ҲИФЗИ ВАТАН-ҚАРЗИ ШАҲРВАНДИИ МОСТ

Дар мавзӯи «Ҳифзи Ватан - қарзи шаҳрвандии мост» дар ҳудуди шаҳр дар 43 корхонаву муассиса, идораву ташкилотҳои ҳудуди шаҳр ва ҷамоати шаҳракҳо бо намояндагони соҳаҳои гуногуни хоҷагии халқ ва иштироки васеи ҷомеаҳои меҳнатӣ Рӯзи ягонаи ахбори сиёсӣ баргузор гардид.

Дар баргузории хониши сиёсӣ тарғиботчиёни мақомоти иҷроияи ҳокимияти давлатии вилояти Суғд Абдуманнон Одинаев номзади илмҳои филология, устоди Донишгоҳи давлатии Хуҷанд ба номи академик Бобоҷон Ғафуров, Хуршед Назаров номзади илмҳои иқтисод, дотсенти кафедраи назарияи иқтисодии Донишгоҳи давлатии ҳуқуқ, бизнес ва сиёсати Тоҷикистон, Хиромон Қодирова мутахассиси шуъбаи кор бо сомона ва васоити ахбори оммаи Донишкадаи политехникии Донишгоҳи техникии Тоҷикистон ба номи Муҳаммад Осимӣ дар шаҳри Хуҷанд иштирок намуда, якҷоя бо тарғиботчиёни маҳаллӣ ва кормандони мақомоти иҷроияи ҳокимияти давлатии шаҳр доир ба мавзӯи Рӯзи ягонаи ахбори сиёсӣ дар маркази саломатӣ, МТМУ №1 ва ҷамоати шаҳраки Сирдарё баромадҳо карданд.

АЁДАТИ СОБИҚАДОРОН

Зимни сафари корӣ ба шаҳраки Адрасмон иҷрокунандаи вазифаи Раиси шаҳри Гулистон Фирдавс Шарифзода гурӯҳи калони собиқадорони ҷангу меҳнат, ҷанговарони интернатсионалист - Абдулҳаким Қосимов, Машариф Расулов, Азизҷон Ҳоҷиматов, Раҳимбибӣ Пардаева, Фозил Улмасов, Улмас Комилов,  Таманно Раҳматова, Фахриддин Анорбоевро аёдат карда, бо онҳо мулоқоти самимӣ намуд.

Аёдатшудагон шукри даврони истиқлолият намуда, ба Пешвои миллат нисбати ғамхории рӯзафзунашон доир ба беҳдошти шароити зисту зиндагонии собиқадорон изҳори самимии миннатдорӣ карданд.

МУЛОҚОТ БО АҲЛИ ҶАМОАТЧИГИИ АДРАСМОН

Дар толори ҷамоати шаҳраки Адрасмон мулоқоти иҷрокунандаи вазифаи Раиси шаҳри Гулистон Фирдавс Шарифзода бо аҳли ҷамоатчигии шаҳраки кӯҳканон доир гардид.

Мулоқотро иҷроркунандаи вазифаи Раиси шаҳр Фирдавс Шарифзода ҳусни ифтитоҳ бахшида зикр намуд, ки ҳадафи вохӯрӣ бо аҳли ҷамоатчигии яке аз шаҳракҳои калонтарин таҳлилу баррасии натиҷаҳои фаъолияти соҳаҳои хоҷагии халқ, раванди корҳои созандагиву ободкорӣ ва тарғиботиву ташвиқотӣ дар ҳудуди шаҳрак ва се деҳоти он – Зарчашма, Гулдара ва Гулшан дар партави дастуру супоришҳои Пешвои миллат мебошад.

Сараввал сардори шуъбаи Раёсати Кумитаи амнияти миллии Ҷумҳурии Тоҷикистон дар шаҳри Гулистон Хаёл Ҳакимов доир ба пурзӯр намудани раванди корҳои тарғиботӣ-ташвиқотӣ дар байни сокинон, пешгирии падидаҳои номатлуб, аз қабили шомилшавии аҳолӣ ба ҳизбу ҳаракатҳои иртиҷоӣ сухан ронд. Сипас прокурори шаҳри Гулистон, мушовири адлияи дараҷаи як Сафаралӣ Самизода роҷеъ ба муҳтавои Паёми навбатии Президенти Ҷумҳурии Тоҷикистон ва рушди соҳибкорӣ, ҳунарҳои мардумӣ баромад намуд. Сардори шуъбаи ВКД ҶТ дар шаҳри Гулистон полковники милитсия Темур Шарифзода доир ба пешгирии ҷинояткорӣ ва робитаи мақомоти ҳифзи ҳуқуқ бо аҳолӣ ҳарф зад.

Мулоқоти Пешвои миллат Эмомалӣ Раҳмон бо намояндагони васоити ахбори оммаи давлатӣ

20 феврали соли 2019 Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо доираи васеи намояндагони ВАО-и давлатӣ мулоқот карданд.

Дар мулоқот роҳбарони шабакаҳои давлатии телевизион ва радиои Тоҷикистон, кормандони эҷодию техникии телевизиону радиоҳои ҷумҳурӣ, сармуҳаррирони рӯзномаву маҷаллаҳои давлатӣ, ҳафтаномаҳои Ҳизби Халқии Демократии Тоҷикистон, намояндагони хадамотҳои матбуотии вазорату кумитаҳо ва идораҳои давлатии кишвар иштирок карданд.

Ҳадафи вохурӣ натиҷагирии фаъолияти Васоити Ахбори Омма дар ҷомеаи муосир ҳамчун фишанги асосии тарғиби сиёсати давлату ҳукумати кишвар ва баррасии сатҳу сифати барномаҳои телевизиону радиоҳои давлатӣ ва матбуоти даврӣ буд, ки зимни баромади худ Президенти мамлакат муҳтарам Эмомалӣ Раҳмон бо таҳлилҳои амиқ оид ба бурду бохти кори соҳа, ислоҳи камбудиҳо ва ба мардум расондани ҳадафҳои сиёсию стратегии Ҳукумати Ҷумҳурии Тоҷикистон андешаронӣ карданд.