ҲЕҶ КАС ВА ҲЕҶ ЧИЗ ФАРОМӮШ НАМЕШАВАД

Дар Боғи фароғатӣ-фарҳангии “Темурмалик”-и шаҳри Гулистон ба ифтихори 74-солагии Рӯзи Ғалаба бар фашизм дар Ҷанги Бузурги Ватанӣ чорабинии умумишаҳрӣ дар пояи муҷассамаи «Ёдбуд» бо иштироки заҳматкашони ақибгоҳ, ҷанговарони интернатсионалист, муҳофизони сохти конститутсионӣ, чернобилчиён, сокинони маркази шаҳр, намояндагони ҷамоати шаҳракҳо, корхонаву муассисаҳо, ташкилотҳо ва меҳмонон ба вуқӯъ пайваст.

Тантанаҳои таҷлили иди Ғалаба бо садо додани Суруди миллии Ҷумҳурии Тоҷикистон оғоз гардид.

ТАБРИКОТИ РАИСИ ШАҲРИ ГУЛИСТОН ФИРДАВС ШАРИФЗОДА БА МУНОСИБАТИ 74-УМИН СОЛГАРДИ РӮЗИ ҒАЛАБА

Ҳамшаҳриёни азиз!

Рӯзи 9-уми май ба Ғалабаи бузурги таърихи инсоният ғалаба бар фашизм 74 сол пур мешавад ва ин ҷашнротамоми мардуми сарбаланди кишвар дар радифи дигар сокинони сайёра ботантана қайд мекунанд.

Ҷанги дуюми ҷаҳон аз ҷумлаи фоҷиаҳои бузургтарини таърихи инсоният буд. Дар натиҷаи ин ҷанги хонумонсӯз ва наҷодпарастона кишварҳои бисёре хароб, бештар аз 50 миллион одам қурбон ва садҳо миллион нафар аҳолии мамлакатҳое, ки ба гирдоби ҷанг кашида шуда буданд, ба маҳрумияту азоби тоқатшикан гирифтор гаштанд. Тоҷикистон низ дар ин ҷанг талафоти зиёде дод. Қариб 300 ҳазор нафар фиристодагони тоҷикистонӣ барои дифои Ватан ва шарафу номуси  мардуми хеш дар набардҳои мубориза шуҷоат ва корнамоиҳои бузург нишон дода, 92 ҳазор нафарашон дар майдонҳои ҷанг ҳалок гаштанд.

ХОТИРАИ ҶОВИДОНАИ ҚАҲРАМОНОН

Дар муассисаи давлатии таълимиии томактабии  «Парасту»-и шаҳри Гулистон ба ифтихори 74-умин солгарди Рӯзи Ғалаба чорабинии тантанавии «Хотираҳои ҷовидонаи бобоён» ташкил ва баргузор гардид.

Дар он  кӯдакони гурӯҳи омодагӣ ба мактаб «Нахӯдак» (мураббияш Фароғат Бобоҷонова) ва гурӯҳи калони томактабии «Офтобак» (мураббияш Лазокат Қодирова) доир ба корнамоиҳои бобоён дар солҳои Ҷанги Бузурги Ватанӣ шеъру таронаҳо хонда,  саҳначаҳои ҷолибро таҳти унвони «Гусели наваскар» намоиш дода, маҳорати расонидани ёрии аввалияи тиббиро духтаракони дӯстрӯяк нишон дода, мусобиқаи шавқовари «Дастрас намудани мактуб» байни дастаҳо баргузор гардид.

ҶАЛАСАИ СИТОДИ ШАҲРӢ

Таҳти раёсати Раиси шаҳри Гулистон Фирдавс Шарифзода ҷаласаи навбатии ситоди шаҳрӣ тибқи ҷадвали тасдиқгардидаи мақомоти иҷроияи ҳокимияти давлатии вилояти Суғд ҷиҳати омодагӣ ба 30-солагии Истиқлолияти давлатии Ҷумҳурии Тоҷикистон доир гардид.

Ҷаласаро Раиси шаҳри Гулистон Фирдавс Шарифзода ҳусни ифтитоҳ бахшид.

Зикр гардид, ки дар Паёми навбатии худ Асосгузори сулҳу ваҳдати  миллӣ-Пешвои миллат, Президенти Ҷумҳурии Тоҷикистон, Ҷаноби Олӣ муҳтарам Эмомалӣ Раҳмон махсус таъкид намуданд, ки ба нақшаи чорабиниҳо оид ба омодагӣ ба ҷашни 30-солагии Истиқлолияти давлатии Ҷумҳурии Тоҷикистон бо масъулияти том ва ҳисси баланди ватандӯстӣ муносибат карда, ба масъалаи бунёди иншооти маорифу тандурустӣ, фарҳанг ва дигар муассисаҳои иҷтимоӣ, роҳҳо, корхонаву коргоҳҳои истеҳсолӣ, махсусан, ободу зебо гардонидани маҳалли зист, хиёбонҳо, гулгашту майдонҳо ва дигар корҳои созандагӣ эътибори аввалиндараҷа дода шаванд.