06 Феврал 2025
Санаи 05.02.2025 иҷрокунандаи вазифаи Раиси шаҳри Гулистон Илҳом Пӯлотзода аз ҷамоати шаҳраки Чоруқдаррон дидан намуд.
Бо мақсади сарсабзу хуррам намудани шаҳрак бо иштироки Илҳом Пӯлотзода 200 бех дарахтони ҳамешасабзи ороишӣ дар шафати роҳи даромадгоҳи шаҳрак шинонида шуд. Барои идомаи ин тадбирҳо ва ҳар чӣ бештар шинонидани дарахтони ороишӣ ба масъулини шаҳрак супориш дода шуд.
Дар идома иҷрокунандаи вазифаи Раиси шаҳр Илҳом Пӯлотзода аз ҶСК “Комбинати фулузоти нодири Ленинобод” дидан намуд. Иттилоъ дода шуд, ки барои фаъолияти мунтазами корхона лоиҳаҳо барои сармоягузорӣ ба сармоягузорони хориҷӣ пешниҳод гардидааст ва дар ҳоли қабул гардидани лоиҳаҳо корхона ба фаъолияти истеҳсолӣ мепардозад.
Бо мақсади назорати натиҷаи лоиҳаҳо ва ҳар чи зудтар ҷалби сармояи хориҷӣ ва ба фаъолият идома бахшидани корхона ба масъулин супоришҳои мушаххас дода шуд.
Ҳамчунин, аз бинои “Хонаи маданият”-и шаҳрак дидан карда шуд. Аз ҷониби масъулин иттилоъ дода шуд, ки тибқи нақша дар соли ҷорӣ бо дастгирии мақомоти иҷроияи ҳокимияти давлатии шаҳр бинои “Хонаи маданият” таъмиру азнавсозӣ карда мешавад.
Илҳом Пӯлотзода, иҷрокунандаи вазифаи Раиси шаҳр ба масъулин ҷиҳати босифати баланд ба роҳ мондани корҳои таъмирӣ, тибқи нақша ва дар муҳлати муайянгардида иҷро намудани корҳо супориш дод.
Ба раиси ҷамоати шаҳрак ҷиҳати иҷрои саривақтии иншооти ҷашнӣ ба истиқболи Ҷашни 35-солагии Истиқлоли давлатии Ҷумҳурии Тоҷикистон дастур дода шуд.
