Боздиди Раиси вилоят Раҷаббой Аҳмадзода аз Неругоҳи барқи обии “Қайроққум”

Раиси вилояти Суғд Раҷаббой Аҳмадзода дар шаҳри Гулистон бо фаъолияти Неругоҳи барқи обии “Қайроққум” шинос гардид.

Чуноне аснои шиносоӣ иттилоъ дода шуд, дар шаҳри Гулистон лоиҳаи «Таҷдиди Неругоҳи барқи обии “Қайроққум” амалӣ гардида истодааст. Бо татбиқи пурраи лоиҳаи “Таҷдиди Неругоҳи барқи обии Қайроққум”, ки муҳлати он 57 моҳ, яъне то соли 2023 муайян шудааст, таҷдиди таҷҳизоти асосию ёрирасони неругоҳ, дастгоҳи тақсимкунандаи 110-киловолтаи неругоҳ ва таъмиру барқарорсозии иншооти гидротехникии он амалӣ гардида, иқтидори лоиҳавии ҳар як агрегати неругоҳ аз 21 мегаватт қариб то 30 ва дар маҷмӯъ тавоноии неругоҳ аз 126 мегаватт то ба 176 мегаватт расонида мешавад.

Дар маҷмӯъ бо татбиқи пурраи лоиҳа иқтидори Неругоҳи барқи обии “Қайроққум” 50 мегаватт зиёд гардида, истеҳсоли миёнаи неруи барқ то ба 38 фисад афзоиш ёфта, таъминоти аҳолӣ ва соҳаҳои гуногуни иқтисодии вилояти Суғд бо неруи барқ ба таври назаррас баланд ва беҳтар хоҳад шуд.

Дар шаҳри Гулистон боғи истироҳатии “Темурмалик” азнавсозӣ карда мешавад

Ба истиқболи ҷашни бузурги миллӣ - 30-солагии Истиқлолияти давлатии Ҷумҳурии Тоҷикистон дар шаҳри Гулистон таҳти шиори «1300 – рӯзи меҳнати зарбдор ба истиқболи 30-солагии Истиқлолияти давлатии Ҷумҳурии Тоҷикистон» корҳои ободониву бунёдкорӣ ҷараён дорад.

Дар ин замина, алҳол дар ҳудуди шаҳр корҳои сохтмонӣ, хуррамгардонӣ ва бунёдкорӣ густариш ёфта, давоми солҳои 2018-2020 157 иншоот ба маблағи беш аз 310 миллион сомонӣ бунёд ва азнавсозӣ гардидааст.

Бунёду навсозии иншооти гуногун дар шаҳр идома дошта, дар доираи омодагиҳо ба ҷашни таърихӣ боғи истироҳатии “Темурмалик” низ азнавсозӣ карда мешавад. Тавре зимни муарифии лоиҳаи боғи мазкур ба Раиси вилоят Раҷаббой Аҳмадзода иттилоъ дода шуд, масоҳати боғи “Темурмалик” 3 гектарро ташкил намуда, он дар соҳили “Баҳри тоҷик” ҷойгир мебошад. Рӯзҳои наздик корҳои таҷдиду навсозии боғ оғоз ёфта, барои меҳмонону сокинони ин минтақаи сайёҳии кишвар боз як макони зебову истироҳатӣ ба истифода дода мешавад.

Президенти мамлакат Эмомалӣ Раҳмон бо рафти корҳои сохтмонӣ дар Майдони «Истиқлол» шинос шуда, дарахт шинониданд

7 январ Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ бо рафти корҳои сохтмонӣ дар Майдони “Истиқлол” шинос шуда, дарахт шинониданд.

Ёдовар мешавем, ки ба корҳои сохтмонӣ дар ин иншооти муҳим 10 июли соли 2020 Сарвари давлат муҳтарам Эмомалӣ Раҳмон ва Раиси шаҳри Душанбе муҳтарам Рустами Эмомалӣ оғоз бахшида буданд.

Масоҳати умумии Майдони “Истиқлол” 30 гектар буда, 2,7 гектарашро макони баргузории чорабиниҳои сиёсӣ ташкил медиҳад ва он дар ҳудуди хиёбони Рӯдакӣ, кӯчаҳои Саид Носир, Ҳабиб Аҳрорӣ ва Ойгули пойтахт воқеъ аст.

Дар маъракаи имрӯзаи ниҳолшинонӣ Пешвои миллат ва Раиси шаҳри Душанбе ниҳоли дарахтони сӯзанбарги кабуд шинониданд, ки аз Италия ворид гардидааст.

МУЛОҚОТ БО ВАКИЛОН

Дар Кохи фарҳангии “Истиқлол”-и шаҳри Гулистон тибқи нақша мулоқоти вакилони Маҷлиси намоядагони Маҷлиси Олии Ҷумҳурии Тоҷикистон бо интихобкунандагон баргузор гардид. Мулоқотро мувоини якуми Раиси шаҳри Гулистон Нуринисо Комилзода ифтитоҳ бахшида, ҳадафҷи онро ба ҳозирин шарҳ дод.

Сипас вакили Маҷлиси намояндагони Маҷлиси Олии Ҷумҳурии Тоҷикистон аз ҳавзаи интихоботии №18, “Мастчоҳ” Ғайрат Азиззода доир ба фаъолияти вакили худ дар давоми соли 2020 иттилоъ дод. Ҳамзамон, мавсуф аз дастоварди муҳими Истиқлолияти давлатӣ ҳарф зад ва мазмуну моҳияти соҳибистиқлолиро ба ҳозирин шарҳ дода, аз ҷумла зикр дошт, ки Истиқлолияти давлатӣ дар баробари ваҳдати миллӣ, ватан, ватандорӣ, худшиносиву, худогоҳӣ бояд мояи ифтихор ва нангу номуси миллии ҳар фарди ҷомеаи Тоҷикистон гардад. Ғайрат Азиззода, ҳамзамон Муроҷиатномаи Ширкати «Барқи тоҷик»-ро низ шарҳ дода, аз ҷумла афзуд, ки сарфаи ҳар як килловат неруи барқ ба манфиати худи мардуми Тоҷикистон аст. Аз ин лиҳоз фарҳанги истифодабарии онро мо ба мардум фаҳмонем, ки ба манфиати иқтисодиашон мебошад.