Рӯзи ҳомиён дар Гулистон

Ба ифтихори 25-умин солгарди таъсисёбии Қувваҳои Мусаллаҳи Ҷумҳурии Тоҷикистон дар толори хурди мақомоти иҷроияи ҳокимияти давлатӣ бо иштироки Раиси шаҳри Гулистон Матлубахон Амонзода ва намояндаи мақомоти иҷроияи ҳокимияти давлатии вилоят Карим Шариф мулоқот бо афсарону сарбозон, собиқадорони Қувваҳои Мусаллаҳ, ҷанговарони байналмилал ва муҳофизони сохти конститутсионӣ баргузор гардид. Ба кормандони комиссариати ҳарбии шаҳр собиқадорони Қувваҳои Мусаллаҳ, ҷанговарони байналмилал ва муҳофизони сохти конститутсионӣ туҳфаҳо супорида шуданд.

Ҳамчунин дар Кохи Истиқлол ба муносибати ҷашни чорякасраи Артиши Миллӣ ҷаласаи тантанавӣ доир гардид. Дар оғози ҷаласа Раиси шаҳр Матлубахон Амонзода ҳозиринро ба ин муносибат таҳният намуд. Тазаккур дода шуд, ки Артиши миллӣ дар тӯлӣ солҳои мавҷудияти худ ба мактаби бузурги матонату мардонагӣ табдил ёфта, садҳо ҷавони содиқу вафодори ин марзу бумро тарбия намуд.

ҲИСОБОТИ ШӮРОИ ШАҲРИИ ҲАРАКАТ

Дар толори хурди мақомоти иҷроияи ҳокимияти давлатии шаҳр таҳти раёсати Раиси Шӯрои Ҳаракати ҷамъиятии ваҳдати миллӣ ва эҳёи Тоҷикистон, Раиси шаҳр Матлубахон Амонзода ҷаласаи ҳисоботии Шӯро баргузо гардид.

Котиби Шӯрои Ҳаракат Илҳом Мадализода доир ба фаъолияти густурдаи аъзои Шӯрои Ҳаракат дар соли 2017-ум иттилоъ дод. Қобили зикр аст, ки алҳол дар 109 ташкилоти ибтидоии Ҳаракат қариб 10 ҳазор нафар аъзо барои таҳкими сулҳу суботи ҷомеа корҳои зиёди мушаххасро ба анҷом мерасонанд. Дар музокира сарварони ташкилотҳои ибтидоӣ Сафар Нурматзода ва Мирҷумъа Бобозода иштирок намуданд. Дар кори ҷаласаи Шӯрои шаҳрии Ҳаракат намояндаи Шӯрои вилоятии Ҳаракати ҷамъиятии ваҳдати миллӣ ва эҳёи Тоҷикистон Дилором Ҷабборова иштирок ва баромад намуд. Дар интиҳо Раиси Шӯрои шаҳрии Ҳаракат Матлубахон Амонзода сухан ронда, доир ба вазифаҳои аъзои Шӯро ва ташкилотҳои ибтидоӣ дастуру супоришҳо дод.

“Шифо” 30-сола шуд

Дар толори КВД «Осоишгоҳи Шифо» ҷамъомади ботантана бахшида ба 30-солагии таъсиси муассиса ба вуқӯъ пайваст.

Ҷаласаро бо сухани ифтитоҳӣ директори КВД «Осоишгоҳи Шифо» Толиб Ахмедов оғоз бахшид. Сардухтури КВД «Осоишгоҳи Шифо» кардиологи дараҷаи олӣ, Аълочии соҳаи тандурустии ҷумҳурӣ, Шаҳрванди фахрии шаҳр, номзади илмҳои тиб Шарифҷон Абдуллоев доир ба таърихи муассиса ва давраҳои рушди он маърӯза намуд.

Боғи навбунёди миробон

Тибқи дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ва мақомоти иҷроияи ҳокимияти давлатии вилояти Суғд бо иштироки Раиси шаҳр Матлубахон Амонзода дар муассисаи қитъаи обтаъминкунии шаҳри Гулистон маъракаи ниҳолшинонӣ доир гардид, ки дар ҷараёни он зиёда аз 100 бех ниҳолҳои гелосу шафтолу шинонида шуд.

Ҳамчунин Раиси шаҳр бо масъулини ин идора супориш дод, ки анъанаи ниҳолшинониро идома дода, дар сарсабзу хуррам гардидани муҳити атроф саҳми босазои худро гузоранд.