Шукргузорӣ аз озодии эътиқод

Дар тамоми масоҷиди ҷомеи шаҳр субҳи 24 сентябр намози ид баргузор шуд. Ба муносибати Иди саиди Қурбон табрикоти Раиси шаҳри Қайроққум Матлубахон Амонзодаро намояндагони Мақомоти иҷроияи ҳокимияти давлатии шаҳр ба самъи намозгузорон расониданд.

Аз ҷумла, таъкид гардид, ки ин иди саид таҷассумгари эътиқод, имон, ғояҳои олии некию адолату инсондӯстӣ, рамзи раҳму шафқат ва меҳрубонӣ ба атрофиён мебошад.

Табрикоти Раиси шаҳри Қайроққум Матлубахон Амонзода ба ифтихори Иди Қурбон

Ассалому алейкум ҳамшаҳриёни азиз!

Мардуми шарифи Қайроққум чун дигар сокинони Тоҷикистон ва мисли тамоми мусулмонони ҷаҳон Иди Қурбонро ки саршор аз арзишҳои инсонпарварию мардумнавозӣ аст, дар фазои суботи сиёсӣ, пойдорӣ ва устувории ваҳдати миллӣ, ҷаҳду талошҳои созанда ва бунёдкорона барои расидан ба зиндагии шоиста ва эъмори ҷомеаи демократӣ, ҳуқуқбунёд ва дунявӣ истиқбол мегиранд. Ба муносибати Иди саиди Қурбон ҳамаи Шумоёнро ҳамдиёрони азиз самимона табрик мегӯям ва ба ҳамаатон хонаи обод, саломативу сарбаландӣ ва барори кор орзу менамоям.

«Рӯзи Рӯдакӣ» дар Қайроққум

Дар боғи фарҳангу фароғатии «24-солагии Истиқлолияти давлатии ҶТ» бахшида ба «Рӯзи Рӯдакӣ» таҳти унвонии «Рӯдакӣ чанг бигрифту навохт…» чорабинии бошукӯҳ баргузор шуд.

Чорабинӣ бо сухани муовини Раиси шаҳр Ғайратҷон Оқилов ифтитоҳ ёфта, мавсуф роҷеъ ба рӯзгору осори Абӯабдуллоҳи Рӯдакӣ, замони аҳди Сомониён, суханварони ҳамасри устод андешаҳои ҷолиб баён кард. Таъкид шуд, ки маҳз бо шарофати замони соҳибистиқлолӣ шеъри ноби тоҷикӣ, мақоми Одамушшуаро Абӯабдуллоҳи Рӯдакӣ дар сатҳи баланд арҷгузорӣ мешавад.

Кӯмак ба 100 нафар

Фарҳанги бузурги то исломии миллати мо ва ҳамчунин замони исломӣ тарғибгари ғояҳои эҳсону накӯкорӣ, ҳусни муошират бо аҳли хонадон, муомилаи нек бо ҳамсоягон, мурувват бо дӯстон, дилсӯзию ғамхорӣ ба беморону нотавонон ва ёди хайр аз гузаштагонро талқин мекунанд.

Бо арҷгузорӣ ба суннатҳои зикр гардида Мақомоти иҷроияи ҳокимияти давлатии шаҳр дар арафаи Иди саиди Қурбон хайру эҳсонро самти асосии фаъолияти худ қарор дода, зиёда аз 100 нафар ашхоси ниёзманд ва оилаҳои нодор бо кӯмаки моддӣ фаро гирифта шуданд.