Президенти Ҷумҳурии Тоҷикистон Эмомалӣ Раҳмон бо Президенти Ҷумҳурии Қазоқистон Қосим-Жомарт Токаев суҳбати телефонӣ анҷом доданд

Дирӯз Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Президенти Ҷумҳурии Қазоқистон муҳтарам Қосим-Жомарт Токаев суҳбати телефонӣ анҷом доданд.

Дар ҷараёни суҳбат Сарвари давлати мо  Президенти Ҷумҳурии Қазоқистонро бо таманниёти нек ба муносибати зодрӯзаш самимона табрик намуданд.

Пешвои миллат фаъолияти бисёрсолаи самарабахши давлатии муҳтарам  Қосим-Жомарт Токаевро, ки  боиси эҳтироми баланд ва обрӯву эътибори шоистаи ӯ гардидааст, бахусус қайд карданд.

Ҳамчунин, таваҷҷуҳи пайвастаи Роҳбари давлати Қазоқистон ба масъалаҳои таҳкими муносибатҳои дӯстӣ ва ҳамкориҳои Тоҷикистону Қазоқистон, ки дар сиғаи шарикии стратегӣ бомаром рушд меёбанд, таъкид гардид.

ИФТИТОҲИ НИМПАЙКАРАИ ҚАҲРАМОН

Дар доираи омодагӣ ба таҷлили ҷашни бузурги миллӣ - 30 - солагии Истиқлолияти давлатии Ҷумҳурии Тоҷикистон сокинони шаҳраки Сирдарёи шаҳри Гулистон бо ҷонибдорӣ аз сиёсати созандаву бунёдкоронаи Пешвои муаззами миллат ва Ҳукумати Ҷумҳурии Тоҷикистон бунёди иншооти таъиноти гуногунро ба роҳ монданд.

Дар шафати даромадгоҳи кӯчаи асосии шаҳрак бо иштироки намояндагони Мақомоти иҷроияи ҳокимияти давлатии шаҳр, корхонаву ташкилотҳо, муассиса ва сокинон маросими ботантанаи ифтитоҳи нимпайкараи Қаҳрамони меҳнати сотсиалистӣ, лауреати мукофоти давлатии ИҶШС, кӯҳкани номӣ Тоҷиддин Имомалиев ба вуқӯъ пайваст.

Доир ба ҳаёту фаъолияти пурсамар ва ибратбахши қаҳрамон намояндагони Мақомоти иҷроияи ҳокимияти давлатии шаҳр ва ҷамоати шаҳрак, корхонаи Экспедитсияи комплекси геологии Қайроққум, собиқадорони меҳнат ва аҳли пайвандон суханронӣ намуданд.

РӮҲИ СОЛИМ - ДАР ҶИСМИ СОЛИМ

Субҳи имрӯз дар шаҳри Гулистон бахшида ба Рӯзи ҷавонони Тоҷикистон таҳти унвони “Ҷавонон пайравони Пешвои миллат” Дави миллӣ бо иштироки табақаҳои гуногуни аҳолӣ баргузор гардид.

Дар оғоз Раиси шаҳри Гулистон Бахтиёр Саидаҳмадзода баён дошт, ки дави миллӣ бо ҳидояти бевоситаи Пешвои муаззами миллат дар тамоми манотиқи Тоҷикистон бо шукӯҳ ва шаҳомати хосса таҷлил мегардад. Бо мақсади амалӣ намудани сиёсати варзишпарваронаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти таҳкими тарзи ҳаёти солим, рушди оммавияти варзиш ва ҷалби ҷомеа ба таҳкими дўстӣ ва ваҳдати саросарӣ, имрўз сокинони шаҳру шаҳракҳои Гулистон низ бо рўҳбаландӣ дар ин чорабинии умумиҷумҳуриявӣ иштирок менамоянд. Мақомоти иҷроияи ҳокимияти давлатии шаҳр барои рушди соҳаи варзиш як силсила тадбирҳо андешидааст. Дар ҳақиқат, дави  миллӣ ин яке аз омилҳои оммавӣ гардонидани варзиш ва тарѓиби тарзи ҳаёти солим аст. Дар баробари ин маъракаи мазкур баҳри инкишофи варзишу тарбияи  ҷисмонӣ ва таъмини ширкати  ҷавонони мамлакат дар мусобиқаҳои  минтақавию ҷаҳонӣ ҳамаҷониба мусоидат менамояд. Дар урфият мегўянд, рўҳи солим дар  ҷисми солим аст. Агар мо дар асоси  ин  ҳикмат амал намоем ва варзишро ҳамчун  омили беҳтарини тандурустӣ ва солимии аъзои ҷомеа шуморем, албатта ба ҳамдигарфаҳмӣ, дўстиву рафоқат, суботу устуворӣ ва  сарсабзиву  шукуфоии кишвари азизамон расида  метавонем”.

ФЕСТИВАЛИ “АТЛАСУ АДРАС”

Масъалаи баланд бардоштани мақоми зан дар ҷомеа, эҳёи анъанаву ҳунарҳои миллӣ ва меҳнати хонагии занону духтарон, беҳгардонии вазъи иқтисодию иҷтимоии аҳолӣ, таъсиси ҷойи корӣ барои занону духтарон ва ба касбомӯзию шуғли доимӣ фаро гирифта шудани онҳо дар меҳвари сиёсати имрӯзаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор дода шуда, эҳё ва тарғиби ҳунарҳои миллӣ, аз ҷумла атласу адрасбофии дастӣ, фарҳанги моддӣ ва рӯзгордории халқи тоҷик, қисми таркибии ташаккули ҳисси ватандӯстӣ, ифтихор аз гузаштагон мебошад.

Бо ин мақсад дар Кохи фарҳангии “Истиқлол”-и шаҳри Гулистон Фестивали шаҳрии «Атласу адрас» баргузор гардид. Фестивал аз рӯи шартҳои беҳтарин либоси кӯдакона, беҳтарин либоси расмӣ ва рӯзмарра, беҳтарин либоси идона, инчунин бо дарназардошти намуди эстетикӣ ва дизайни либос, нотакрорӣ ва ғайримуқаррарӣ, ҳалли тобиш ва обуранг, истифодаи ҳунарҳои гулдӯзии дастӣ ва қуроқдӯзӣ, интихоби ашёҳои ороишӣ, пардоз ҷараён гирифт. Дар фестивал марказҳои атласу адрасбофӣ, ҳамзамон ҳунармандони маҳаллӣ фаъолона иштирок намуданд.