ПЕШБАРИИ НОМЗАДҲО БА ВАКИЛИИ МАҶЛИСҲОИ ШАҲРӢ ВА ВИЛОЯТӢ

Идомаи кори Конфренсияи XXIII Кумитаи иҷроияи Ҳизби халқии демократии Тоҷикистон дар шаҳри Гулистон дар толори Шабакаҳои барқи Суғд ба вуқӯъ пайваст. Дар кори Конфренсия намояндаи кумиҷроияи ҲХДТ дар вилояти Суғд Анвар Ҷалилов ва раиси комиссияи шаҳрии интихобот Лоҳур Назришозода ширкат варзиданд.

Муслимахон Ҷамолиён, раиси Кумитаи иҷроияи Ҳизби халқии демократии Тоҷикистон дар шаҳри Гулистон кори Конфренсияро оғоз бахшида иброз дошт, ки тибқи талаботи Қонуни конститутсионии Ҷумҳурии Тоҷикистон «Дар бораи интихоботи вакилон ба маҷлисҳои маҳаллии вакилони халқ» номзадҳои ҳизб ба вакилии Маҷлиси вакилони  халқи вилояти Суғд ва шаҳри Гулистон пешбарӣ гардидаанд. Мутобиқи муқарарроти қонуни мазкур ҳизбҳои сиёсӣ  50 рӯз пеш аз интихобот метавонанд номзадҳои худро ба вакилии маҷлисҳои маҳаллӣ пешбарӣ намоянд. Мавсуф дар идомаи суханроинаш аз дастуру ҳидоятҳои Асосгузори сулҳу ваҳдати  миллӣ-Пешвои миллат, Президенти Ҷумҳурии Тоҷикистон, Раиси муаззами ҳизб муҳтарам Эмомалӣ Раҳмон дар мавриди пешбарии вакилон аз ҳисоби занону ҷавонони фаъол тазаккур дода, зикр дошт, ки бо дарназардошти дониш, малака, маҳорати ташкилочигӣ ва мавқеъ доштан дар ҷомеа 2 нафар номзад  ба вакилии Маҷлиси вакилони халқи вилояти Суғд ва 35 нафар номзад ба вакилии Маҷлиси вакилони халқи шаҳр пешниҳод карда мешаванд.

МУҚОВИМАТ АЛАЙҲИ ПАДИДАҲОИ ХАТАРАФЗО

Экстремизм ва терроризм аз мафҳумҳоест, ки имрӯз дар тамоми ҷаҳон вирди забони ҳама шудааст ва ин ду мафҳум ба ҳам пайваст мебошад. Экстремизм, яъне тундравӣ ба терроризм меорад. Террористон мехоҳанд, ки мақсади худро бо роҳи зӯроварӣ, тарсу ваҳм ва куштор амалӣ созанд. Онҳо бар зидди сиёсати давлат кор мебаранд, одамонро аз Ватан дур месозанд, ҷомеаро хароб мекунанд.

Имрӯз терроризм ва экстремизм дар тамоми ҷаҳон ба яке аз падидаҳои хатарнок табдил ёфтааст. Экстремистон ва террористон кӯшиш менамоянд, ки ба сафи худ наврасон ва ҷавононро ҷалб намоянд, зеро ки ҷавонон бо зудбоварӣ ба осонӣ ба онҳо пайравӣ менамоянд. Мақсади экстремизми муосир таъсиси давлате мебошад, ки бо барпо намудани он барпо намудани ҳокимият аз болои ҷаҳони ислом ва сипас дар тамоми ҷаҳон мебошад.  Ҷавонони имрӯза аз сабаби набудани ҷойи кори муносиб ё худ пайдо намудани шароити хуби зиндагӣ, паст будани сатҳу саводнокӣ, дурӣ аз оила ва падару модар, бехабарӣ, беназорат мондан ба ин гуна гурӯҳҳои ифротгароӣ шомил шуда истодаанд. Вақте ки ҷавонон бекор мемонанд ё ин ки дар муҳоҷират қарор доранд, дар натиҷаи таъсири мушкилоти рӯзмарра даст ба ҷиноят мезананд ва бо гурӯҳҳои номатлуб рӯ меоранд. Онҳо мехоҳанд, ки бо ин роҳ мушкилоти худро ҳал намоянд. Мутаассифона, мушкилоти зиёди наверо барои худ эҷод намуда, аслан ояндаи худро аз байн мебаранд.

Таъиноти кадрӣ дар сатҳи роҳбарӣ дар шаҳру навоҳӣ ва дигар шохаҳои ҳокимияти давлатӣ

Имрӯз дар Қасри миллат Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон кадрҳоеро, ки ба вазифаҳои сатҳи роҳбарӣ дар шаҳру навоҳӣ ва дигар шохаҳои ҳокимияти давлатӣ таъин гардиданд, ба ҳузур пазируфтанд.

Бо Фармонҳои Президенти Ҷумҳурии Тоҷикистон Олимзода Сӯҳроб аз вазифаи Сафири фавқулодда ва Мухтори Ҷумҳурии Тоҷикистон дар Ҷумҳурии Қирғизистон озод гардида, Ализода Назирмад ба ин вазифа таъин гардид. Раисони ноҳияҳои Фирдавсии шаҳри Душанбе, Қабодиёни вилояти Хатлон, Шуғнони ВМКБ ва Мастчоҳи вилояти Суғд бо сабаби ба кори дигар гузаштанашон аз вазифа озод гардида, ба ин вазифаҳо ҷавонони кордону мутахассисони варзида таъин гардиданд.

Мирзозода Низом бо Қарори Ҳукумати Ҷумҳурии Тоҷикистон аз вазифаи муовини Раиси Кумитаи сохтмон ва меъмории назди Ҳукумати Ҷумҳурии Тоҷикистон озод ва ба вазифаи муовини Раиси вилояти Хатлон таъин гардид.

СУЛҲ - ПАДИДАИ ВАҲДАТИ МИЛЛӢ

«Сулҳ маҳфуми муқаддас ва беназир буда, дар шароити ҷаҳонишавӣ барои сокинони сайёра аҳамияти хоса касб кардааст». Бузургтарин падидаи ваҳдати миллӣ ҳамин сулҳ аст. Он ҳам неъмат асту ҳам саодати зиндагисту ҳам бахти безаволи модарони тифлакони мо аст.

Пешрафти ҳамаи соҳаҳо аз тинҷиву амонӣ, якдигарфаҳмӣ дӯстиву бародарӣ сахт вобастагӣ дорад. Бинобар ин тӯли 28 соли Истиқлолияти давлатии Ҷумҳурии Тоҷикистон дар давлати мо сулҳу субот, ваҳдату ягонагӣ пойдор аст. Ҳамаи ин тинҷиву оромӣ, созандагиву бунёдкорӣ бо талош ва сиёсати хирадмандонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба даст омадааст. Боиси хурсандист, ки Президенти кишварамон дар ҳама баромадҳои худ ҷавононро ҳамчун неруи пешбарандаи ҷомеа, иқтидори воқеии пешрафт, такягоҳи боэътимод ва ояндаи миллату давлат ном гирифта пайваста таъкид мекунанд, ки ҷавонон бо нерӯи ақлонӣ ва ҷисмонии худ баҳри гул- гул шукуфоии Тоҷикистон нақши созанда доранд.