ҲИФЗИ ВАТАН ШАРАФ АСТ

Дар ҷамоати шаҳраки Консой маросими ботантанаи гусели ҷавонписарони шуҷоатманд ба хизмати ҳатмии ҳарбӣ баргузор гардид.

Маросими гусели даъватшавандагони ихтиёриро раиси ҷамоати Консой Баҳодур Сайдуллоӣ бо сухани ифтитоҳӣ ҳусни оғоз бахшид. Сипас раиси ташкилоти ибтидоии собиқадорони меҳнати шаҳрак Зулхумор Холиқова, модари даъватшаванда Саодат Абдураҳмонова доир ба қарзи муқаддаси ҳар як шаҳрванд ҳарф заданд. Зикр карда шуд, ки хизмат кардан ба Ватан дар сафи Артиши Миллӣ аслан хизмат кардан ба падару модар ва бародарону хоҳарони машғули меҳнати осоишта мебошад. Зеро Ватан ва миллат ин ду рукни муқаддас аст, ки ба ҷуз онҳо ҳеҷ як нафар сари баланду ифтихори инсонӣ дошта наметавонад. Аз ин рӯ, дар урфият мегӯянд: «Ҳифзи ҷон воҷиб асту ҳифзи Ватан воҷибтар аст».

Барқияи табрикии Президенти Ҷумҳурии Тоҷикистон Эмомалӣ Раҳмон ба Раиси Ҷумҳурии Мардумии Чин Си Ҷинпин

Дирӯз Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Раиси Ҷумҳурии Мардумии Чин Си Ҷинпин барқияи табрикӣ ирсол намуданд, ки дар он омадааст:

«Муҳтарам ҷаноби Раис,

Бо таманниёти беҳтарин аз номи Ҳукумат ва мардуми Тоҷикистон, ҳамчунин шахсан аз номи худам Шумо ва тамоми мардуми дӯсти Чинро ба муносибати ҷашни санаи дорои аҳаммияти таърихӣ — 70-мин солгарди таъсисёбии Ҷумҳурии Мардумии Чин сидқан табрику муборакбодӣ менамоям.

Тайи ин давра Ҷумҳурии Мардумии Чин дар бахшҳои мухталифи рушди сиёсӣ, иҷтимоиву иқтисодӣ ва илмиву техникӣ ба пешравиҳои азим ноил гардида, дар арсаи байналмилалӣ обрӯ ва эътибори баландро соҳиб шуд.

Ҳамаи ин дастовардҳои бошукӯҳ, албатта, натиҷаи заҳмату меҳнати хастанопазири тамоми мардуми Чин ва роҳбарияти сиёсии он мебошад.

АЁДАТИ ПИРОНСОЛОН

Ҳамасола рӯзи 1-уми октябр дар кишвар Рӯзи пиронсолон ҷашн гирифта шуда, ин қишри табарруки аҳолӣ, ки таҷрибаи бою тӯлонии зиндагӣ ва фаъолияти меҳнатӣ доранд аз тарафи масъулин аёдат карда мешаванд. Дар даврони соҳибистиқлолии ҷумҳурӣ ин табақаи аҳолӣ ба ғамхориҳои давлату ҳукумат фаро гирифта мешаванд.

Бо супориши Раиси шаҳри Гулистон Фирдавс Шарифзода масъулини мақомоти иҷроияи ҳокимияти давлатии шаҳр дар ин рӯз 20 нафар пиронсолонро аёдат карда, ба онҳо туҳфаҳои Раиси шаҳрро дар вазъи тантанавӣ супориданд. Аз ҷумла, дар маркази шаҳр масъулин Анастасия Петроваи 102 сола ва Ҳафиза Камоловаи 92 сола аёдат гардида, ба эшон туҳфаҳо ва маводҳои хӯрокворӣ супорида шуд.

ҲАШАРИ ДАСТАИ “АВАНГАРД”

Дар Боғи фарҳангӣ-фароғатии “Темурмалик”-и маркази шаҳри Гулистон гурӯҳи ҷавонони фаъоли “Авангард”-и шаҳр (роҳбарони гурӯҳ Рухшона Содиқзода ва Фирдавс Нурматзода) бо мақсади хуррамгардонии ин марказ ва ободонии атрофи муҷассамаҳои “Хотира” ва “Ленин” ҳашар гузарониданд.

Дар ҷараёни ҳашар гурӯҳи “Авангард”-и МҒД “Коллеҷи тиббӣ” (сардорони гурӯҳ Комилҷон Аслонов, Бинусрат Ҷӯраева) фаъолона иштирок карда, гирду атрофи боғро аз партову хасрӯбаҳо тоза намуданд. Бояд зикр кард, ки гурӯҳи “Авангард”-и Муассисаи ғайридавлатии “Коллеҷи тиббӣ”-и шаҳри Гулистон яке аз дастаҳои калонтарини гурӯҳ маҳсуб ёфта, ба он беш аз 225 нафар шомил буда, ҳадафи асосии гурӯҳ пешгирии ҳуқуқвайронкунӣ дар байни ноболиғон ва ҷавонон, ширкати фаъолона варзидан дар чорабиниҳои умумишаҳрӣ, гузаронидани аксияҳо, мулоқоту вохӯриҳо ва монанди ин мебошад.