…Хандаи ҳусн

Дар маркази вилоят-шаҳри Хуҷанд озмуни «Тарроҳи беҳтарини либосҳои миллӣ ва хандаи ҳусн» ба ифтихори Соли оила баргузор гардид. Озмун аз рӯи панҷ шарт сурат гирифт. Намояндагони шаҳри Қайроққум Меҳрона Кабирова, Шаҳноза Султонова, Холида Эшматова, Мавзуна Сайфуллозода ва Нилуфар Раҳимова дар иҷрои шартҳои озмунӣ таҳти сарварии мудири бахши кор бо занон ва оила Муслимахон Исоқова фаъолнокӣ нишон доданд.

Мавзуна Сайфуллозода аз рӯи навъи либоси миллӣ маҳорати баланд намоиш дод ва мақоми аввалро соҳибӣ кард.

Семинар-машварат

Доир ба мавзӯи "Пешгирии гаравидани ҷавонон ба гурӯҳҳои террористӣ, экстремистӣ, равияҳои нодурусти мазҳабию динӣ ва дигар гурӯҳҳои ифротию ғайриқонунӣ" дар МТМУ-и №14 семинар - машварат бо хонандагони синфҳои болоӣ гузаронида шуд.

Мудирони бахши кор бо бонувон, кор бо ҷавонони КИ ҲХДТ дар шаҳри Қайроққум Саёҳат Бадалова ва Анис Ҳотамӣ доири мавзӯи номбурда ҳарф заданд. Дар фарҷоми чорабинӣ хонандагон фикру андешаҳои худро нисбати терроризм ва экстремизм баён карда, якдилона изҳор доштанд, ки аз доғҳои номатлуби ҷомеа хешро канор хоҳанд гирифт.

Зарчашма: ду синфхона бунёд ёфт

Бо ҷонибдорӣ аз дастуру ҳидоятҳои Сарвари давлат Эмомалӣ Раҳмон ҳоҷиён ва соҳибкорони деҳаи Зарчашмаи Ҷамоати шаҳраки Адрасмон барои толибилмони МТМУ-и №12 дасти сахо бикшоданд. Бо мадади онҳо ду синфхонаи технология барои омӯзиши дарси таълими меҳнат бо тамоми шароитҳои замони муосир дар рӯзҳои таҷлили ҷашни соҳибистиқлолии кишвар мавриди баҳрабардорӣ қарор гирифт. Дар маросими ифтитоҳ раиси Ҷамоати шаҳраки Адрасмон Сафар Нурматов ва намояндаи шуъбаи маорифи шаҳр Валиҷон Қамбаров иштирок ва баромад намуданд.

-Чунин иқдому амалҳои хайр дар оянда низ идома хоҳад ёфт, -зимни сӯҳбат иброз дошт сарвари мактаб Улуғбек Хоҷаев.

Вохӯрӣ бо вакил

11-уми сентябр дар шаҳраки Зарнисор вохӯрии вакили Маҷлиси намояндагони Маҷлиси Олии Ҷумҳурии Тоҷикистон аз ҳавзаи интихоботии Мастчоҳ №18 Оқилзода Нурулло бо бошандагони инҷо доир гардид. Вохӯрию суҳбатҳои рӯ ба рӯ дар беморхона, МТМУ-и №10 ва маҳаллаи Сардобсой ҷараён гирифт.

Оқилзода Нурулло дар равиши баромад нуктаҳои асосии Паёми Президенти мамлакатро ба Маҷлиси Олии Ҷумҳурии Тоҷикистон мавриди таҳлил қарор дод.