Муҳсин ғолиби чемпионат

Дастпарварони Муассисаи давлатии мактаби варзишии шаҳри Гулистон Муҳсин Раҳматов дар чемпионати ҷумҳурӣ дар шаҳри Душанбе аз рўйи намуди каратэ WKF бомуваффақият баромад намуда, дар вазни 55 килограмм чемпиони Тоҷикистон гардид. Амр Дадабоев, Эмомалӣ Очилов бошанд, мутаносибан дар вазнҳои худ ҷойҳои дуюм ва сеюмро ишғол карданд.

Комёбии наврасон

Дар мусобиқаи умумиҷумҳуриявӣ байни наврасони мутаваллиди солҳои 2002-2003, ки дар шаҳри Турсунзода баргузор шуд 12 нафар дастпарварони мактаби варзишии Гулистон оид ба каратэ WKF ба натиҷаҳои назаррас ноил гардиданд. Суҳроб Каримов, Алишер Қаюмов, Аслиддин Акбаров ва Сино Холиқов дар вазнҳои худ ғолиб гардиданд. Роиҷ ба зикр аст, ки варзишгарони гулистонӣ дар ин мусобиқа чор медали тилло, панҷ медали биринҷӣ ва ду медали нуқраро ба даст оварданд.

Озмуни “Барномасози ҷавон”

Бахшида ба Соли ҷавонон озмуни «Барномасози ҷавон» дар байни хонандагони муассисаҳои таълимии шаҳр гузаронида шуд. Озмун аз рўи шартҳои барномасозӣ, веб-барномасозӣ, сохтани манбаи иттилоот, сохтани шабакаи иттилоотӣ ба вуқўъ пайваст.

Дастпарварони муассисаи таълимии №12-и шаҳраки Адрасмон сазовори ҷои якум гардиданд. Ғолибон ва иштирокчиёни беҳтарин бо ифтихорномаҳои шуъбаи маориф сарфарозонида шуданд.

Конференсияи ХХI ҲХДТ дар шаҳри Гулистон

Дар толори калони мақомоти иҷроияи ҳокимияти давлатии шаҳр Конференсияи ХХI ҲХДТ дар шаҳри Гулистон баргузор гашт. Дар Конференсия аз 35 ташкилотҳои ибтидоӣ 120 вакил, инчунин намояндагони дигар аҳзоби сиёсӣ, ташкилотҳои ҷамъиятӣ ва роҳбарони корхонаву муассиса ва идораҳо ба ҳайси даъватшудагон ширкат варзиданд.

Тибқи рӯзномаи Конференсияи ХХI ҲХДТ дар шаҳри Гулистон масъалаҳои ҳисоботи Кумитаи иҷроияи ҲХДТ дар шаҳри Гулистон дар давраи аз моҳи октябри соли 2014 то моҳи майи соли 2017, ҳисоботи Комиссияи тафтишотӣ дар давраи ҳисоботӣ, интихоби ҳайати нави Кумиҷроияи шаҳрӣ, интихоби ҳайати нави Комиссияи тафтишотӣ ва интихоби вакилон ба Конференсияи ХII ҲХДТ дар вилояти Суғд мавриди баррасӣ қарор дода шуданд. Доир ба масоили баррасишуда Конфекренсия қарорҳои дахлдор қабул намуд.