ПЕШСАФИИ “ГУЛИСТОН” ИДОМА ДОРАД

Дар варзишгоҳи марказии шаҳри Гулистон дар доираи даври нуҳуми чемпионати Тоҷикистон байни дастаҳои Лигаи дуюм (минтақаи Суғд) оид ба футбол санаи 30-юми июни соли ҷорӣ вохӯрии дастаҳои “Гулистон”-и шаҳри Гулистон ва “Суғдиён”-и шаҳри Бӯстон ба вуқӯъ пайваст.

Қисми аввалӣ бозӣ ҷолибу диданӣ сурат гирифт. Бозингарони дастаи “Гулистон”-и шаҳри Гулистон аз худ маҳорати баланди касбӣ нишон дода, имкониятҳои зиёди голзаниро ба вуҷуд оварданд, ки дар натиҷа ҳуҷумкори даста Салоҳиддин Одиназода ба задани 3 тӯб ба дарвозаи ҳариф мушарраф гардид. Бозингарони дастаи меҳмон низ кӯшиши зиёд намуда дар қисми аввал ба задани як тӯб ноил гардиданд. Бо натиҷаи 3 – 1 қисми аввали бозӣ ба охир расид.

Дар қисми дуюми бозӣ футболбозони дастаи “Суғдиён”-и шаҳри Бӯстон ташаббусро ба даст гирифта голи дуюми худро ба ҳадаф расондиданд. Пас аз голи меҳмонон бозӣ ранги дигар гирифт ва дар натиҷаи ҳуҷумҳои пайиҳам футболбозони гулистонӣ ба задани 2 голи дигар даст ёфтанд, ки голҳоро ҳуҷумгарон Салоҳиддин Одиназода ва Ранҷид Ёрматов ба ҳадаф расониданд.

Маҷлиси Ҳукумати Ҷумҳурии Тоҷикистон баргузор гардид

30 июн таҳти раёсати Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, Раиси Ҳукумати Ҷумҳурии Тоҷикистон муҳтарам Эмомалӣ Раҳмон маҷлиси Ҳукумати Ҷумҳурии Тоҷикистон баргузор гардид.

Дар кори маҷлис нахуст масъала Дар бораи Нақшаи кори Ҳукумати Ҷумҳурии Тоҷикистон дар нимсолаи дуюми соли 2021 мавриди баррасӣ қарор дода шуд.

Таъкид гардид, ки дар нақшаи корӣ аз тарафи вазорату идораҳо ва мақомоти иҷроияи ҳокимияти давлатӣ дар нимсолаи дуюми соли 2021 дар маҷмуъ 8 масъала ва 6 чорабинии дорои аҳамияти ҷумҳуриявӣ ва байналмилалӣ пешниҳод гардидааст. Нақшаи кори Ҳукумати Ҷумҳурии Тоҷикистон дар нимсолаи дуюми соли 2021 бо мақсади фаъолияти боз ҳам босамари Ҳукумати Ҷумҳурии Тоҷикистон таҳия ва пешниҳод карда шудааст.

Сарвари давлат муҳтарам Эмомалӣ Раҳмон ба Ҳукумати Ҷумҳурии Тоҷикистон ҷиҳати иҷрои ҳатмӣ ва босифати чорабиниҳои нақшаи корӣ дастуру супоришҳои мушаххас доданд.

САЛОМАТИИ ШУМО ДАР ДАСТИ ШУМОСТ!

Бо мақсади пешгирии интиқол ва паҳншавии  бемории сироятии коронавирус Ковид – 19 дар шаҳри Гулистон аъзои ситоди шаҳрӣ масъулини бахшҳои кор бо занон ва оила, кор бо ҷавонон ва варзиш, танзими анъана ва ҷашну маросим, кор бо ноболиғон ва маркази санитарию эпидемиологӣ ба сокинони шаҳр дар нуқтаҳои савдо, хизматрасонӣ ва кӯчаву маҳал корҳои фаҳмондадиҳӣ гузарониданд.

Ба сокинон таъкид гардид, ки дар ҷойҳои ҷамъиятӣ ва маконҳои серодам беҳуда гашту гузор нанамоянд, ҳангоми зарурат ва гашту гузор аз ниқобҳои тиббӣ истифода баранд, гигиенаи шахсӣ ва тавсияи табибонро риоя намоянд. Бо ин роҳ худ ва атрофиёнро аз сирояти коронавируси Ковид – 19 эмин нигоҳ доранд.

Мақомоти иҷроияи ҳокимияти давлатии шаҳри Гулистон баҳри пешгирии интиқол ва паҳншавии бемории сироятии коронавирус Ковид – 19 тадбирҳои заруриро андешидааст ва дар доираи нақшаи чорабиниҳо корҳои тарғиботӣ ва фаҳмондадиҳӣ бомаром идома меёбанд.

Аз сокинон низ даъват ба амал оварда мешавад, ки барои ҳифзи саломатии худ беаҳамият набошанд, чун илоҷи воқеа пеш аз вуқӯъ гуфтаанд.

Пешвои миллат Эмомалӣ Раҳмон Президенти ширкати байналмилалии «Гленкор» Айван Глазенбергро ба ҳузур пазируфтанд

29 июн Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Президенти ширкати байналмилалии «Гленкор» (Glencore International AG) Айван Глазенбергро ба ҳузур пазируфтанд.

Дар ҷараёни мулоқот ҳолати кунунӣ ва дурнамои робитаҳои тиҷоратӣ, иқтисодию сармоягузории Тоҷикистон ва Швейтсария, баррасӣ карда шуд.

Таъкид гардид, ки дар Тоҷикистон беш аз 25 ширкати швейтсариягӣ ё ширкатҳои муштарак бо иштироки сармоягузорони Швейтсария дар соҳаҳои мухталифи иқтисоди Тоҷикистон фаъолият мекунанд ва шарикии самараноки ширкати “Гленкор” бо “ТАЛКО” дар соҳаи истеҳсоли алюминий намунаи хуби чунин ҳамкориҳо мебошад. Ҳаҷми умумии гардиши тиҷорат миёни ду ширкат танҳо дар 5 соли охир беш аз як миллиард долларро ташкил дод.