Доиркунии мусобиқа ба ҷашни Истиқлол

Қарори дигари Раиси шаҳр таҳти №98, аз 11-уми апрели соли равон “Дар бораи гузаронидани мусобиқа бахшида ба 25-солагии Истиқлолияти давлатии Ҷумҳурии Тоҷикистон байни шаҳрак, деҳа, маҳалла, хона ва оилаи намунавӣ” ба тасвиб расид. Моҳияти асосии қарор ба фароҳам овардану тарғиб намудани корҳои ободкориву созандагӣ ва густариши дарки хештаншиносиву варзиш нигаронида шудааст, то ҷашни 25-солагии Истиқлолият бо армуғонҳои арзанда сазовор истиқбоол гирифта шавад.

Нозирони навраси ҳаракат

Бо ҳадафи баланд бардоштани маърифати қоидаҳои ҳаракати роҳ байни наврасон озмуни шаҳрии “Нозирони навраси ҳаракат” доир ва дастаи МТМУ-и №1 мақоми аввалро соҳибӣ кард. Ғолибон дар озмуни минтақавӣ, ки чанде пеш дар шаҳри Хуҷанд баргузор гардид иштирок намуда, аз рўи даҳ шарт соҳиби 76,5 хол ва сазовори ҷойи дуюм шуданд.

Барномаи рангин

Ба ифтихори ҷашнҳои Ваҳдати миллӣ ва 25-солагии Истиқлолияти давлатии Тоҷикистон як гуруҳ ҳунарпарварони сирки давлатии пойтахт бо роҳбарии Шокир Болтаев имрўзҳо дар вилояти Суғд сафари ҳунарӣ доранд. Ҳафтаи гузашта барномаи рангини гуруҳ пешкаши устодону толибилмони МТМУ №1 гардид. Баромади ҳунарварони касбии сирк Шокир Болтаев, Алмос Илёсов, Фирдавс Ҷалилов ва дигарон мақбули тамошобинон шуд.

Маҳфил дар Зарчашма

Дар МТМУ №12 шаҳраки Адрасмон бо сармавзӯи «Ватанам-Тоҷикистон» машғулияти 93-умини маҳфили муштараку сайёр, илмию методӣ, амалию назариявӣ ва ҳуқуқию доимоамалкунандаи «Корвони маънавиёт» ба ифтихори 25-умин солгарди Истиқлолияти давлатии Ҷумҳурии Тоҷикистон ва “Соли 2016-Соли фарди солим” баргузор гардид.

Дар ибтидо роҳбари маҳфил Акбаралӣ Усмоналиев роҷеъ ба нақшаву ҳадафҳои маҳфил ибрози андеша карда, роҳбарон ва нуҳ аъзои  зермаҳфилҳоро доир ба ҷараёни он муваззаф намуд.

Дар саҳифаи «Минбари роҳбар» директори МТМУ №12 Улуғбек Ҳоҷаев аз фанни «Ҳифзи меҳнат»  дар доираи мавзӯи «Ташкили кор оид ба ҳифзи меҳнат ва бехатари аз сӯхтор дар МТМУ № 12»   бо мавзӯи «Оид ба тартиб додани шиносномаи иҷтимоии МТМУ № 12»  барои кулли иштирокчиёни маҳфил аз рӯи таҷрибаи корӣ кушод гузаронд.