Мулоқот бо собиқадорон

Дирӯз, 18 феврал Раиси шаҳри Қайроққум Матлубахон Амонзода бо ҳайати гурӯҳи кории Ҳукумати  Ҷумҳурии Тоҷикистон як гурӯҳ собиқадорони баруманди меҳнатро ба ҳузур пазируфт.

Дар ибтидо Раиси шаҳр роҷеъ ба мақом ва саҳми собиқадорон дар ҳаёти ҷомеа, дар густариши корҳои тарғиботиву ташвиқотӣ хеле муҳим арзёбӣ намуда, зикр кард, ки фаъолияти пурмаҳсули эшон дар рушди соҳаҳои мухталифи хоҷагии халқи шаҳр бағоят назаррас ва таҷрибаи бою беназири онҳоро намунаи ибрати насли имрӯз мебошад. Сарвари шаҳр таъкид намуд, ки дар байни собиқадорон шахсиятҳои барӯманди шаҳр, ки аз рӯзҳои нахустини истиқлолияти давлатӣ фаъолият доштанд, ҳузур доранд. Ҳамзамон, Раиси шаҳр роҷеъ ба таҷдиди назар кардан бо назардошти вазъи имрӯзаи ҷаҳони муосир дар ташкил ва роҳандозии корҳои тарғиботӣ-ташвиқотӣ ва оид ба иштироки фаъолона собиқадорон дар ин раванд ибрози андеша намуд.

Мулоқот бо фаъолон

17 феврал дар Кохи Истиқлол таҳти раёсати Раиси шаҳри Қайроққум Матлубахон Амонзода оид  ба лоиҳаи тағйиру иловаҳо ба Канститутсияи (Сарқонуни) Ҷумҳурии Тоҷикистон воридшаванда ва нуктаҳои асосии Паёми Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, Ҷаноби Олӣ, муҳтарам Эмомалӣ Раҳмон мулоқот доир шуд.

Дар мулоқот сардорони ташкилоту корхонаҳо, мудирони шуъбаю бахши МИҲД, мақомоти ҳифзи ҳуқуқ, собиқадорони ҷангу меҳнат, иттиҳодияҳои ҷамъиятӣ, раисони Ҷамоати шаҳракҳо, намояндагони соҳаҳои маориф, тандурустӣ, фарҳанг ва соҳоти дигар ширкат доштанд.

Ҳомии Ватан бошем

Рӯзи 18 феврал дар қаламрави шаҳр Рӯзи ягонаи ахбор дар мавзӯи «Ҳифзи Ватан – вазифаи муқаддаси ҳар як шаҳрванд» дар ҷомеаҳои меҳнатии беш аз 40 корхонаву муассисаҳо ва Ҷамоати шаҳракҳо муташакилона ба вуқӯъ пайваст.

Дар баргузории он тарғиботчиён аз мақомоти иҷроияи ҳокимияти давлатии вилоят ва шаҳр ширкат варзида, роҷеъ ба мавзӯи мазкур, ҳамзамон доир ба лоиҳаи тағйироту иловаҳо ба Конститутсияи (Сарқонуни) Ҷумҳурии Тоҷикистон мубодилаи афкор намуданд.

Иншоотҳои ҷашнӣ

Дар арафаи ҷашни байналмилалии Наврӯз ҷиҳати истиқболи шойистаи иди аҷдодӣ чор иншооти аҳамияти иқтисодиву иҷтимоӣ дошта мавриди баҳрабардорӣ қарор хоҳад гирифт.

Хонаи истиқоматии панҷошёна, дорои 66 ҳуҷра,  бинои истиқоматӣ бо нуқтаи савдо ва хизматрасонӣ, Маркази савдо ва хизматрасонӣ, корхонаи истеҳсоли лӯлаҳои чоркунҷа ва доирашакл аз ҷумлаи  армугонҳои идона мебошанд.  Баъдан ошхонаи миллӣ дорои 110 ҷойи нишаст дар кӯчаи ба номи Исмоили Сомонӣ, сехи коркарди мева, коргоҳи истеҳсоли мебел, комплекси парвариши чорвои калони шохдор, сехи ордбарорӣ ва Маркази хизматрасонӣ ва савдо дар кӯчаи Истиқлол бошанд аз он иншоотҳои ҷашнӣ махсуб меёбанд, ки дар рӯзҳои тантанаи  25-умин солгарди Истиқлолияти давлатии Ҷумҳурии Тоҷикистон ифтито меёбанд.