Об - сарчашмаи некўаҳволӣ ва амният

Тағйирот ва равандҳои глобалии солаҳои охир ба манбаъҳои обӣ таъсири бузург расониданд. Вобаста ба ин, об ба яке аз масъалаҳои асосии муносибатҳои байналмилалӣ ва сулҳ табдил ёфта истодааст. Тоҷикистон ҷонибдори он аст, ки давлатҳои ҷаҳон дар ҷараёни танзими захираҳои об рўҳияи ҳамкорӣ, сабру таҳаммул, шаффофият ва эҳтироми ҳамдигарро риоя кунанд, то ин ки ба даст овардани рушди устувор ва ҳифзи муҳити атроф барои наслҳои оянда таъмин гардад. Мавҷудияти муносибатҳои гуногуни ҳамкорӣ дар масъалаҳои истифодаи об дар ҳавзаҳои зиёда аз 263 дарёҳои сарҳадгузар, ки 60 фоизи захираҳои оби тозаро дар ҷаҳон ташкил медиҳанд гувоҳи он аст, ки маҳз об сарчашмаи асосии ҳам некўаҳволии одамон ва ҳам амнияти минтақавӣ мебошад. Ҳатто дарёҳое, ки марзҳои миллиро убур мекунанд онҳо низ дар сатҳи минтақавӣ ва миллӣ аҳамияти муҳими стратегӣ доранд. Дар баробари ин, коршиносон имрўзҳо баъзе аз муноқишаҳои минтақавӣ, аз ҷумла ҷанги Лубнонро марбут ба об медонанд.

Дар шароити босуръат афзоиш ёфтани аҳолӣ ва тағйирёбии иқлим истифодаи мақсадноки захираҳои обӣ-гидроэнергетикӣ, таҳия ва муқаррар кардани роҳу воситаҳои мувофиқашудаи дарозмуддат ва бемамониати идораи маҷрои дарёҳо чораи ягонаи таъмини рушди устувори иқтисодиёт, ҳалли мушкилоти камбизоатӣ, маориф, тандурустӣ, ташкили ҷойҳои корӣ ва дигар мушкилоти муҳими иҷтимоиву иқтисодии муҳим мебошад. Тағйироти глобалии иқлим, ки солҳои охир ба назар мерасад ва равандҳое, ки онро ҳамроҳӣ менамоянд дар масъалаҳои таъмини об ва маводи ғизоӣ барои зиндагии миллионҳо нафар душворӣ пеш овардааст.

Рўзи ягонаи ахбори сиёсӣ

Тибқи нақшаи мақомоти иҷроияи ҳокимияти давлатии вилоят ва шаҳр қариб дар 50 корхонаву ташкилот, идораву муассиса ва шаш Ҷамоати шаҳракҳо рўзи панҷшанбе рўзи ягонаи ахбори сиёсӣ дар мавзўи “Паёми Пешвои миллат – роҳнамои ҷомеа ба ояндаи дурахшон” доир гардид.

Тарғиботчиён аз мақомоти иҷроияи ҳокимияти давлатии вилоят Сироҷиддин Бобоев, дотсент, мудири кафедраи Донишгоҳи иқтисод ва савдои Тоҷикистон, Мукаррама Неъматова, мудири шуъбаи кор бо занони кумиҷроияи ҲХДТ дар шаҳри Хуҷанд ва тарғиботчиёни маҳаллӣ доир ба нуктаҳои асосии Паёми навбатии Президенти Ҷумҳурии Тоҷикистон ба Маҷлиси Олии Ҷуҳурии Тоҷикистон маърўзаҳо намуданд.

Таассурот аз мулоқот

Дар шаҳраки зебоманзари мо Адрасмон вохўрии гурўҳи корӣ доир ба тавзеҳи муҳтавои Паёми Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ба Маҷлиси Олии мамлакат бо сокинон баргузор гардид. Банда низ дар ин мулоқот иштирок намуда, аз баромадҳои тарғиботчиён нисбати нуктаҳои асосии Паёми Пешвои миллат тассуроти бештару пурсамар бардоштам.

Махсусан, баромади муовини раиси Кумита оид ба корҳои дин, танзими анъана ва ҷашну маросимҳои миллии назди Ҳукумати ҷумҳурӣ Азизулло Мирзозода бароям як ҷаҳон ғизои маънавӣ дод. Дар навбати худ ҳамчун омўзгори ҷавон азм дорам, бо дасту дили гарм ва нерўи созанда фаъолияти хешро густариш бахшида, дар тарбияи насли наврас дар рўҳияи худшиносии миллӣ, эҳтиромгузо- рӣ ба муқаддасоти миллӣ, ҳифзи дастовардҳои истиқлолият саҳм-гузор бошам.

Барқ доимӣ шуд

Пас аз пошхўрии иттиҳоди шўравӣ муносибат бо ҳамсоякишвар сард гардид ва қатъи нерўи барқ аз ҷумҳурии ҳамҷавор дар фасли сармо мардумро бо мушкилоти зиёд рў ба рў кард. Мардумро сардиву торикӣ дар фасли зимистон ҳамасола азият медод. Инак, бо дастуру супоришҳои Пешвои муаззами миллат ва андешидани чораҳои зарурӣ дар ин самт аз ҳисоби захираҳои кишвар иншооти энергетикӣ бунёд гарида, ин мушкилӣ тадриҷан ҳалли худро пайдо намуд.

Муроҷиати Асосгузори сулҳу ваҳдати миллӣ – Пешвои миллат, муҳтарам Эмомалӣ Раҳмон оид ба таъмини шабонрўзии аҳолии кишвар ва корхонаҳои саноатӣ бо нерўи барқ тамоми сокинонро хушҳол намуда, аз ояндаи пурнур паём овард. Аз ҷумла банда ҳам аз ин навиди фараҳбахш хушҳол гардида, бори дигар ба Сарвари кишвар эҳтирому эътиқодам беш аз пеш афзуд. Акнун фурсати он расидааст, ки мо мардуми кишвар гуфтаҳои Пешвои худро дустури зиндагӣ қарор дода, фарҳанги истифодаи оқилонаи нерўи барқро ба кор гирем ва таҷҳизоти каммасраферо корбаст намоем, ки ҳам ба нафъи давлат ва ҳам ба фоидаи хонандони мо бошад.