Президенти Ҷумҳурии Тоҷикистон Эмомалӣ Раҳмон бо Президенти Федератсия Россия Владимир Путин суҳбати телефонӣ анҷом доданд

Имрӯз Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Президенти Федератсия Россия муҳтарам Владимир Путин суҳбати телефонӣ анҷом доданд.

Дар оғози суҳбат роҳбарони ду давлат ҳамдигарро бо муносибати фарорасии Соли Нави 2021-ум самимона табрик гуфтанд.

Дар қаринаи табрикоти худ Роҳбари давлати мо, аз ҷумла ба мардуми дӯсти Россия дар роҳи пешрафт ба сӯи шукуфоиву тараққӣ дар оянда ҳам собитқадамӣ орзу намуд.

Қайд карда шуд, ки ҷонибҳо, сарфи назар аз мушкилоти соли равони вобаста ба пандемияи коронавирус, тавонистанд, ки як силсила чорабиниҳои барои кишварҳои худ муҳимми сиёсӣ, аз ҷумла раъйпурсии умумроссиягӣ оид ба ворид кардани тағйирот ба Қонуни Асосии кишвар ва интихоботи парламентиву президентӣ дар Тоҷикистонро муваффақона анҷом диҳанд. Дар ин зимн ҳамчунин аҳаммияти чорабиниҳои бахшида ба ҷашни 75-солагии Ғалаба дар Ҷанги Бузурги Ватанӣ, ки ифодагари ҳамдилии халқҳои ду кишвар мебошанд, қайд карда шуд.

Президенти Ҷумҳурии Тоҷикистон Эмомалӣ Раҳмон рамзи 20 – солагии таъсиси Созмони ҳамкории Шанхайро тасдиқ намуданд

Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон рамзи 20 – солагии таъсиси Созмони ҳамкории Шанхайро тасдиқ намуданд.

Рамзи мазкур дар намуди адади «20» дар шакли мудаввар кашида шуда, дар қисми болоии он парчамҳои давлатҳои аъзои Созмони ҳамкории Шанхай, дар қисми поёнӣ – атлас, ҳамчун нишонаи фарҳанги мардуми тоҷикон ва дар мобайни он навиштаҷоти Душанбе 2021 ҳамчун макони баргузории чорабинӣ тасвир ёфтаанд.

Дар ҳалқаи дуюм навиштаҷоти Созмони ҳамкории Шанхай ба забонҳои русӣ ва хитоӣ ҷой дода шудааст. Дар маркази давра сайёраи Замин тасвир ёфтааст.

ТУҲФАҲОИ СОЛИНАВӢ

Тибқи дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти дастгирии кўдакони ятим ва аз оилаҳои камбизоат дар арафаи Соли нави мелодӣ аз ҷониби мақомоти иҷроияи ҳокимияти давлатии шаҳри Гулистон ва соҳибкор Турсуной Зокирова туҳфаи солинавӣ дар маркази фароғатии бачагонаи “Манижа” тақдим гардид.

Раиси шаҳр Бахтиёр Саидаҳмадзода бо тазаккури дастовардҳои соли куҳан ва нақшаву ниятҳои неки соли нав бачаҳоро бо Соли нави мелодӣ сидқан шодбош гуфт. Зикр карда шуд, ки кӯдакон дар паноҳи давлат ҳастанд ва мақомоти иҷроияи ҳокимияти давлатии шаҳр дар пайгирӣ аз сиёсату иқдоми ғамхоронаи Пешвои миллат ва давлат ҳамеша баҳри дастгирии моддию маънавии кӯдакону наврасон ва фароҳамсозии шароитҳои созгори таълиму тарбия ва зисту зиндагонии онҳо амалан мусоидат менамояд.

АЁДАТИ СОБИҚАДОРОН

Дар арафаи Соли нави мелодӣ Раиси шаҳр Бахтиёр Саидаҳмадзода як қатор собиқадорони меҳнатро аёдат намуд. Собиқадорон-Шаҳрвандони фахрии шаҳри Гулистон Муҳсин Раҳимов - Қаҳрамони меҳнати сотсиалистӣ, Санавбар Нуриллоева, Каромат Қосимова ва Рима Беляева солҳои зиёд баҳри пешбурди соҳаҳои мухталифи иқтисодиёту иҷтимоиёти шаҳри Гулистон заҳмат кашида, саҳмгузорӣ намудаанд. Ба онҳо туҳфаҳои мақомоти иҷроияи ҳокимияти давлатии шаҳри Гулистон тақдим гардида ва барои хизматҳои шоёнашон ҷиҳати шукуфоии диёри маҳбуб изҳори сипос карда шуд.

Аёдатшудагон барои ғамхории рӯзафзун ба Пешвои муаззами миллат сипосмандии хешро изҳор намуданд.