Пешвои миллат Эмомалӣ Раҳмон лоиҳаи Қонуни Ҷумҳурии Тоҷикистон «Дар бораи авф»-ро ба Маҷлиси намояндагони Маҷлиси Олии Ҷумҳурии Тоҷикистон пешниҳод намуданд

16 октябр Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон бо истифода аз ҳуқуқи конститутсионии худ, дар асоси принсипи инсондӯстонаи қонунгузории Ҷумҳурии Тоҷикистон ва ба муносибати 25-умин солгарди қабули Конститутсияи Ҷумҳурии Тоҷикистон лоиҳаи Қонуни Ҷумҳурии Тоҷикистон «Дар бораи авф»-ро барои баррасии ба Маҷлиси намояндагони Маҷлиси Олии Ҷумҳурии Тоҷикистон пешниҳод карданд.

Дар лоиҳаи Қонуни мазкур аз ҷавобгарии ҷиноятӣ ва ҷазо озод намудани шахсоне, ки парвандаҳои ҷиноятӣ нисбат ба онҳо дар баррасии мақомоти таҳқиқ, тафтишоти пешакӣ ё судҳо қарор доранд ё дар асоси ҳукми судҳо адои ҷазо карда истодаанд, пешбинӣ гардидааст.

ВОХӮРИИ МУФИД

Дар гимназияи ба номи академик Бобоҷон Ғафурови маркази шаҳри Гулистон вохӯрии гурӯҳи кории мақомоти иҷроияи ҳокимияти давлатии шаҳр, намояндагони ташкилотҳои ҷамъиятӣ ва мақомоти қудратӣ бо хонандагон ва омӯзгорони ин таълимгоҳ ба вуқӯъ пайваст.

Дар мулоқот масоили мубрами рӯз пешгирии ҷинояткорӣ ва ҳуқуқвайронкунӣ дар байни наврасону ҷавонон, шомилшавии онҳо ба аҳзобу ҳаракатҳои ифтротгаро, зуҳуроти номатлуб дар ҷомеа,  масъулияти волидайн ва фарзандон, тарғиби тарзи ҳаёти солим, интихоби касби дӯстдошта ва монанди ин матраҳ гардиданд.

Дар назди ҳозирин мудири бахши ҷавонон ва варзиш Саидахон  Аҳмадзода, мудири бахши САҲШ Наргис Маҳмудзода, раиси кумитаи иҷроияи ҲХДТ дар шаҳри Гулистон Муслимахон Ҷамолиён, котиби масъули комиссияи ҳифзи ҳуқуқи кудаки мақомоти иҷроияи ҳокимияти давлатии шаҳр Матлуба Сатторова, менеҷери муассисаи кумаки аввалияи тиббию санитарӣ Гулшан Мадаминова ва нозири калони гурӯҳи пешгирии ҳуқуқвайронкунӣ дар байни ноболиғон ва ҷавонони ШВКД ҶТ дар шаҳр, лейтенанти калони милитсия Фирдавс Нурматзода оид ба масоили зикршуда суханронӣ намуда, ба саволҳо посухҳои қаноатбахш доданд.

МУСОБИҚАИ ВОЛЕЙБОЛБОЗОНИ ҶАВОН

Дар толори Кохи варзишии”Истиқлол”-и шаҳри Гулистон мусобиқаи шаҳрӣ оид ба волейбол  байни 8 дастаи мунтахаб аз муассисаҳои таҳсилоти миёнаи умумии №1, 14 ва гимназияи маркази шаҳр, № 2-и ҷамоати шаҳраки Чоруқдаррон, №3-и ҷамоати шаҳраки Консой, дастаҳои муассисаҳои таҳсилоти миёнаи умумии №4, 7 ва 12-и ҷамоати шаҳраки Адрасмон баргузор гардид.

Ҷараёни мусобиқаи шаҳрӣ байни дастаҳо хеле тезутунд ва шавқовар бо дастгирии мухлисони ин намуди варзиш сурат гирифт. Дар рафти мусобиқаи шаҳрӣ оид ба волейбол ҳамаи дастаҳои иштирокдошта барои ба даст овардани натиҷаи баланд кӯшиш ба Волейболбозони дастаи муассисаи таҳсилоти миёнаи умумии №4-и ҷамоати шаҳраки Адрасмон, деҳаи Гулдара бо нишон додани маҳорати баланд сазовори ҷойи аввал гардиданд. Ҷои дуюм насиби дастаи муассисаи таҳсилоти миёнаи умумии №3-и ҷамоати шаҳраки Консой ва ба ҷои 3-юм хонандагони муассисаи таҳсилоти миёнаи умумии №1-и маркази шаҳр соҳиб гардиданд. Ба ғолибони мусобиқа ва бозингарони беҳтарин туҳфаҳои мақомоти иҷроияи ҳокимияти давлатии шаҳри Гулистон дар вазъи тантанавӣ супорида шуд.

ТАДРИСИ МАҲОРАТИ ПЕШГИРӢ

Бахшида ба Рӯзи ҷаҳонии коҳиши хатари офатҳо бахши Раёсати Кумитаи ҳолатҳои фавқулода ва мудофиаи граҷдании вилояти Суғд дар шаҳри Гулистон дар байни муассисаҳои таҳсилоти миёнаи умумии шаҳр озмуни беҳтарин дарсҳои кушодро дар мавзӯи «Ҳолатҳои фавқулода ва мудофиаи граҷданӣ, инчунин рафтор намудани хонандагон дар ҳолатҳои фавқулода» ташкил ва гузаронид.

Дар ҷараёни тадрис омӯзгорон ва хонандагон донишҳои худро доир ба ҳолатҳои фавқулода, мудофиаи гражданӣ, коҳиши хатари офатҳои табиӣ, пешгирии ҳодисаҳои нохуш, инчунин оид ба расонидани ёрии аввалин ба зарардидагон маҳорати худро намоиш доданд. Дар раванди машғулиятҳо устодону шогирдон фаъолона дар озмунҳои «Расми беҳтарин» ва «Дастони моҳир» ва нақл дар мавзӯи «Пешгирии ҳолатҳои фавқулода» иштирок намуданд.