23 Январ 2025
Санаи 22.01.2025 иҷрокунандаи вазифаи Раиси шаҳр Илҳом Пӯлотзода аз муассисаи давлатии гимназияи №1, собиқ бинои маркази таҳсилоти иловагии шаҳр, бахши фарҳанги шаҳр ва китобхонаи системаи марказонидашуда дидан намуд.
Нахуст иҷрокунандаи вазифаи Раиси шаҳр Илҳом Пӯлотзода аз муассисаи давлатии гимназияи №1 дидан намуда, бо ҷараёни таҳсил шинос шуда бо омӯзгорону хонандагон ҳамсуҳбат шуд.
Иттилоъ дода шуд, ки дар муассиса 760 нафар хонанда таълим мегиранд ва ба онҳо 35 нафар омӯзгор дарс мегӯянд. Дар соли таҳсили 2023-2024 омӯзгорону хонандагони муассиса ба дастовардҳои назаррас ноил гардиданд. Як нафар хонандаи муассисаи дар даври ниҳоии олимпиадаи фаннии хонандагон соҳиби ҷойи дуюм ва медали нуқра гардид ва ҳамчунин як нафар омӯзгори муассиса дар даври ниҳоии озмуни ҷумҳуриявии “Фурӯғи субҳи доноӣ ккитоб аст” фаъолона иштирок намуд. Солҳои қаблӣ низ таълимгирандагони муассисаи дар озмунҳо ва олимпиадаҳои фаннӣ соҳиби ҷойҳои намоён мегардиданд.
Иҷрокунандаи вазифаи Раиси шаҳр Илҳом Пӯлотзода ба масъулин ҷиҳати баланд бардоштани сатҳу сифати таълим, даст ёфтан ба натиҷаҳои назаррас дар озмуну олимпиадаҳо, фароҳам овардани шароити мусоиди таълим дастур дод.
Сипас, иҷрокунандаи вазифаи Раиси шаҳр Илҳом Пӯлотзода аз бинои собиқи маркази таҳсилоти иловагӣ дидан намуд. Иттилоъ дода шуд, ки бинои мазкур ба таъмир ниёз дорад ва тибқи нақша он пурра таҷдиду азнавсозӣ карда мешавад. Илҳом Пӯлотзода ба масъулин ҷиҳати бо сифат таъмиру азнавсозӣ намудани бинои мазкур супориш дод.
Ҳамчунин, аз бахши фарҳанги мақомоти иҷроияи ҳокимияти давлатии шаҳр, китобхонаи системаи марказонидашуда дидан карда шуд.
Иттилоъ дода шуд, ки дар ихтиёри бахши фарҳанги шаҳр 10 китобхона, Кохи фарҳангии “Истиқлол”, 7 муассисаи клубӣ, 2 мактаби мусиқӣ, 2 мактаби санъат, 1 осорхона, ансамбли “Фалак”, дастаи ҳунарӣ-рақсии “Сафина”, 3 боғи фарҳангӣ-фароғатӣ ва 3 гулгашт мавҷуд аст.
Дар шаҳр10 китобхона фаъолият мебаранд. Китобхонаи марказӣ ва бачагона дар бинои бахши фарҳанг ҷойгир шуда, 8 китобхона-филиалҳо дар ҷамоати шаҳракҳо ҷойгир шудаанд.
Дар китобхонаи системаи марказонидашудаи шаҳр 105,5 ҳазор нусха китоб маҳфуз буда, аз ин шумора 13,5 ҳазор нусха китоб бо забони давлатӣ, 87,3 ҳазор нусха бо забони русӣ ва 4,5 ҳазор нусха бо дигар забонҳо мебошанд.
Осорхонаи таърихӣ-кишваршиносӣ дар бинои бахши фарҳанг ҷойгир буда, дорои 5 шуъба: шуъбаҳои рассомӣ, санъат, хонаи миллӣ, ҳарбӣ-ватандӯстӣ, геология ва табиат, таърихи шаҳру шаҳракҳо ва 1 толор мебошад. Дар осорхона дар маҷмуъ 2958 нигора мавҷуд мебошад. Аз инҳо: 63 адад нигораи наққошӣ, 1135 адад сурат, 42 адад санъат, 7 адад ашёи археологӣ, 81 адад ашёи маишию этнографӣ, 536 адад ҳуҷҷат ва дигар аснод 1092 адад мебошад.
Ҳамчунин, аз ҷараёни корҳои таъмирӣ дар бино дидан карда шуда, дастур ддода шуд, ки корҳои таъмирӣ дар муҳлати муайян гардида бо сифати баланд ба анҷом расонида шаванд ва дар назди бино дарахтони ороишӣ шинонида шавад.
