Пешвои миллат Эмомалӣ Раҳмон Муассисаи таҳсилоти миёнаи умумии №25-ро дар деҳаи Нурбахши ноҳияи Данғара ифтитоҳ намуданд

17 июн Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба деҳаи Нурбахши деҳоти Лолазори ноҳияи Данғара ташриф оварда, Муассисаи таҳсилоти миёнаи умумии рақами 25-ро ифтитоҳ намуданд.

Дар саҳни муассисаи навбунёди таълимӣ Пешвои миллат муҳтарам Эмомалӣ Раҳмонро хонандагону омӯзгорони ин боргоҳи илму маърифат гарму самимӣ истиқбол гирифтанд.

Мавриди зикр аст, ки муассисаи нави таълимӣ дар партави сиёсати маорифпарваронаи Президенти Ҷумҳурии Тоҷикистон ҷиҳати фароҳам овардани шароити арзандаи таълим барои насли наврасу ҷавон бо тарҳи муосир ва ҷавобгӯ ба меъёрҳои байналмилалӣ сохта шудааст.

Бинои мактаб аз ду ошёна иборат буда, барои 1240 ҷойи нишаст дар ду баст бунёд гардид. Муассисаи навсохт аз 27 синфхонаи барҳаво, аз ҷумла кабинетҳои фаннии химия, физика, математика, биология, астраномия, табиатшиносӣ, синфхонаҳои таълими меҳнат, омӯзиши ҳунарҳои мардумӣ, синфхонаи компютерӣ, китобхона, утоқҳои корӣ барои омӯзгорон ва кормандон, инчунин ҳуҷраҳои ёрирасон иборат мебошад. Дар муассиса маҳфили шоҳмотбозӣ амал мекунанд, ки хонандагон дар ин сабқати зеҳнӣ фаъолона ширкат меварзанд.

Сарвари давлат Эмомалӣ Раҳмон «Обанбори оби нӯшокии Офтобрӯя»-ро дар деҳоти Лолазори ноҳияи Данғара мавриди баҳрабардорӣ қарор доданд

17 июн Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар деҳоти Лолазори ноҳияи Данғара “Обанбори оби нӯшокии Офтобрӯя”-ро мавриди баҳрабардорӣ қарор дода, бо гардиш додани мурвати шоҳқубури асосӣ ба таъминоти аҳолии деҳаҳои Остона, Осмондара ва Оламафрӯз ба оби нӯшокӣ оғоз бахшиданд.

Иттилоъ дода шуд, ки оби нӯшокӣ худҷорӣ буда, аз масофаи 1300 метр тавассути қубури полиэтилении қутраш 200 миллиметра ба обанбор интиқол меёбад.  Бояд гуфт, ки лоиҳаи таъминоти оби нӯшокӣ дар ду марҳила амалӣ мешавад.

Марҳилаи аввал деҳаи Остонаро дар бар гирифта, аллакай пурра татбиқ гардид. Марҳилаи баъдӣ деҳаҳои Осмондара ва Оламафрӯзи ноҳияи Данғараро фаро мегирад, ки бо татбиқ шудани он сокинони деҳот бо оби тоза таъмин хоҳанд шуд. Дар маҷмуъ дар деҳаҳои Остона, Осмондара ва Оламафрӯз 8 ҳазору 470 сокин зиндагӣ мекунанд. Қаблан аҳолӣ аз норасоии оби нӯшокӣ танқисӣ мекашид. Акнун, дар партави сиёсати инсонпарваронаи Пешвои миллат муҳтарам Эмомалӣ Раҳмон сокинон бо оби нӯшокӣ таъмин шуданд. Дар доираи амалишавии марҳилаи аввали лоиҳаи таъминоти аҳолӣ бо оби нӯшокӣ аз “Обанбори оби нӯшокии Офтобрӯя” то деҳаи Остона 7 километр хати асосии оби худҷорӣ ва дар шафати кӯчаҳо, дохили бинову иншооти соҳаи маорифу тандурустӣ ва варзишу хизматрасонии ҳудуди деҳа 3,5 километр хати оби тоза кашида шуда, дар умум масофаи хати оби нӯшокӣ 10,5 километрро ташкил медиҳад.

ВАҲДАТ – САРЧАШМАИ СУЛҲУ СУБОТИ КИШВАР

Тибқи нақша ба ифтихори Рӯзи Ваҳдати миллӣ дар корхонаву муассисаҳо, ташкилоту идора ва ҷамоати шаҳракҳои Гулистон рӯзи ягонаи ахбори сиёсӣ дар мавзўи “Ваҳдат-сарчашмаи сулҳу суботи кишвар” муташаккилона ва дастҷамъона бо риояи қоидаҳои беҳдоштӣ баргузор гардид. Аз ҷумла, хониши сиёсӣ бо иштироки тарғиботчиёни мақомоти иҷроияи ҳокимияти давлатии  вилояти Суғд дар толори муассисаи кумаки аввалияи тиббию  санитарӣ ва толори бахши фарҳанг бо кормандони соҳаи тиб ва фарҳанг ба вуқӯъ пайваст.

Тарғиботчиёни вилоятӣ собиқадори соҳаи фарҳанг Хайринисо Раҳимова, устоди ДДҲБСТ Абдураҳмон Мирзоев ва дотсенти ДДХ ба номи академик Бобоҷон Ғафуров Абдуазиз Бобоев доир ба ғояи ваҳдати миллӣ ва таҳкими дастовардҳои истиқлолияти давлатӣ суханронӣ намуданд. Зикр гардид, ки Ваҳдати миллӣ асоси оромию осудагии мардум дар саросари кишвари маҳбубамон буда, тоҷикистониёнро ба мафкураи ягонагӣ, бародариву баробарӣ сарҷамъ кардааст. Маҳз барои ба даст овардани Ваҳдати миллӣ нақши асосиро Президенти Ҷумҳурии Тоҷикистон, Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон ҳамчун шахсияти барҷастаи таърихии миллат иҷро намудаанд, ки дар иҷлосияи шонздаҳуми Шӯрои Олии Ҷумҳурии Тоҷикистон Сарвари давлат интихоб гардида, дар бунёди низоми давлатдории Тоҷикистони соҳибистиқлол, барқарорсозии сохти конститутсионӣ ва ба даст овардани сулҳу ваҳдати миллӣ саҳми беназир гузоштанд.

ҒАЛАБАИ МУҲИМИ “ГУЛИСТОН” ДАР МАЙДОНИ ХУД

Дар варзишгоҳи марказии шаҳри Гулистон дар доираи даври ҳафтуми чемпионати Тоҷикистон байни дастаҳои Лигаи дуюм (минтақаи Суғд) оид ба футбол вохӯрии дастаҳои “Гулистон”-и шаҳри Гулистон ва “Зарафшон”-и ноҳияи Ҷаббор Расулов ба вуқӯъ пайваст.

Дастаҳо бо чунин ҳайат ба майдон баромаданд: дастаи “Гулистон”-и шаҳри Гулистон дарвозабон – Парвиз Зокиров, ҳимоятгарон – Музаффар Бобоҷонов (сардори даста), Эҳсон Бобоев, Азизхон Абдусамиев, Рашид Мирхолиқов, нимҳимоятгарон – Сӯҳроб Сабуров, Ҳумоюн Азимов, Шараф Азизов, Анвар Темирхонов, ҳуҷумгарон – Салоҳиддин Одиназода ва Ҷурабой Исоев. Мураббии даста Фаррух Ниёзов. Дастаи “Зарафшон”-и ноҳияи Ҷаббор Расулов дарвозабон - Ислом Акрамов, ҳимоятгарон – Раббонӣ Муллоҳодизода, Бобур Имомқулов, Суннатулло Абдуллозода, Мирзосаид Саидов, нимҳимоятгарон – Хурсанд Эмомзода, Бахтиёр Азизӣ, Абдумалик Қирғизбоев, Дониш Саидзода, ҳуҷумгарон – Акмал Пӯлотов ва Шаҳзод Нурматов. Мурабии даста Беҳрӯз Гулов. Довари мусобиқа Дилшод Абдуллоев.