Барқ доимӣ шуд

Пас аз пошхўрии иттиҳоди шўравӣ муносибат бо ҳамсоякишвар сард гардид ва қатъи нерўи барқ аз ҷумҳурии ҳамҷавор дар фасли сармо мардумро бо мушкилоти зиёд рў ба рў кард. Мардумро сардиву торикӣ дар фасли зимистон ҳамасола азият медод. Инак, бо дастуру супоришҳои Пешвои муаззами миллат ва андешидани чораҳои зарурӣ дар ин самт аз ҳисоби захираҳои кишвар иншооти энергетикӣ бунёд гарида, ин мушкилӣ тадриҷан ҳалли худро пайдо намуд.

Муроҷиати Асосгузори сулҳу ваҳдати миллӣ – Пешвои миллат, муҳтарам Эмомалӣ Раҳмон оид ба таъмини шабонрўзии аҳолии кишвар ва корхонаҳои саноатӣ бо нерўи барқ тамоми сокинонро хушҳол намуда, аз ояндаи пурнур паём овард. Аз ҷумла банда ҳам аз ин навиди фараҳбахш хушҳол гардида, бори дигар ба Сарвари кишвар эҳтирому эътиқодам беш аз пеш афзуд. Акнун фурсати он расидааст, ки мо мардуми кишвар гуфтаҳои Пешвои худро дустури зиндагӣ қарор дода, фарҳанги истифодаи оқилонаи нерўи барқро ба кор гирем ва таҷҳизоти каммасраферо корбаст намоем, ки ҳам ба нафъи давлат ва ҳам ба фоидаи хонандони мо бошад.

“Шифо”-и Гулистон

Зиёда аз 50 сол аст, ки дар Ҷамоати деҳоти Ворух, Чоркўҳ ва Сурхи ноҳияи Исфара ба ҳайси омўзгори фанҳои забону адабиёти тоҷик кор мекунам. Бо дарназардошти хизматҳои тўлонӣ ҳукумати шаҳри Исфара маро барои табобат ба осоишгоҳи «Шифо»-и шаҳри Гулистон фиристод.

Дар муддати табобат аз муолиҷаву суханони рўҳбахши сардухтур, номзади илми тиб, асабшинос Шарифҷон Абдуллоев ва пизишкону кормандон маслиҳатҳои судбахш ва табобат гирифтам. Бо ин навишта мехоҳам миннатдории худ ва ҳамҳуҷараҳоям М.Ахмедов аз Исфара, Нуруллоева аз Гулистон, Норматов аз Хуҷанд ва дигарон аз шаҳрҳои Истаравшан, Ашт, Бобоҷон Ғафуров, Конибодомро баён намуда, ба табибони ҳозиқ барору комёбӣ таманно намоям.

Мирзоҳикмат Маҳкамов,
Аълочии маорифи
Ҷумҳурии Тоҷикистон, сокини деҳаи Ворухи Исфара

Тақозои тақвияти корҳои тарғиботӣ

Таҳти раёсати Раиси шаҳр Матлубахон Амонзода дар толори хурди мақомоти иҷроияи ҳокимияти давлатӣ ҷаласаи Комиссияи доимӣ оид ба танзими анъана ва ҷашну маросимҳо баргузор гардид. Дар оғоз Раиси шаҳр тазаккур дод, ки ҳарчанд аз ба тасвиб расидани Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар ҶТ» даҳ сол сипарӣ шуда бошад ҳам, вале ҳанўз дар татбиқи он баъзе нуқсонҳо ба назар расида, аз ҳар як фаъоли ҷомеа тақозо мешавад, ки ҷиҳати ба мардум фаҳмонидани бандҳои он корҳои тарғиботӣ-ташвиқотиро тақвият бахшанд.

Зеро масъалаи танзими анъанаву маросим аз масоили муҳими ҷомеа буда, он бевосита ба сатҳи зиндагии мардум марбут аст. Дар Паёми навбатии Асосгузори сулҳу ваҳдати миллӣ-Пешвои миллат, муҳтарам Эмомалӣ Раҳмон татбиқи қонун махсус таъкид гардид.

Паёми Пешвои миллат мавриди ташреҳ қарор гирифт

Дар асоси нақшаи Мақомоти иҷроияи ҳокимияти давлатии шаҳр гурўҳҳои тарғиботию ташвиқотӣ таъсис дода, дар Ҷамоати шаҳракҳо, корхонаву ташкилот ва муассисаву идораҳо барои шарҳи Паёми Пешвои миллат ҷамъомаду мулоқот, вохўрию суҳбатҳо роҳандозӣ мешаванд.

Дар толори КАТС бо кормандони соҳаи тандурустӣ ҷамъомади судманд баргузор гардид. Дар ҷамъомад мудири шуъбаи рушди иҷтимоӣ ва робита бо ҷомеаи дастгоҳи Раиси шаҳр Илҳом Мадализода, мудири бахши ҷавонон, варзиш ва сайёҳӣ Саида Ғоибова, менеҷери сохтори госпиталӣ Гулсанам Сармусоқова, сармуҳаррири рўзномаи «Соҳил» Абдуманнон Одинаев оид ба нуктаҳои асосии Паёми навбатӣ андешаҳои хешро иброз намуда, таъкид доштанд, ки Паёми имсола ҳама самтҳои рушди иҷтимоию иқтисодӣ, фарҳангӣ ва сиёсии мамлакатро таҳлил намуда, вазифаҳои навбатиро бо мақсади рушди ҳамаи соҳаҳои кишвар барои ноил шудан ба зиндагии шоистаи мардум ва рушди босуботи Тоҷикистони азизамон муайян намуд.