Президенти Ҷумҳурии Тоҷикистон Эмомалӣ Раҳмон бо Президенти Ҷумҳурии Ӯзбекистон Шавкат Мирзиёев суҳбати телефонӣ анҷом доданд

Имрӯз  Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Президенти Ҷумҳурии Ӯзбекистон муҳтарам Шавкат Мирзиёев суҳбати телефонӣ анҷом доданд.

Сарвари давлати мо бо таманниёти сидқии сиҳатмандии бардавом, комгорӣ дар фаъолият ва хушрӯзии комил Президенти Узбекистони дӯстро бо ҷашни зодрӯзаш самимона ва бародарвор табрику муборакбодӣ карда, дар шахсияти ӯ ба мардуми Ӯзбекистон шукуфоӣ ва сулҳу субот орзу намуданд.

Президенти Ҷумҳурии Тоҷикистон Эмомалӣ Раҳмон бо изҳори қаноатмандӣ аз рушди бомароми шарикии стратегии миёни ду кишвар нақши муассири Шавкат Мирзиёевро дар пешбурди ин раванди созанда махсус таъкид карданд.

САНОАТИКУНОНӢ ВА САЙЁҲӢ

Корхонаҳои саноатии шаҳр дар давоми шашмоҳаи аввал ба маблағи 1 миллиарду 565 миллион сомонӣ маҳсулот истеҳсол намуданд. Дар давраи ҳисоботӣ аз 33 корхонаи саноатии шаҳр 22-тои онҳо афзоиши ҳаҷми истеҳсоли маҳсулотро аз 100,0% то ба 2 маротиба зиёд таъмин карданд.

Дар ин давра корхонаҳои саноатии шаҳр бо 16 давлатҳо ҳамкорӣ намуданд. Маблағи маҳсулоти содиротии корхонаҳои саноатӣ 63,9 миллион доллари амрикоиро ташкил дод. Ҳамчунин, маблағи маҳсулоти воридотӣ ба 13,5 миллион доллари амрикоӣ баробар буда, фарқияти содирот аз воридот 4,7 маротиба зиёд шудааст.

Доир ба татбиқи ҳадафи чоруми миллӣ - саноатикунонии босуръати кишвар як қатор корҳо ба анҷом расонида шуданд. Пас аз ифтитоҳи корхонаи истеҳсоли арматура - Ҷамъияти дорои масъулияташ маҳдуди “Маҳмуди Компания” бо иштироки бевоситаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, Ҷаноби Олӣ муҳтарам Эмомалӣ Раҳмон корхона ба фаъолияти истеҳсолӣ шурӯъ намуд.

ҶАМЪБАСТИ ФАЪОЛИЯТИ НИМСОЛА

Дар толори бахши ҳифзи муҳити зист ҷаласаи ҳисоботии Шӯрои Ҳаракати ҷамъиятии ваҳдати миллӣ ва эҳёи Тоҷикистон дар шаҳри Гулистон бо иштироки аъзои Шӯрои шаҳрии Ҳаракати ҷамъиятии ваҳдати миллӣ ва эҳёи Тоҷикистон дар шаҳр, мудирони шуъба ва бахшҳои мақомоти иҷроияи ҳокимияти давлатии шаҳр, раисони ҷамоати шаҳракҳо доир гардид.

Дар ҷаласа ду масъала мавриди баррасӣ қарор гирифт: ҷамъбасти ҳисоботи Шӯрои шаҳрии Ҳаракати ҷамъиятии ваҳдати миллӣ ва эҳёи Тоҷикистон дар шашмоҳаи соли 2019 ва тасдиқи нақшаи Шӯрои шаҳрии Ҳаракати ҷамъиятии вахдати миллӣ ва эҳёи Тоҷикистон барои нимсолаи дуюми соли ҷорӣ.

Дар бораи фаъолияти Шӯрои шаҳрии Ҳаракат дар шашмоҳаи аввали соли 2019 котиби Шӯро, мудири шуъбаи рушди иҷтимоӣ ва робита бо ҷомеаи дастгоҳи Раиси шаҳр Илҳом Мадализода маърӯза намуд.

Таъмини рушди бомароми кишвар

Тибқи ҷадвали тасдиқгардидаи мақомоти иҷроияи ҳокимияти давлатии вилояти Суғд бо мақсади фаҳмонидани муҳтавои вохӯрии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо кормандони гумрук, молия, андоз ва бонк имрӯз дар шаҳри Гулистон мулоқоти аъзои Шӯрои мутобиқсозию методӣ оид ба таълим ва тарбияи ҳуқуқии шаҳрвандони вилояти Суғд дар толори бахши муҳити зисти шаҳр баргузор гардид.

Дар мулоқот муовини сардори Раёсати андоз дар вилояти Суғд Бурҳон Маъруфзода доир ба муҳтавои суханрониии Пешвои муаззами миллат дар вохӯрӣ бо кормандони соҳаҳои молия, андоз, гумрук ва бонкдории кишвар суханронӣ намуд. Сипас сардори шуъбаи муқовимат бо терроризму экстремизм ва назорати иҷрои қонунҳо дар самти амнияти миллӣ Прокуратураи вилояти Суғд Таваккал Файзуллозода, намояндаи Раёсати Хадамоти иҷро дар вилояти Суғд Меҳрафзун Нурзода баромад намуданд.