу пурсамари меҳани азизамон сангпартоӣ мекунанд. Нобакорӣ аз ин зиёд намешавад. “Хар ҳамон туқумаш дигар”.

Кумак ба марди деҳқон

Рӯзҳои истироҳат беш аз 150 нафар кормандони мақомоти иҷроияи ҳокимияти давлатии шаҳри Гулистон идораву ташкилотҳо, муассисаҳои соҳаи маориф, тандурустӣ барои ёрӣ расонидан ба деҳқон ба ҳашари пахтачинӣ баромаданд.

Ҳашарчиён дар пахтазори хоҷагии ҳамҷавори деҳқонии ба номи Қӯшатови ноҳияи Бобоҷон Ғафуров дар ҷамъоварии ҳосили пахта кумак карданд. Онҳо беш аз 3 тонна ҳосил ҷамъ оварда, ба хирмани умумии ноҳия саҳми сазовор гузоштанд.

ҲИЗБИЁН ДАР ПАХТАЗОР

Кормандони кумиҷроияи шаҳрии ҲХДТ ба ноҳияи Ашт сафар намуда, як рӯзи кори худро барои беталаф ҷамъ овардани «тиллои сафед» дар ҳашари пахтачинӣ гузарониданд.

Дар ин давраи муҳими марди деҳқон алҳол дар майдони пахтазори ноҳияи Ашт беш аз 137 нафар ҳашарчиён аз корхонаву муассиса ва ташкилотҳои шаҳр сафарбар карда шуданд. Ҳизбиён дар танаффуси нисфирӯзӣ бо ҳашарчиён мулоқот доир намуда, раиси кумиҷроияи шаҳрии ҲХДТ Муслимахон Ҷамолиён чинакчиёни пешқадамро бо дастовардҳо меҳнатиашон табрик намуд.

Пешвои миллат Эмомалӣ Раҳмон бо кормандони соҳаи саноат мулоқот намуданд

14 октябр дар Кохи Борбад мулоқоти Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо коргарони соҳаи саноати ҷумҳурӣ баргузор гардид.

Ҳадафи мулоқот таҳлили вазъи воқеии соҳаҳои иқтисоди миллӣ, бахусус бахши саноат, баррасии масъалаҳои ҳалталаби соҳа, дарёфти роҳҳои рушди он тавассути воридоти технологияҳои навтарин, истеҳсоли маҳсулоти рақобатпазир, тақвияти иқтидори содиротии мамлакат, таъсиси ҷойҳои нави корӣ ва мусоидат кардан ба татбиқи ҳадафи чоруми стратегии мамлакат — саноатикунонии босуръати ҷумҳурӣ мебошад.

Президенти мамлакат муҳтарам Эмомалӣ Раҳмон бо таҳлилҳои амиқи вазъи соҳаи саноат давоми солҳои соҳибистиқлолӣ, дар амал ҷорӣ кардани ислоҳоти соҳаҳо, барномаҳои давлатӣ ва сармоягузорӣ ба иқтисоди миллӣ суханронӣ карда, барои рушду пешрафти мамлакат, таъсиси корхонаҳои истеҳсоли маҳсулоти ватании ивазкунандаи воридот, ба шуғл фаро гирифтани сокинон ба Ҳукумати ҷумҳурӣ, Вазорати саноат ва технологияҳои нав, мақомоти иҷроияи ҳокимияти давлатии шаҳру ноҳияҳо ва дигар сохторҳои марбута дастуру супоришҳо доданд.