22 Декабр 2023
Мувофиқи Қонуни Ҷумҳурии Тоҷикистон "Дар бораи рӯзҳои ид" ҳамасола санаи 22 декабр Рӯзи касби энергетикҳо таҷлил карда мешавад.
Бо мақсади арҷгузорӣ ба заҳматҳои як қатор фаъолони соҳа санаи 22 декабр дар толори шабакаҳои барқи шаҳри Гулистон ҷамъомад баргузор карда шуд. Дар кори ҷамъомад муовини якуми Раиси вилояти Суғд Хол Ҳайдар, раиси шаҳри Гулистон Раъно Ҳошимзода, кормандони воҳидҳои сохторӣ ва дигар касбу кори гуногун иштирок доштанд.
Зикр карда шуд, ки дар даврони соҳибистиқлолии кишвари маҳбуб ба инкишоф ва рушди соҳаи энергетика аҳамияти махсус дода шуда, таъмини истиқлолияти энергетикӣ яке аз ҳадафҳои стратегӣ дар мамлакат эълон гардид. Дар доираи татбиқи ин ҳадаф саҳму талошҳои Пешвои муаззами миллат муҳтарам Эмомалӣ Раҳмон дар бунёд ва азнавсозии неругоҳҳои хурду бузург баёнгари он аст ки, соҳаи энергетика яке аз соҳаҳои пурмаҳсули кишварамон ба ҳисоб меравад.
Чунин дастгириҳои пайваста кормандони соҳаро водор месозад, ки ҷиҳати боз ҳам рушд бахшидани корҳои ободониву созандагӣ, таъмиру тармим ва таъмини гармиву рӯшноӣ ба ҳар як хонадони кишвар саъю кӯшиш намоянд.
Сипас ба як қатор пешсафони соҳа сипоснома ва туҳфаҳои хотиравии Мақомоти иҷроияи ҳокимияти давлатии шаҳри Гулистон тақдим карда шуд.
