Футбол

5-уми март дар варзишгоҳи шаҳраки Адрасмон вохӯрии рафиқонаи дастаҳои «Адрасмон» ва «Қайроққум» доир гардид. Соҳибони майдон нисбати ҳарифон бартарӣ нишон дода, ба ҳисоби 2 бар 0 пирӯз шуданд. Тӯбҳоро ба дарвозаи меҳмонон Санъат Баротов ва Толибҷон Холқӯзиев ба ҳадаф расонданд.

Бо саъйи комил

Ба сарзамини биҳиштосои мо боз баҳор омад. Бо фаро расидани ин фасли зебои сол тадбирҳои тозаю озода намудани атрофи коргоҳу манзили зист, кӯчаву маҳаллаҳо ва шинонидани гулу ниҳолон оғоз ёфта, мардум шанбегиҳо мегузаронанд.

Дар робита ба ин амалҳои шоиста ва ҷонибдори аз иқдоми «500 рӯзи меҳнати зарбдор» тамоми бошандагони шаҳр рӯзи шанбе якдилонаю сарҷамъона ба ҳашар баромада, ба ниҳолшинонию кабудизоркунӣ, нармкунии бехи дарахтон ва тоза кардани саҳни биноҳо аз партов машғул шуданд. Аз ҷараёни хуби кор возеҳ буд, ки шаҳрвандон ба нишонаи хоси баҳор, зиндашавии табиат ва ба зиндагиву ояндаи нек дилгармона саъй доранд, то ҷашни Наврӯзи байналмилалро сазовор истиқбол ва дар ободии диёри азиз саҳми хешро гузоранд.

Истиқболи Рӯзи Модар

Чоруми март дар Кохи Истиқлол бо иштироки Раиси шаҳри Қайроққум Матлубахон Амонзода ба истиқболи Рӯзи Модар ҷамъомади тантанавӣ баргузор шуд. Раиси шаҳр Матлубахон Амонзода ҷашни Рӯзи Модарро, ки ба оғози баҳори нозанин рост омадааст, ба кулли сокинони шаҳр, бахусус ба модарону хоҳарон самимона шодбош гуфта, таъкид дошт: имрӯз гуфтаҳои Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмонро бори дигар хотиррасон менамоям:

«Имрӯз - дар замони истиқлолияти давлатамон моро лозим аст, ки ҷашни миллии аз хотирҳо рафтаи худ – Иди модаронро бо асолати азалиаш эҳё кунем, арвоҳи гузаштагони пуршарафи худро бори дигар шод гардонем ва бо ифтихор собит намоем, ки миллати мо ҳамчун мардуми соҳибтамаддун аз азал эҳтироми зан-модарро пос медорад».