Конференсияи ХХI ҲХДТ дар шаҳри Гулистон

Дар толори калони мақомоти иҷроияи ҳокимияти давлатии шаҳр Конференсияи ХХI ҲХДТ дар шаҳри Гулистон баргузор гашт. Дар Конференсия аз 35 ташкилотҳои ибтидоӣ 120 вакил, инчунин намояндагони дигар аҳзоби сиёсӣ, ташкилотҳои ҷамъиятӣ ва роҳбарони корхонаву муассиса ва идораҳо ба ҳайси даъватшудагон ширкат варзиданд.

Тибқи рӯзномаи Конференсияи ХХI ҲХДТ дар шаҳри Гулистон масъалаҳои ҳисоботи Кумитаи иҷроияи ҲХДТ дар шаҳри Гулистон дар давраи аз моҳи октябри соли 2014 то моҳи майи соли 2017, ҳисоботи Комиссияи тафтишотӣ дар давраи ҳисоботӣ, интихоби ҳайати нави Кумиҷроияи шаҳрӣ, интихоби ҳайати нави Комиссияи тафтишотӣ ва интихоби вакилон ба Конференсияи ХII ҲХДТ дар вилояти Суғд мавриди баррасӣ қарор дода шуданд. Доир ба масоили баррасишуда Конфекренсия қарорҳои дахлдор қабул намуд.

Майдони нави варзишӣ

Тибқи нақшаи мақомоти иҷроияи ҳокимияти давлатии шаҳр дар ҳудуди шаҳри Гулистон чорабиниҳои гуногуни сиёсиву иҷтимоӣ, фарҳангиву варзишӣ, тавсеаи корҳои бунёду азнавсозӣ ва таъмиру тармими иншооти варзишӣ дар доираи Соли ҷавонон ба хотири дастгирии ҷавонону наврасон, дар онҳо бедор намудани ҳисси худшиносиву худогоҳии миллӣ, ташаккули тарзи ҳаёти солим, ҷалби ҷавонон ба бунёдкориву созандагӣ ва ба варзишу солимгардонӣ тақвият меёбанд.

Имрӯз дар шафати соҳили «Баҳри тоҷик» боз як иншоот барои ҷавонон ифтитоҳ гардид. Майдончаи сунъии варзишӣ бо андозаи 42х22 метр барои тамрин ва баргузории мусобиқаҳо оид ба футбол барои ҷавонону наврасон бо ибтикори  мақомоти иҷроияи ҳокимияти давлатии шаҳр барои дӯстдорони ин намуди варзиш ба фаъолият шурӯъ намуд.

Ҳамоиш дар Гулистон

Дар толори бахши фарҳанги шаҳр бо иштироки  роҳбарони корхонаву муассисаҳо, ташкилотҳои шаҳр ва масъулини комиссияҳои ҷамъиятӣ оид ба танзими анъана ва ҷашну маросимҳо ҳамоиши илмӣ дар мавзӯи «Қонуни танзим - санади судманд ва манфиатбахши мардум» ба истиқболи 10-умин солгарди қабули Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон» баргузор гардид.

Мудири бахши оид ба корҳои дин, танзими анъана вам ҷашну маросимҳои миллии  мақомоти иҷроияи ҳокимияти давлатии шаҳр Манучеҳр Шарипов ва мудири шуъбаи рушди иҷтимоӣ ва робита бо ҷомеаи дастгоҳи раиси шаҳр Илҳом Мадализода доир ба тавзеҳ, манфиати ин қонуни миллӣ маърӯза намуданд. Тазаккур дода шуд, ки қонуни мазкур бо ибтикори Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қабул гардида, аз мавриди амал қарор гирифтани он даҳ сол сипарӣ мегардад, аз ҷумлаи иқдом ва амалҳои муҳими сиёсию ҳуқуқӣ ва иҷтимоию фарҳангиест, ки ба шуури ҷомеаи мо таъсири мусбати худро расонд.

Мо пайравони Пешвои миллатем

Ба ифтихори Соли ҷавонон ва таҷлили Рўзи ҷавонони Тоҷикистон роҳпаймоии ҷавонони маркази шаҳр, шаҳракҳо, корхонаву муассиса ва ташкилотҳо дар кўчаи марказии Истиқлоли Гулистон баргузор гардид. Дар роҳпаймоӣ варзишгарон, гирандагони стипендияҳои президентӣ, раиси шаҳр, кумиҷроияи шаҳрии ҲХДТ, ҷавонони ҷамоати шаҳракҳои Адрасмон, Сирдарё, Консой, Чоруқдаррон, Зарнисор, корхонаҳои «Қолинҳои Қайроққум», ҶДТКММ «Апрелевка», Шабакаҳои барқи Суғд, Нерўгоҳи барқи обӣ, намояндагони ҶДММ осоишгоҳи «Баҳористон», КВД осоишгоҳи «Шифо», кормандони соҳаи тандурустӣ, муҳассилини МТҒ Коллеҷи тиббӣ, муассисаҳои таълимӣ, ТҶҶ «Созандагони Ватан» беш аз се ҳазор нафар бо шиору хитобаҳои идона иштирок намуданд.

Тантанаҳои идона дар майдони назди Кохи фарҳангии «Истиқлол» идома ёфт. Намояндаи мақомоти иҷроияи ҳокимияти давлатии вилояти Суғд Карим Шариф ҷавонони гулситониро аз номи Раиси вилояти Суғд Абдураҳмон Қодирӣ шодбош намуд. Раиси шаҳри Гулситон Матлубахон Амонзода зимни суханронии хеш зикр кард, ки имрўз ҷавонони шаҳри Гулистон беш аз  27 дарсади теъдоди сокинонро ташкил дода, бо рўҳбаландиву ғайрати тоза дар тамоми самтҳои хоҷагии халқи шаҳр софдилона фаъолият бурда, дар ҳамаи чорабиниҳову маъракаҳои гуногуни сиёсиву иқтисодӣ, фарҳангиву иҷтимоӣ ва маърифативу варзишӣ саҳми назаррас ва нақши боризи худро гузошта истодаанд.